ປະທານາທິບໍດີສະຫະລັດ ທ່ານບາຣັກ ໂອບາມາ ກຳລັງສົ່ງເຈົ້າ
ໜ້າທີ່ທະຫານ ໄປຍັງປະເທດ Cameroon ເພື່ອທຳການສັງ
ເກດການທາງອາກາດ ເບິ່ງການເຄື່ອນໄຫວຂອງກຸ່ມຫົວຮຸນແຮງ
Boko Haram.
ເຈົ້າໜ້າທີ່ກະຊວງປ້ອງກັນປະເທດ ໄດ້ກ່າວວ່າ ກອງກຳລັງທີ່ວ່ານີ້
ແມ່ນຖືກເຊື້ອເຊີນໂດຍລັດຖະບານ Cameroon ໃນຖານະທີ່
ເປັນພາກສ່ວນນຶ່ງຂອງຄວາມພະຍາຍາມນາໆຊາດ ທີ່ຈະຍຸຕິ
ການແຜ່ກະຈາຍໃນການກໍ່ຄວາມຮຸນແຮງ ຢູ່ໃນເຂດໃນອາຟຣິກາຕາເວັນຕົກ.
ເຈົ້າໜ້າທີ່ທ່ານນີ້ຍັງກ່າວເພີ້ມຕື່ມວ່າ ຄວາມຈຳເປັນໃນການເອົາບາດກ້າວຂອງນາໆຊາດ
ໄດ້ກາຍມາເປັນ “ເລື້ອງທີ່ຮີບດ່ວນຫຼາຍຂຶ້ນ ໃນຂະນະທີ່ ກຸ່ມຫົວຮຸນແຮງ Boko Haram ແລະກຸ່ມອື່ນໆ ພາກັນກໍ່ຄວາມຮຸນແຮງເພີ້ມຂຶ້ນຢູ່ນັ້ນ.”
ກຸ່ມ Boko Haram ແມ່ນມີການເຄື່ອນໄຫວທີ່ສຳຄັນຢູ່ທາງພາກເໜືອຂອງ Cameroon ຊຶ່ງຕັ້ງຢູ່ກົງກັນຂ້າມ ກັບຖານທີ່ໝັ້ນຂອງກຸ່ມດັ່ງກ່າວ ໃນພາກຕາເວັນອອກສຽງເໜືອຂອງ Nigeria. ພວກຫົວຮຸນແຮງກຸ່ມນີ້ ໄດ້ສັງຫານພົນລະເຮືອນຈຳນວນຫຼາຍຮ້ອຍຄົນ ໃນ Cameroon ພ້ອມດຽວກັນນັ້ນ ມີຢ່າງນ້ອຍ 10 ພັນຄົນ ຖືກຂ້າຕາຍ ໃນ Nigeria ໃນຮອບຫຼາຍປີທີ່ຜ່ານມານີ້.
ປະທານາທີບໍດີໄດ້ປະກາດ ກ່ຽວກັບການສົ່ງເຈົ້າໜ້າທີ່ທະຫານດັ່ງກ່າວ ໃນຈົດໝາຍທີ່ສົ່ງໄປເຖິງຫົວໜ້າຂອງສະພາຕ່ຳແລະສະພາສູງສະຫະລັດ ໃນວັນພຸດວານນີ້. ທ່ານໄດ້ກ່າວວ່າ ມີເຈົ້າໜ້າທີ່ທະຫານ ປະມານ 90 ຄົນ ຈະເລີ້ມສົ່ງໄປຍັງ Cameroon ໃນວັນຈັນນີ້ ພ້ອມ ກັບກຳລັງພິເສດຂອງສະຫະລັດ ຈຳນວນປະມານ 300 ຄົນ.
ໂຄສົກກະຊວງ ປ້ອງກັນປະເທດ ພັນໂທ Michelle Baldanza ໄດ້ກ່າວວ່າ “ເຈົ້າໜ້າທີ່ທະຫານ ທີ່ຖືກສົ່ງໄປນີ້ ຈະຊ່ອຍເຫຼືອໃນດ້ານສືບລັບ ບິນສອດແນມ ແລະກວດກາເບິ່ງ
ຂົງເຂດດັ່ງກ່າວ.”
ນອກເໜືອໄປຈາກ ຄວບຄຸມການບິນສອດແນມໂດຍເຮືອບິນທີ່ບໍ່ມີຄົນຂັບແລະບໍ່ຕິດອາ
ວຸດ MQ-1 ແລ້ວ ທະຫານສະຫະລັດຈະເພັ່ງເລັ່ງໃສ່ໃຫ້ການສະໜັບສະໜຸນການປະຕິບັດງານ ການຮັກສາຄວາມປອດໄພຕາມຊາຍແດນ ແລະເສີມຄວາມສາມາດໃຫ້ແກ່ກຳລັງທີ່
ທຳການຕອບໂຕ້ ອິງຕາມເຈົ້າໜ້າທີ່ກະຊວງປ້ອງກັນປະເທດ.
