ໃນຂະນະທີ່ຕະຫລາດການເງິນຂອງໂລກກຳລັງວຸ້ນວາຍຍ້ອນຄວາມຕື່ນຕົກໃຈທີ່ອັງກິດໄດ້ລົງຄະແນນສຽງ ຖອນໂຕອອກຈາກ ສະຫະພາບຢູໂຣບ ປະທານາທິບໍ ດີສະຫະລັດ ທ່ານ Barack Obama ກໍໄດ້ອອກຖະແຫຼງການສະບັບນຶ່ງ ໃນວັນສຸກວານນີ້ວ່າ “ປະ ຊາຊົນຂອງສະຫະລາຊະອານາຈັກ ໄດ້ສະແດງອອກມາໃຫ້ເຫັນແລ້ວ ແລະພວກເຮົາໃຫ້ຄວາມນັບຖືຕໍ່ການຕັດສິນໃຈເຂົາເຈົ້າ.” ທ່ານກ່າວເພີ້ມອີກວ່າ “ຄວາມສຳພັນພິເສດ” ລະຫວ່າງສະຫະລັດ ແລະອັງກິດ ຍັງ “ຈະດຳເນີນຕໍ່ໄປ” ແລະນັ້ນ ການເປັນສະມາຊິກໃນ ອົງການ NATO “ຍັງເປັນສິ່ງສຳຄັນສຸດ ໃນນະໂຍບາຍການຕ່າງປະເທດ ຄວາມໝັ້ນຄົງ ແລະເສດຖະກິດ ຂອງສະຫະລັດ.”
ໃນການເດີນທາງໄປຢ້ຽມຢາມອັງກິດເທື່ອສຸດທ້າຍໃນເດືອນເມສາປີນີ້ ປະທານາ ທິບໍດີ Obama ໄດ້ຢືນຄຽງຂ້າງ ກັບນາຍົກລັດຖະມົນຕີອັງກິດ ທ່ານ David Cameron ແລະໄດ້ກ່າວຢ່າງແຂງຂັນຄັດຄ້ານຕໍ່ການລົງຄະແນນສຽງຖອນໂຕ ອອກຈາກສະຫະພາບຢູໂຣບໃນອັນທີ່ຮ້ອງວ່າ “Brexit” ໂດຍກ່າວວ່າ ຖ້າຫາກ ອັງກິດລົງຄະແນນສຽງ ຖອນໂຕອອກຈາກ ສະຫະພາບຢູໂຣບແລ້ວ ອັງກິດອາດຈະຕ້ອງ “ກັບຄືນໄປລຽນແຖວໃໝ່” ເພື່ອຈະເຮັດຂໍ້ຕົກລົງການຄ້າສະບັບໃໝ່ກັບສະຫະລັດ. ປະທານາທິບໍດີ Obama ເບິ່ງຄືວ່າໄດ້ຮ້ອງຂໍຕໍ່ບັນດາຜູ້ມີສິດປ່ອນບັດຊາວອັງກິດ ໂດຍກ່າວວ່າ “ສະຫະລາຊະອານາຈັກ ກຳລັງຢູ່ໃນທ່າທີທີ່ດີທີ່ສຸດ ເວລາອັງກິດຊ່ວຍນຳພາຢູໂຣບທີ່ເຂັ້ມແຂງ. ມັນເປັນອຳນາດອິດທິພົນຂອງອັງກິດໃນການເປັນພາກສ່ວນນຶ່ງຂອງສະຫະພາບຢູໂຣບ.”
ຢູ່ໃນຖະແຫລງການໃນວັນສຸກວານນີ້ ຫລັງຈາກຜົນການລົງຄະແນນສຽງທີ່ຕື່ນຕົກໃຈ ປະທານາທິບໍດີໄດ້ກ່າວຢ້ຳເຖິງຄວາມສຳພັນຂອງສະຫະລັດກັບສະຫະ ພາບຢູໂຣບ ໂດຍກ່າວວ່າ ສະຫະພາບຢູໂຣບ “ໄດ້ດຳເນີນການຢ່າງຫຼວງຫຼາຍ ແລ້ວ ເພື່ອສົ່ງເສີມໃຫ້ມີສະ ຖຽນລະພາບ ກະຕຸ້ນໃຫ້ເສດຖະກິດເຕີບໂຕ ແລະ ໃຫ້ຄວາມອຸບປະຖຳຕໍ່ການແຜ່ຜາຍ ກ່ຽວກັບຄຸນຄ່າແລະແນວຄິດຂອງປະຊາທິປະໄຕ ໄປທົ່ວທັງທະວີບ ແລະໄກໄປກວ່ານັ້ນ.”
ປະທານາທິບໍດີ Obama ໄດ້ໂອ້ລົມທາງໂທລະສັບ ກັບນາຍົກລັດຖະມົນຕີ Cameron ໃນວັນສຸກວານນີ້. ຖະແຫລງການຂອງທຳນຽບຂາວ ກ່າວວ່າ ທັງສອງທ່ານ ມີຄວາມໝັ້ນ ໃຈວ່າ ອັງກິດ “ແລະສະຫະພາບຢູໂຣບຈະເຈລະ ຈາໃນທາງທີ່ໃຫ້ດອກອອກຜົນໄປໜ້າ ເພື່ອຄໍ້າປະກັນ ຕໍ່ການມີສະຖຽນລະພາບ ທາງດ້ານການເງິນ ສືບຕໍ່ການຄ້າແລະການລົງ ທຶນ ແລະມີຄວາມອຸດົມຮັ່ງມີ ຮ່ວມກັນ ທີ່ເຂົາເຈົ້ານຳມານັ້ນ.”
ອ່ານຂ່າວນີ້ເພີ້ມເປັນພາສາອັງກິດ
