ປະທານາທິບໍດີບາຣັກ ໂອບາມາ ປະນາມການທົດລອງ ອາວຸດນິວເຄລຍຂອງເກົາຫລີ ເໜືອໃນວັນສຸກວານນີ້ໂດຍເອີ້ນວ່າ “ເປັນໄພຂົ່ມຂູ່ທີີ່ຮ້າຍແຮງຕໍ່ຄວາມໝັ້ນຄົງຂອງຂົງເຂດແລະຕໍ່ສັນຕິພາບແລະສະຖຽນລະພາບຂອງນາໆຊາດ.
ໃນຖະແຫຼງການຂອງທຳນຽບຂາວນັ້ນ ປະທານາທິບໍດີກ່າວວ່າ ການກະທຳທີ່ເປັນການ ທ້າທາຍແລະສ້າງຄວາມບໍ່ທຸ່ນທ່ຽງມີແຕ່ຈະສ້າງຄວາມໂດດດ່ຽວແລະຄວາມທຸກຍາກໃຫ້ແກ່ປະຊາຊົນຂອງຕົນ ໂດຍການສືບຕໍ່ສືບຂະຫຍາຍຄວາມສາມາດທາງດ້ານອາວຸດນິວເຄລຍແລະລູກສອນໄຟຂີປະນາວຸດ.
ສະພາຄວາມໝັ້ນຄົງອົງການສະຫະປະຊາຊາດໄດ້ປະຊຸມແບບປິດລັບໃນຕອນບ່າຍວັນສຸກວານນີ້ທີ່ນະຄອນນິວຢອກ. ປະທານສະພາຄວາມໝັ້ນຄົງຊຶ່ງແມ່ນເອກອັກຄະລັດຖະ ທູດນິວຊີແລນ ທ່ານ Gerard van Bohemen ກ່າວຕໍ່ພວກນັກຂ່າວວ່າ ສະມາຊິກທັງ 15 ປະເທດໄດ້ປະນາມຢ່າງແຮງ ຕໍ່ການທົດລອງອາວຸດນິວເຄລຍໃຕ້ດິນແລະໄດ້ຕົກລົງກັນ ທີ່ຈະເຮັດວຽກໃນທັນທີເພື່ອເອົາມາດຕະການທີ່ເໝາະສົມ ທີ່ບັນຈຸຢູ່ໃນມາດຕາ 41 ຂອງກົດບັດສະຫະປະຊາຊາດ ຊຶ່ງມາດຕາດັງກ່າວແມ່ນກວມເອົາການລົງໂທດຕ່າງໆ.
ສ່ວນເອກອັກຄະລັດຖະທູດສະຫະລັດ ປະຈຳສະຫະປະຊາຊາດ ທ່ານນາງ Samantha Power ກ່າວຕໍ່ພວກນັກຂ່າວວ່າ “ສະພາຄວາມໝັ້ນຄົງ ຕ້ອງໄດ້ນຳໃຊ້ທຸກເຄື່ອງມືທີ່ຕົນ ມີຢູ່ ເພື່ອປ່ຽນແປງການຄິດໄລ່ຄຳນວນຂອງເກົາຫຼີເໜືອ. ທ່ານນາງກ່າວວ່າ ວໍຊິງຕັນຈະເຮັດວຽກຮ່ວມກັບພາຄີນາໆຊາດຂອງຕົນ ເພື່ອບັງຄັບໃຫ້ມີການຈັດຕັ້ງປະຕິບັດຢ່າງເຄັ່ງຄັດກ່ຽວກັບມາດຕະການຕ່າງໆທີ່ມີຢູ່ ໃນມະຕິສີ່ສະບັບກ່ອນໜ້ານີ້ ຂອງອົງການສະຫະປະຊາຊາດ. ແລະພວກເຮົາຈະເອົາບາດກ້າວທີ່ສຳຄັນຈຳນວນນຶ່ງຮວມທັງການລົງໂທດຄັ້ງໃໝ່ ເພື່ອສະແດງໃຫ້ເກົາຫລີເໜືອເຫັນວ່າ ຕ້ອງມີຜົນທີ່ຕິດຕາມມາ ຕໍ່ການປະຕິບັດແບບຜິດກົດໝາຍແລະເປັນອັນຕະລາຍຂອງຕົນ.”
ສ່ວນເອກອັກຄະລັດຖະທູດຂອງຍີ່ປຸ່ນ ທ່ານ Koro Bessho ກ່າວວ່າ ລັດຖະບານຂອງທ່ານຈະຊອກຫາຊ່ອງທາງເພື່ອໃຫ້ມີການເອົາມະຕິສະບັບໃໝ່ ແລະມາດຕະການໃໝ່ໆ.
