ປະທານາທິບໍດີ ບາຣັກ ໂອບາມາ ກ່າວວ່າ “ໄດ້ມີຄວາມຄືບ
ໜ້າຢ່າງຫຼວງຫຼາຍ” ໃນການຕໍ່ຕ້ານເຊື້ອໂຣກ Ebola ໃນ
ອາຟຣິກາຕາເວັນຕົກ ແຕ່ເຕືອນວ່າ ປະຊາຄົມນາໆຊາດຈະ
ຕ້ອງລະມັດລະວັງ ຈົນກວ່າເຊື້ອໄວຣັສດັ່ງກ່າວຈະຖືກກຳຈັດ
ໃຫ້ໝົດໄປ.
ໃນວັນພຸດວານນີ້ ທ່ານໂອບາມາ ໄດ້ພົບປະກັບບັນດາຜູ້ນຳ
ປະເທດ ກີນີ ໄລເບເຣຍ ແລະ Siera Leone ຊຶ່ງເປັນພວກ
ປະເທດໄດ້ຮັບຄວາມເສຍຫາຍຫຼາຍທີ່ສຸດ ຈາກການລະບາດ
ຂອງເຊື້ອພະຍາດດັ່ງກ່າວໃນປີແລ້ວນີ້ ເພື່ອປະເມີນເບິ່ງຄວາມ
ຄືບໜ້າ ແລະໂອ້ລົມກັນກ່ຽວ ກັບຄວາມພະຍາຍາມເພື່ອຟື້ນຟູເສດຖະກິດຄືນນັ້ນ.
ຄວາມຄືບໜ້າທີ່ພວກປະເທດເຫຼົ່ານີ້ໄດ້ຮັບ ດ້ວຍຄວາມຊ່ອຍເຫຼືອຈາກສະຫະລັດ ແມ່ນຊັດແຈ້ງ. ຫຼັງຈາກເຊື້ອພະຍາດດັ່ງກ່າວໄດ້ສັງຫານປະຊາຊົນ 10 ພັນຄົນໄປໃນຂົງເຂດ ການລະບາດຂອງເຊື້ອໄວຣັສດັ່ງກ່າວ ໄດ້ລົດລົງບໍ່ຮອດ 40 ກໍລະນີໃໝ່ທີ່ເກີດໃນກີນີ ແລະ Sierra Leone. ໄລເບເຣຍບໍ່ມີຜູ້ໃດໄດ້ຕິດເຊື້ອໄວຣັສນີ້ໃໝ່ອີກ.
ທ່ານໂອບາມາ ໄດ້ເປັນເຈົ້າພາບຕ້ອນຮັບປະທານາທິບໍດີ Ellen Johnson Sirleaf ແຫ່ງໄລເບເຣຍ ປະທານາທິບໍດີ Alpha Conde ແຫ່ງກີນີ ແລະປະທານາທິບໍດີ Ernest Bai Koroma ແຫ່ງ Sierra Leone ທີ່ຫ້ອງປະຊຸມຄະນະລັດຖະບານທີ່ທຳນຽບຂາວ ຊຶ່ງທ່ານໄດ້ກ່າວຍ້ອງຍໍໃນອັນທີ່ທ່ານກ່າວວ່າ ໄດ້ເປັນຄວາມກ້າຫານແລະການຕັດສິນໃຈອັນຍິ່ງໃຫຍ່ຂອງພວກທ່ານ ໃນການປິ່ນປົວພວກທີ່ໄດ້ຮັບເຄາະຮ້າຍນັ້ນ.
ທ່ານໂອບາມາ ກ່າວຕື່ມວ່າ “ບັດນີ້ ພວກເຮົາກຳລັງເພ່ງເລັງໃສ່ເປັ້າໝາຍຮ່ວມກັນ ແລະ
ນີ້ໝາຍຄວາມວ່າ ເຮັດໃຫ້ເຊື້ອໄວຣັສດັ່ງກ່າວ ໝົດໄປ ໂດຍກ່າວຕື່ມວ່າ “ ພວກເຮົາບໍ່ສາມາດເພິ່ງພໍໃຈໄດ້ ເຊື້ອໄວຣັສດັ່ງກ່າວ ແມ່ນທຳນາຍລ່ວງໜ້າບໍ່ໄດ້.”
ປະທານາທິບໍດີໂອບາມາ ໄດ້ຮຽກຮ້ອງໃຫ້ລະມັດລະວັງ ໂດຍກ່າວວ່າ ປະຊາຄົມນາໆຊາດຍັງຈະຕ້ອງເຂົ້າພົວພັນຢ່າງເຕັມສ່ວນໃນການເປັນພາຄີກັບ 3 ປະເທດນີ້ “ຈົນກວ່າ ບໍ່ມີ
ກໍລະນີເຊື້ອອີໂບລາໃໝ່ ເກີດຂຶ້ນອີກ.”
ນອກຈາກການສັງຫານຜູ້ຄົນໄປຫຼາຍພັນຄົນແລ້ວ ເຊື້ອອີໂບລາ ຍັງໄດ້ສ້າງຄວາມເສຍຫາຍໃຫ້ແກ່ການເສດຖະກິດຂອງກີນີ ໄລເບເຣຍ ແລະ Sierra Leone ແລະພວກຜູ້ນຳຂອງເຂົາເຈົ້າກຳລັງຂໍຄວາມຊ່ອຍເຫຼືອ ເພື່ອຟື້ນຟູເສດຖະກິດຂອງພວກເຂົາເຈົ້າຄືນໃໝ່ອີກ.
