ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ບົດບາດຂອງທ່ານໃນການເລືອກຕັ້ງປີນີ້ ເພື່ອເລືອກເອົາຜູ້ທີ່ຈະມາຮັບຕຳແໜ່ງແທນທ່ານນັ້ນ ກໍແມ່ນການເຕືອນຊາວອາເມຣິກັນທັງຫຼາຍວ່າ ໜ້າທີ່ຂອງປະທານາທິບໍດີ ແມ່ນພາລະທີ່ໜັກໜ່ວງ ຈິງຈັງ.
“ນີ້ບໍ່ແມ່ນການສະແດງລະຄອນເຄິ່ງຈິງໃນລາຍການໂທລະພາບ ຫຼື Reality TV. ທ່ານ ໂອບາມາ ໄດ້ກ່າວໃນການປະກົດຕົວໃນລາຍການ Tonight Show ຂອງຕາໜ່າງ NBC ທີ່ຈະນຳອອກອາກາດໃນວັນພະຫັດມື້ນີ້. ຂ້າພະເຈົ້າໄດ້ເຫັນການຕັດສິນໃຈຕ່າງໆທີ່ຈະ ຕ້ອງ ໄດ້ປະຕິບັດ ແລະພະລະກິດຕ່າງໆທີ່ຕ້ອງໄດ້ກະທຳ ແລະວ່າ ຂ້າພະເຈົ້າມີຄວາມໝັ້ນໃຈທີ່ວ່າ ຖ້າຫາກວ່າຊາວອາເມຣິກັນທັງຫຼາຍ ຍັງຈົດຈຳເລື້ອງຫຼັກໆແລະບັນຫາສຳ ຄັນ ອື່ນໆ ທີ່ວ່າພວກເຮົາຕ້ອງເຮັດໃຫ້ຖືກຕ້ອງ ທີ່ວ່າພວກເຂົາເຈົ້າຈະຕ້ອງມີທາງເລືອກ ທີ່ດີ.”
ທ່ານໂອບາມາ ສ່ວນໃຫຍ່ແມ່ນໄດ້ຢູ່ຫ່າງໆ ຈາກຂັ້ນຕອນການເລືອກຕັ້ງ ມາຈົນເທົ່າເຖິງປະ ຈຸບັນນີ້ ໃນຂະນະທີ່ຜູ້ມີສິດປ່ອນບັດໄດ້ເລືອກເອົາຕົວແທນເພື່ອລົງສະໝັກຂອງພວກເຂົາເຈົ້າ ຈາກພັກ Democrat ຂອງທ່ານ ແລະພັກ Republican ທີ່ເປັນຄູ່ແຂ່ງ. ແຕ່ວ່າ ປະຈຸບັນນີ້ທ່ານນາງ Hillary Clinton ແລະທ່ານ Donald Trump ຈະປະເຊີນໜ້າກັນໃນເດືອນພະ ຈິກ ຈຶ່ງມີການຄາດຫວັງວ່າ ປະທານາທິບໍດີ ຈະຊຸກຍູ້ໃຫ້ພັກ Democrat ຢູ່ໃນທຳນຽບຂາວຕໍ່ໄປ ເປັນສະໄໝທີ 3.
ທ່ານ ໂອບາມາ ໄດ້ກ່າວຕໍ່ຜູ້ຈັດລາຍການ Tonight Show ທ່ານ Jimmy Fallon ວ່າ ທ່ານໄດ້ໂອ້ລົມກັບທ່ານນາງ Clinton ແລະຂູ່ແຂ່ງຄົນສຳຄັນຂອງທ່ານນາງໃນການສະເໜີ ໃຫ້ເປັນຕົວແທນຂອງພັກ Democrat ທ່ານ Bernie Sanders ຕະຫຼອດຂັ້ນຕອນການດຳເນີນງານຂອງການເລືອກຕັ້ງຂັ້ນຕົ້ນ ແລະໃຫ້ຄຳແນະນຳ. ທ່ານໄດ້ກ່າວວ່າ ບໍ່ເປັນສິ່ງທີ່ແປກຫຍັງທີ່ວ່າ ທ່ານຍັງບໍ່ໄດ້ໂອ້ລົມສົນທະນາໃດໆກັບທ່ານ Trump ເລີຍ.
ໃນລະຫວ່າງການໂຄສະນາຫາສຽງຢູ່ນັ້ນ ທ່ານ Trump ໄດ້ຕຳນິຕິຕຽນ ຊ້ຳແລ້ວ ຊ້ຳອີກ ຕໍ່ບົດບາດການເປັນປະທານາທິບໍດີຂອງທ່ານໂອບາມາ ແລະໄດ້ກ່າວວ່າ ຖ້າຫາກວ່າ ທ່ານນາງ Clinton ໄດ້ຖືກຮັບເລືອກແລ້ວ ກໍເທົ່າກັບວ່າ ມັນກໍມີແຕ່ຈະເປັນການສືບຕໍ່ ນະໂຍບາຍແບບດຽວກັນນີ້ຕໍ່ໄປ.
ທ່ານໂອບາມາ ໄດ້ເວົ້າແບບຕະລົກຂົບຂັນວ່າ ຜູ້ຄົນທີ່ສັງກັດພັກ Democrat ນັ້ນແມ່ນມີຄວາມດີໃຈທີ່ວ່າ ການເລືອກຕັ້ງຂັ້ນຕົ້ນຂອງພັກ Republican ໄດ້ຄັດເລືອກເອົາທ່ານ Trump ໃຫ້ເປັນຕົວແທນຂອງພັກ ແຕ່ວ່າທ່ານຍັງໄດ້ສະແດງອອກເຖິງຄວາມເປັນຫວ່ງເປັນໃຍໂດຍກ່າວວ່າ ປະເທດຊາດຈະປະຕິບັດພາລະກິດທີ່ດີທີ່ສຸດນັ້ນ ແມ່ນວ່າທັງສອງພັກການ ເມືອງຈະຕ້ອງ “ຈິງໃຈ ແລະພະຍາຍາມແກ້ໄຂບັນຫາຢ່າງຈິງຈັງ.”
ກະລຸນາອ່ານຂ່າວນີ້ເພີ້ມຕື່ມເປັນພາສາອັງກິດ
