ລາຄານໍ້າມັນ ທີ່ແພງຂຶ້ນ ຂົ່ມຂູ່ ການເລືອກຕັ້ງ ເຂົ້າຮັບ ຕຳແໜ່ງຕື່ມ ຂອງທ່ານໂອບາມາ (ເບິ່ງວີດີໂອ)

ທ່ານ Mitt Romney ມີ​ຄະ​ແນນ​ສຽງ​ນຳ​ໜ້າ​ ທ່ານ Rick Santorum ​ໃນ​ການ​ແຂ່ງຂັນ​
ຂອງ​ພັກຣີພັບ​ບລີ​ກັນ ​ແລະ​ທ່ານຢາກ​ຈະ​ຫັນ​ ການ​ໂຈມ​ຕີ​ຂອງ​ທ່ານ ​ໄປ​ຍັງ​ປະທານາທິບໍດີ​
ບາຣັກ ​ໂອ​ບາ​ມາ ​ໂດຍໄວ​ເທົ່າ​ທີ່​ຈະ​ໄວ​ໄດ້.

ທ່ານ Romney ​ເວົ້າວ່າ “ທ່ານ​ໂອ​ບາ​ມາ​ເວົ້າວ່າ ຖ້າ​ທ່ານ​ຫາກ​ບໍ່​ສາມາດ​ຕ່າວ​ປີ້ນ​
ເສດຖະກິດ​ໄດ້ ພາຍ​ໃນ​ເວລາ 3 ປີ ​ທ່ານຈະຂໍ​ສະ​ເໜີເປັນ​(ປະທານາທິບໍດີ)​ແຕ່​
ພຽງ​ສະ​ໄໝດຽວ. ພວກ​ເຮົາ​ມາ​ທີ່​ນີ້ ​ເພື່ອ​ໄລ່​ບັນຊີ​ແມ່ນ​ບໍ? ພວກ​ເຮົາ​ມາ​ທີ່​ນີ້​ເພື່ອ​
ໄລ່ບັນຊີ.”

ການ​ແຂ່ງຂັນ​ຂອງ​ພັກຣີພັບ​ບລີ​ກັນ​ໄດ້​ກາຍ​ເປັນ​ການ​ໂຄສະນາ​ຫາ​ສຽງຍາດ​ແຍ່ງ​ເອົາຜູ້ຕາງໜ້າ​
ພັກ ໂດຍ​ການ​ກ່າວ​ໂຈມ​ຕີ​ຄວາມ​ບໍ່​ດີ​ຂອງ​ກັນ​ແລະ​ກັນ ​ແລະ​ກໍ​ມີ​ທ່າ​ທາງ​ວ່າ​ ຈະດຳ​ເນີນ​ຕໍ່​ໄປ​
ແບບນີ້ຢ່າງ​ບໍ່​ມີ​ກຳນົດ ຊຶ່ງ​ເປັນ​ສິ່ງ​ທີ່​ພວກ​ນັກຊ່ຽວ ຊານເວົ້າວ່າ ອາດ​ຈະ​ຊ່ອຍປະທານາທິບໍດີ​
ນັ້ນ.

ແຕ່​ລາຄາ​ນໍ້າມັນ​ທີ່​ພວມ​ແພງ​ຂຶ້ນ​ໃນ​ສະຫະລັດ ​ເຮັດ​ໃຫ້​ຄະ​ແນນ​ນິຍົມ​ຂອງ​ປະທານາ​ທິບໍດີ​ໂອ​
ບາ​ມາ​ຕົກລົງແລະ​ອາດ​ຈະ​ກາຍ​ເປັນ​ບັນຫາ​ທ້າ​ທາຍ​ທີ່​ສຳຄັນ ​ສຳຫຼັບການ​ເລືອກ​ຕັ້ງ​ເຂົ້າຮັບ​ຕຳ​
ແໜ່​ງຕື່ມ​ອີກ​ຂອງ​ທ່ານ.

ຢູ່​ນອກ​ທຳນຽບຂາວພວກ​ນັກ​ທ່ອງ​ທ່ຽວ​ທີ່​ມາ​ຈາກ​ທົ່ວ​ປະ​ເທດ​ຕ່າງ​ກໍ​ມີ​ຄວາມ​ວິວົກກັງວົນກ່ຽວ
ກັບ​ລາຄາ​ນໍ້າມັນ​ທີ່​ພວມ​ແພງ​ຂຶ້ນ ​ແຕ່​ມີ​ຄວາມ​ເຫັນ​ແຕກ​ຕ່າງ​ກັນກ່ຽວ​ກັບ​ວ່າ ​ຈະ​ຖິ້ມໂທດ​ໃສ່​
ໃຜ.

ນັກ​ທ່ອງ​ທ່ຽວ​ຄົນ​ນຶ່ງ​ເວົ້າວ່າ “ນໍ້າມັນ​ຂ້ອນ​ຂ້າງ​ແພງ​ໃນ​ປັດຈຸບັນ ​ແລະຍ້​ອນວ່າຂ້ອຍ​
ຂັບລົດ​ຂຶ້ນມາ​ເອງ ດັ່ງນັ້ນຂ້ອຍ​ກໍ​ເສຍ​ເງິນ​ໄປ​ຫຼາຍ​ເຕີບ.”

ນັກ​ທ່ອງ​ທ່ຽວ​ອີກຄົນ​ນຶ່ງ​ຊໍ້າພັດ​ເວົ້າວ່າ “​ໃນ​ຖານະ​ທີ່​ທ່ານ​ໂອ​ບາ​ມາ ເປັນປະທານາທິ
ບໍດີ ທ່ານ​ສາມາດ​ດຳ​ເນີນ​ການ​ສິ່ງ​ໃດ​ສິ່ງ​ນຶ່ງ​ໄດ້. ຂ້ອຍ​ໝາຍຄວາມວ່າມັນ​ຕ້ອງ​ມີ​
ສິ່ງ​ໃດ​ສິ່ງ​ນຶ່ງ ​ທີ່​ທ່ານ​ສາມາດເຮັດໄດ້ ​ເພື່ອ​ຊ່ອຍ​ກ່ຽວ​ກັບ​ເລື່ອງ​ນໍ້າມັນ​.”

ສ່ວນ​ນັກ​ທ່ອງ​ທ່ຽວ​ຍິງ​ຄົນ​ນຶ່ງ​ມີ​ຄວາມ​ເຫັນ​ວ່າ “ຂ້ອຍ​ຄິດ​ວ່າ​ມັນ​ມີຫຼາຍສິ່ງ​ຫຼາຍຢ່າງ​ພົວ
ພັນ​ກັບ​ອີຣ່ານ​ແລະ​ອິສຣາ​ແອ​ລ ​ແລະ​ທຸກໆ​ຄົນ​ກໍ​ພາກັນ​ຄາດ​ຄະ​ເນ​ກັນ ​ໄປ​ຕ່າງໆ​
ນາໆ​ຢູ່​ທີ່​ນັ້ນ. ຂ້ອຍ​ບໍ່​ຄິດ​ວ່າ​ ປະ​ທາ​ນາ​ທິບໍດີ​ໂອ​ບາ​ມາມີ​ສ່ວນ​ກ່ຽວຂ້ອງເປັນ​ການ​
ສ່ວນ​ໂຕ​ໃດໆ​ກັບ​ເລື່ອງ​ນີ້.”

ປະທາ​ນາ​ທິບໍດີ​ໂອ​ບາ​ມາ​ກ່າວ​ວ່າ ພັກຣີພັບ​ບລີ​ກັນ​ພວ​ມ​ໃຊ້ບັນຫາ​ລາຄາ​ນໍ້າມັນແພງເພື່ອ
ໂຈມຕີ​ທ່ານທາງ​ການ​ເມືອງ.

ປະທານາທິບໍ​ດີ​ໂອ​ບາ​ມາ​ເວົ້າວ່າ “ບໍ່​ມີ​ຢາ​ວິ​ເສດ​ໃດໆ ​ແລະ​ຜູ້​ໃດ​ບອກ​ທ່ານ​ແຕກຕ່າງ​
ໄປ​ຈາກ​ນີ້ ​ແມ່ນຜູ້ນັ້ນບໍ່​ໄດ້​ຊອກ​ຫາຄຳຕອບ​ທີ່​ແທ້​ຈິງ. ບາງທີ​ພວກ​ເຂົາ​ເຈົ້າອາດ
ຈະພຽງ​ແຕ່ເອນ​ອຽງ​ໄປ​ຕາມຄື້ນການ​ເມືອງ​ໃນ​ຂະນະ​ນີ້ທໍ່​ນັ້ນ.”

ທ່ານ Peter Brown ຜູ້​ຢັ່ງ
ຫາງ​ສຽງ​ຂອງ​ມະຫາວິທະຍາ
ໄລ Quinnipiac ກ່າວ​ວ່າ
ນໍ້າ​ສຽງໃນທາງ​ລົບຂອງການ​
ໂຄສະນາໂຈມ​ຕີ​ກັນຢູ່​ໃນ​ການ
ເລືອກ​ຕັ້ງຂັ້ນຕົ້ນ ຂອງ​ພັກຣີ
ພັບ​ບລີກັນອາດ​ເຮັດ​ໃຫ້​ທ່ານ​
ໂອ​ບາ​ມາ​ເປັນຜູ້​ໄດ້​ປຽບ.

ທ່ານ Brown ​ເວົ້າວ່າ “ມັນ​
ອາ​ດຊ່ອຍ​ ປະທານາທິບໍ​ດີ
ທີ່ທໍາ​ອິດແມ່ນທ່ານ Ging-
rich ກັບ​ທ່ານ Romney ​
ແລະ​ບັດ​ນີ້​ແມ່ນ​ທ່ານ San-
torum ກັບ​ທ່ານ Romney
ພາກັນ​ຊື້​ເວລາ​ ໃນການ​ໂຄສະນາ​ຫາ​ສຽງທາງ​ໂທລະພາບ​ຢ່າງ​ຫຼວງຫຼາຍທຳການ​
ໂຈມ​ຕີ​ກັນ​ແລະ​ກັນ​ນັ້ນ.”

ແຕ່ທ່ານ Henry Olsen ຈາກ​ສະ​ຖາ​ບັນ​ວິ​ສາ​ຫະກິດ​ອ​າ​ເມຣິກັນຫລື American Enter-
prise Institute ກ່າວ​ວ່າ ​ຍັງ​ມີເວລາ​ອີກ​ດົນກ່ວາ​ຈະ​ຮອດ​ເດືອນ​ພະຈິກ.

ທ່ານ Olsen ​ເວົ້າວ່າ “ທ່ານ​ໂອ​ບາ​ມາພວມ​ຢູ່​ໃນ​ຂັ້ນຕອນ ​ບ່ອນ​ທີ່​ທ່ານ​ຄິດ​ວ່າ ​ມັນ
ເປັນ​ໄປ​ໄດ້​ ທີ່​ທ່ານ​ອາດ​ຈະ​ໄດ້ຖືກ​ເລືອກ​ ໃຫ້​ເຂົ້າຮັບ​ຕຳ​ແໜ່​ງຕື່ມ​ອີກ ແຕ່​ຍັງ​ບໍ່​ທັນ
ເປັນ​ທີ່​ແນ່ນອນເທື່ອ​ ທີ່​ຈະ​ໃຫ້ການ​ຄໍ້າປະກັນ​ ກ່ຽວ​ກັບ​ການ​ເຂົ້າຮັບ​ຕຳ​ແໜ່​ງຕື່ມ​ອີກ
ຂອງ​ທ່ານ. ທ່ານ​ໂອ​ບາ​ມາ​ຄວນ​ຮູ້ສຶກມີ​ຄວາມ​ດີ​ໃຈ ແຕ່​ທ່ານ​ບໍ່​ຄວນ​ທີ່​ຈະ​ຮູ້ສຶກ​ໝັ້ນ​
ໃຈ​ຈົນ​ເກີນ​ໄປ.”

ການ​ຢັ່ງ​ຫາງ​ສຽງ​ເມື່ອ​ໄວໆ​ມານີ້ ສະ​ແດງ​ໃຫ້​ເຫັນ​ວ່າ ທ່ານ​ໂອ​ບາ​ມາ​ສາມາດ​ເອົາຊະນະ​ທ່ານ
Rick Santorum ຢ່າງ​ງ່າຍດາຍຖ້າທ່ານ Santorum ຫາກໄ​ດ້ຮັບການ​ແຕ່ງຕັ້ງ​ເປັນ​ຜູ້ຕາງ
ໜ້າ​ຂອງ​ພັກ​ຣີພັບ​ບລີ​ກັນ ​ແຕ່​ກາ​ນ​ແຂ່ງຂັນ​ຈະ​ມີ​ຄະ​ແນນສຽງ​ໃກ້​ຄຽງ​ກັນຫຼາຍ ຖ້າ​ທ່ານ Mitt
Romney ຫາກໄດ້​ຮັບ​ການ​ແຕ່ງຕັ້ງ​ເປັນ​ຜູ້ສະມັກ​ເລືອກ​ຕັ້ງປະທານາທິບໍດີຂອງ​ພັກຣີພັບ​ບລີ​
ກັນໃນ​ເດືອນ​ພະຈິກ​ປີນີ້.