ຫຼັງຈາກທີ່ໄດ້ເຂົ້າຮ່ວມປະຊຸມ ກັບບັນດາຜູ້ນຳ ໃນການປະຕິບັດກົດໝາຍ ແລະ ບັນດາສະມາຊິກ ຂອງປະຊາຄົມຜິວດຳ ທີ່ມີຊື່ສຽງ ດົນເກືອບ 4 ຊົ່ວໂມງ ຢູ່ທີ່ ທຳນຽບຂາວແລ້ວ ປະທານາທິບໍດີ ບາຣັກ ໂອບາມາ ໄດ້ກ່າວວ່າ ອາເມຣິກາ ຍັງບໍ່ໃກ້ເລີຍ ທີ່ຈະປົວແປງຄວາມບໍ່ໄວ້ເນື້ອເຊື່ອໃຈ ລະຫວ່າງສອງຝ່າຍ ທີ່ໄດ້ ມີມາເປັນເວລາຫຼາຍຮ້ອຍປີແລ້ວນັ້ນ.
ທ່ານໂອບາມາ ໄດ້ກ່າວວ່າ “ພວກເຮົາຍັງບໍ່ທັນຢູ່ທີ່ນັ້ນເທື່ອ ພວກເຮົາຍັງບໍ່ ທັນໃກ້ເລີຍ ທີ່ຈະໄປເຖິງບ່ອນ ທີ່ພວກເຮົາຢາກໃຫ້ເປັນ.”
ທ່ານກ່າວຕໍ່ໄປວ່າ “ພວກເຮົາຍັງບໍ່ທັນເຖິງຈຸດທີ່ປະຊາຄົມຜິວດຳ ຮູ້ສຶກ ໝັ້ນໃຈວ່າ ທາງກົມຕຳຫຼວດຂອງພວກເຂົາເຈົ້າ ຮັບໃຊ້ພວກເຂົາເຈົ້າດ້ວຍ ກຽດສັກສີ ແລະ ຄວາມເຄົາລົບ ແລະ ຄວາມເທົ່າທຽມກັນ ແລະ ພວກເຮົາ ຍັງບໍ່ທັນໄປເຖິງຈຸດນັ້ນເທື່ອ ບ່ອນທີ່ກົມຕຳຫຼວດທັງຫຼາຍຮູ້ສຶກ ວ່າ ໄດ້ໃຫ້ ການສະໜັບສະໜູນຢ່າງພຽງພໍ ໃນທຸກໆລະດັບ.”
ຜູ້ທີ່ເຂົ້າຮ່ວມກອງປະຊຸມ ຂະໜາດໃຫຍ່ ແລະ ຫຼາກຫລາຍຈາກພາກ ສ່ວນ ຕ່າງໆ ແລກປ່ຽນຄວາມຄິດເຫັນ ຊຶ່ງກັນແລະກັນ ປະກອບດ້ວຍ ລັດຖະມົນຕີ ຍຸຕິທຳ ທ່ານນາງ Loretta Lynch ຜູ້ປົກຄອງລັດ Louisiana ທ່ານ John Bel Edwards ເຈົ້າຄອງນະຄອນ Los Angeles ທ່ານ Eric Garcetti ປະທານ ສະມາຄົມເພື່ອຄວາມກ້າວໜ້າ ສຳລັບປະຊາຊົນຜິວດຳ ແຫ່ງຊາດ ຫຼື NAACP ທ່ານ Cornell Brooks ເຈົ້າໜ້າທີ່ໆໄດ້ຮັບເລືອກອື່ນໆ ບັນດາຜູ້ບັນຊາການ ຕຳຫຼວດ ຈາກຫລາຍໆເມືອງທີ່ສຳຄັນ ບັນດານັກເຄື່ອນໄຫວ ຕາງໜ້າໃຫ້ ຂະບວນ ການ Black Lives Matter ແລະ ບັນດາຜູ້ນຳດ້ານສາສະໜາ.
ປະທານາທິບໍດີ ໄດ້ກ່າວວ່າ ທ່ານຢາກໃຫ້ນຳເອົາປະຊາຊົນເຂົ້າມາໃນຫ້ອງ ດ້ວຍທັດສະນະທີ່ແຕກຕ່າງກັນ ເພື່ອໃຫ້ໄດ້ຮັບຟັງ ຊຶ່ງກັນແລະກັນ.
ກອງປະຊຸມ ໄດ້ຮຽກຮ້ອງໃຫ້ມີຂຶ້ນ ເພື່ອສະໜອງຕອບຕໍ່ເຫດການໂຫດຮ້າຍ ຕ່າງໆ ເມື່ອສັບປະດາແລ້ວນີ້ ທີ່ເຮັດໃຫ້ຊາວອາເມຣິກັນ ກັງວົນໃຈ ແລະ ບໍ່ພໍ ອົກພໍໃຈ. ຊາຍຜິວດຳສອງຄົນ ໄດ້ຖືກຍິງຕາຍໂດຍເຈົ້າໜ້າທີ່ຕຳຫຼວດຜິວຂາວ ໃນໄລຍະເຜົາຂົນ ຢູ່ໃນລັດ Louisiana ແລະ Minnesota ຕໍ່ຈາກນັ້ນມາ ເຈົ້າ ໜ້າທີ່ຕຳຫຼວດຜິວຂາວ 5 ຄົນ ໄດ້ຖືກຍິງຕາຍ ຢູ່ທີ່ການຊຸມນຸມປະທ້ວງຕໍ່ຕ້ານ ການຍິງພວກຊາຍຜິວດຳເຫຼົ່ານັ້ນ ໂດຍມືປືນຄົນຜິວດຳ ຜູ້ທີ່ໄດ້ກ່າວວ່າ ລາວ ຢາກຂ້າພວກຄົນຜິວຂາວ.
