ປະທານາທິບໍດີສະຫະລັດ ທ່ານ Barack Obama ກ່າວວ່າ
ທ່ານໄດ້ສະເໜີຕໍ່ ນາຍົກລັດຖະມົນຕີ Belgium ກ່ຽວກັບການ
ໃຫ້ຄວາມສະໜັບສະໜູນຮອບດ້ານ ຂອງສະຫະລັດ ໃນການ
ນຳເອົາໂຕພວກກໍ່ການຮ້າຍທີ່ພົວພັນກັບການວາງແຜນ ຫລື
ໃຫ້ການຊ່ວຍເຫຼືອ ໃນການໂຈມຕີແບບໄຮ້ຈິດສຳນຶກ ຕໍ່ພວກ
ຜູ້ຊາຍ ແມ່ຍິງແລະເດັກນ້ອຍທີ່ໄຮ້ດຽງສາໃນນະຄອນ Brus-
sels ເມື່ອອາທິດທີ່ຜ່ານມານີ້ ມາລົງໂທດ.
ໃນຄຳປາໄສປະຈຳສັບປະດາຂອງທ່ານ ໃນວັນເສົາມື້ນີ້ ປະທາ
ນາທິບໍດີ Obama ກ່າວວ່າ Belgium ເປັນເພື່ອນທີ່ໃກ້ຊິດ
ແລະພັນທະມິດຂອງສະຫະລັດ ແລະ “ເວລາໃດມັນເກີດຂຶ້ນ
ແກ່ເພື່ອນມິດຂອງພວກເຮົາ ອາເມຣິກາຢູ່ເບື້ອງຫລັງເຂົາເຈົ້າໂດຍສະເພາະໃນຂະນະທີ່ພວກເຮົາສູ້ລົບກັບການທຳລາຍລ້າງຂອງພວກກໍ່ການຮ້າຍ.”
ອີງຕາມປະທານາທິບໍດີແລ້ວ ເຈົ້າໜ້າທີ່ຄະນະໜຶ່ງ ຈາກອົງການສັນຕິບານກາງຫລື FBI ຂອງສະຫະລັດ ໄດ້ໄປເຖິງປະເທດ Belgium ເປັນທີ່ຮຽຮ້ອຍແລ້ວເພື່ອໃຫ້ການສະໜັບສະໜູນການສືບສວນສອບສວນກ່ຽວກັບການໂຈມຕີກໍ່ການຮ້າຍດັ່ງກ່າວ.
ທ່ານກ່າວວ່າ “ພວກເຮົາຈະສືບຕໍ່ ຖອນຮາກຖອນເຫງົ້າ ແລະເອົາຊະນະກຸ່ມລັດ ອິສລາມຫຼື ISIL. ພວກເຮົາໄດ້ກຳຈັດຜູ້ນຳກຸ່ມ ISIL ແລະໃນອາທິດນີ້ ພວກເຮົາກໍໄດ້ສັງຫານໜຶ່ງໃນບັນດາຜູ້ນຳສູງສຸດຈາກສະໜາມລົບ.
ປະທານາທິບໍດີ Obama ກ່າວວ່າ ໃນອາທິດຈະມາເຖິງນີ້ເວລາພວກຜູ້ນຳຂອງ ໂລກຫລາຍຄົນ ມາໂຮມກັນທີ່ນະຄອນຫລວງວໍຊິງຕັນເພື່ອເຂົ້າຮ່ວມກອງປະຊຸມສຸດຍອດຄວາມໝັ້ນຄົງດ້ານນິວເຄລຍ “ພວກເຮົາຈະໃຊ້ໂອກາດດັ່ງກ່າວເພື່ອທົບທວນຄືນ ເບິ່ງການດຳເນີນຄວາມພະຍາຍາມຮ່ວມຂອງພວກເຮົາເພື່ອຕໍ່ຕ້ານກຸ່ມ ISIL ແລະເຮັດໃຫ້ເປັນທີ່ແນ່ນອນວ່າ ໂລກເຮົານີ້ຍັງສືບຕໍ່ມີຄວາມປຸ້ມລຸມສາມັກ ຄີກັນ ໃນຄວາມພະຍາຍາມເພື່ອປ້ອງກັນປະຊາຊົນຂອງພວກເຮົາ.”
