ບັນດາເຈົ້າໜ້າທີ່ສະຫະລັດກ່າວວ່າ ສະຫະລັດແລະຈີນໄດ້ຕົກລົງທີ່ຈະປະສານງານກັນໃນການຕອບໂຕ້ຕໍ່ການຍິງລູກສອນໄຟທີ່ໄດ້ກໍານົດໄວ້ຂອງເກົາຫຼີເໜືອ ທີ່ໄດ້ຄອບງໍາກອງປະຊຸມສຸດຍອດວ່າດ້ວຍຄວາມປອດໄພນີວເຄລຍ ໃນສັບປະດານີ້ທີ່ກຸງໂຊລນັ້ນ.
ຜູ້ຊ່ອຍວຽກທ່ານນຶ່ງຂອງປະທານາທິບໍດີ ບາຣັກ ໂອບາມາ ກ່າວວ່າ ທ່ານຫູຈິນເຖົາ ປະທານປະເທດຈີນ ໄດ້ສະແດງຄວາມເປັນຫ່ວງຢ່າງໜັກຂອງຈີນອອກມາ ກ່ຽວກັບແຜນການຍິງລູກສອນໄຟຂອງເກົາຫຼີເໜືອນັ້ນ ໃນການພົບປະກັນກັບທ່ານໂອບາມາໃນວັນຈັນມື້ນີ້.
ທ່ານ Ben Rhodes ຮອງທີ່ປຶກສາດ້ານຄວາມປອດໄພແຫ່ງຊາດ ໄດ້ໃຫ້ຂ່າວແກ່ບັນດາ
ນັກຂ່າວ ກ່ຽວກັບການພົບປະກັນລະຫວ່າງສອງຜູ້ນໍາວ່າ ທ່ານຫູ ໄດ້ກ່າວຕໍ່ປະທານາທິບໍ
ດີຂອງສະຫະລັດວ່າ ຈີນໄດ້ສະແດງຄວາມເປັນຫ່ວງຂອງຕົນຕໍ່ກຸງພຽງຢ້າງແລ້ວ. ທ່ານ
Rhodes ກ່າວຕື່ມວ່າ ພວກຜູ້ນໍາທັງສອງໄດ້ຕົກລັງກັນທີ່ຈະພິຈາລະນາເບິ່ງວ່າ ຄວນຈະ
ເອົາບາດກ້າວແບບໃດຕໍ່ໄປຖ້າຫາກການຍິງລູກສອນໄຟມີຂຶ້ນແທ້.
ເບິ່ງວີດີໂອກ່ຽວກັບກອງປະຊຸມລະຫວ່າງສະຫະລັດກັບຈີນ:
ໃນຖ້ອຍຖະແຫຼງເມື່ອວັນອາທິດວານນີ້ ທ່ານໂອບາມາ ໄດ້ຮຽກຮ້ອງໃຫ້ຈີນຢຸດເຊົາເຮັດຫູ
ໜວກຕາບອດໃສ່ ການທ້າທາຍດ້ານນີວເຄລຍຂອງເກົາຫຼີເໜືອນັ້ນ ແລະໃຫ້ໃຊ້ອິດທິພົນ
ຂອງຕົນຍັບຍັ້ງຄວາມໄຝ່ຝັນດ້ານນີວເຄລຍຂອງກຸງພຽງຢ້າງ. ຈີນເປັນພັນທະມິດແລະ
ເປັນຄູ່ພາຄີການຄ້າທີ່ສໍາຄັນຂອງເກົາຫຼີເໜືອນັ້ນ ແຕ່ກຸງປັກກິ່ງກ່າວວ່າ ອິດທິພົນດ້ານ
ການເມືອງຂອງຕົນທີ່ມີຕໍ່ກຸງພຽງຢ້າງນັ້ນ ແມ່ນຢູ່ໃນຂັ້ນຈໍາກັດ.
ໃນຄໍາປາໄສທີ່ມະຫາວິທະຍາໄລ Hankuk ໃນກຸງໂຊລໃນເຊົ້າວັນຈັນມື້ນີ້ ທ່ານໂອບາມາ
ໄດ້ເຕືອນກຸງພຽງຢ້າງວ່າ ເກົາຫລີເໜືອສາມາດທີ່ຈະດໍາເນີນໄປຕາມສາຍທາງທີ່ກໍາລັງ
ເດີນຢູ່ໃນປັດຈຸບັນນີ້ ແຕ່ມັນຈະນໍາໄປສູ່ຄວາມຝັນທີ່ແຕກສະຫລາຍຕື່ມອີກ ຕະຫຼອດທັງ
ການຢູ່ຢ່າງ ໂດດດ່ຽວຫລາຍຂຶ້ນ ແລະຄວາມຫ່າງໄກຫຼາຍຂຶ້ນລະຫວ່າງປະຊາຊົນເກົາຫຼີ
ເໜືອແລະກຽດສັກສີແລະໂອກາດທີ່ພວກເຂົາເຈົ້າສົມຄວນໄດ້ຮັບນັ້ນ.