ເມື່ອວັນທີ່ 9 ເດືອນມິຖຸນານີ້ ສະພາຄວາມໝັ້ນຄົງອົງການສະຫະປະຊາຊາດໄດ້ລົງຄະແນນສຽງ ເພື່ອນຳ ໃຊ້ມະຕິລົງໂທດບັ້ນໃໝ່ຕໍ່ອິຣ່ານຕື່ມອີກ ໂດຍມີ 12 ປະເທດໃນຈຳນວນທັງໝົດ 15 ປະເທດສະມາຊິກ ຂອງສະພາຄວາມໝັ້ນຄົງ ອັນມີ ສະຫະລັດ ຈີນ ຣັດເຊຍ ອັງກິດ ຝຣັ່ງ ໄນຈີເຣຍ ແມ໊ກຊິໂກ ຍີ່ປຸ່ນ ບອສເນຍ ອອສເຕຣຍ ຢູກັນດາ ແລະກາບົງ ລົງຄະແນນສຽງເຫັນດີນຳມະຕິຊຸດໃໝ່ດັ່ງກ່າວ.
ປະທານາທິບໍດີ ບາຣັກ ໂອບາມາ ກ່າວວ່າມະຕິໃໝ່ທີ່ມີການຮັບຜ່ານເອົານີ້ ແມ່ນນຳໃຊ້ການລົງໂທດ ທີ່ໜັກໜ່ວງທີ່ສຸດ ຕໍ່ລັດຖະບານອິຣ່ານ ແຕ່ທ່ານກ່າວເນ້ນວ່າ ການລົງໂທດອິຣ່ານຄັ້ງນີ້ ບໍ່ໄດ້ແນເປົ້າໝາຍໃສ່ປະຊາຊົນອິຣ່ານ ໂດຍກົງແຕ່ຢ່າງໃດຊຶ່ງທ່ານກ່າວວ່າ:
“ການລົງໂທດເຫລົ່ານີ້ຈະວາງຂໍ້ຈຳກັດຫລາຍຢ່າງ ຕໍ່ການເຄື່ອນໄຫວດ້ານນີວເຄລຍຕ່າງໆຂອງອິຣ່ານ ຕໍ່ໂຄງການລູກສອນໄຟນຳວິຖີ ແລະເປັນເທື່ອທຳອິດ ຕໍ່ກອງກຳລັງທຳມະດາຂອງອິຣ່ານນຳ.”
ປະທານາທິບໍດີ ໂອບາມາ ກ່າວຕໍ່ໄປວ່າ ນອກນັ້ນການລົງໂທດໃໝ່ນີ້ ຍັງໄດ້ຈັດຕັ້ງໂຄງຮ່າງປະຕິບັດການຊຸດໃໝ່ຂຶ້ນມາ ເພື່ອຢຸດການລັກລອບຂອງອິຣ່ານ ແລະເພື່ອປາບປາມທະນາຄານອິຣ່ານ ແລະທຸລະກຳດ້ານການເງິນຕ່າງໆຂອງອິຣ່ານ
“ການລົງໂທດດັ່ງກ່າວ ແນເປົ້າໝາຍໃສ່ພວກບຸກຄົນ ບໍລິສັດ ແລະສະຖາບັນຕ່າງໆ ຮວມທັງພວກທ່ີພົວ ພັນກັບໜ່ວຍພິທັກການປະຕິວັດ ທ່ີ ໄດ້ສະໜັບສະໜຸນໂຄງການນິວເຄລຍຂອງອິຣ່ານ ແລະໄດ້ຮັບຄວາມອຸດົມຮ່ັງມີຂຶ້ນ ຈາກການດຳເນີນ ກິດຈະກຳທ່ີຜິດກົດໝາຍ ບົນຄວາມ ເສຍຫາຍຂອງປະຊາຊົນອິຣ່ານ. ແລະພວກເຮົາຈະເຮັດໃຫ້ແນ່ໃຈວ່າ ການລົງໂທດເຫລົ່ານີ້ຈະໄດ້ຮັບການປະຕິບັດຕາມຢ່າງແຂງຂັນ ໃນຂະນະທີ່ພວກເຮົາສືບຕໍ່ ປະຕິບັດແລະປັບປຸງໃຫ້ດີຂຶ້ນ ມາດຕາການລົງໂທດຂອງພວກເຮົາເອງ ຕໍ່ອິຣ່ານ ຄຽງບ່າຄຽງໄຫລ່ກັບພວກເພື່ອນມິດ ແລະພັນທະມິດຂອງພວກເຮົາ.”
ໂດຍອ້າງເຖິງຄວາມພະຍາຍາມຂອງທ່ານ ໃນການຍື່ນມືໄປຫາອິຣ່ານ ໃນລະຍະ 16 ເດືອນຜ່ານມານີ້ ປະທານາທິບໍດີໂອບາມາກ່າວວ່າ ຄວາມຈຳ ເປັນທີ່ຈະຕ້ອງທຳການລົງໂທດອິຣ່ານຄັ້ງໃໝ່ນີ້ ບໍ່ແມ່ນວ່າ ຫລີກລ່ຽງບໍ່ໄດ້. ຄືສະຫະລັດແລະບັນດາປະເທດພັນທະມິດໄດ້ສະເໜີໃຫ້ໂອກາດແກ່ ອິຣ່ານ ສ້າງຄວາມ ສຳພັນທີ່ດີກວ່າເກົ່າກັບປະຊາຄົມນາໆຊາດ ທີ່ອາດສາມາດຫລຸດຜ່ອນການຖືກໂດດດ່ຽວຂອງອິຣ່ານນັ້ນລົງ ແລະເພີ່ມທະວີ ການເຂົ້າມາຮ່ວມກັບປະຊາຄົມໂລກໃນດ້ານເສດຖະກິດໃຫ້ຫລາຍຂື້ນ ແຕ່ມີເງື່ອນໄຂວ່າ ອິຣ່ານຕ້ອງປະຕິບັດຕາມພັນທະໜ້າທີ່ໃນການບໍ່ຂະຫຍາຍ ໂຄງການນີວເຄລຍຂອງຕົນນັ້ນ. ປະທານາທິບໍດີ ໂອບາມາກ່າວຕໍ່ໄປວ່າ ແຕ່ວ່າ ຄັ້ງແລ້ວຄັ້ງເລົ່າ ລັດຖະບານອິຣ່ານກໍຍັງບໍ່ຍອມປະຕິບັດຕາມ ຄວາມຮັບຜິດຊອບຂອງຕົນ. ທ່ານໂອບາມາຊີ້ແຈງຕື່ມວ່າ
“ອິຣ່ານໄດ້ປົກປິດສະຖານທີ່ເສີມສະມັດຕະພາບດ້ານນິວເຄລຍຂອງຕົນທ່ີເມືອງ Qom ທ່ີພາໃຫ້ມີການຕັ້ງຄຳຖາມຂຶ້ນມາຢ່າງຈິງຈັງ ກ່ຽວກັບລັກສະນະທາດແທ້ຂອງໂຄງການນິວເຄລຍຂອງອິຣ່ານນັ້ນ. ນອກນີ້ ອິຣ່ານຍັງໄດ້ລະເມີດພັນທະຂອງຕົນເອງພາຍໃຕ້ມະຕິຂອງສະພາຄວາມໝັ້ນຄົງສະຫະປະຊາດ ທີ່ວ່າຈະງົດການເສີມສະມັດຕະພາບທາດຢູເຣນຽມຂອງຕົນນັ້ນ. ແທນທີ່ຈະດຳເນີນການດັ່ງກ່າວ ອິຣ່ານກັບໄດ້ຍົກລະດັບຄຸນນະພາບຂອງທາດຢູເຣນຽມ ຂຶ້ນເຖິງ 20 ເປີເຊັນ. ອິຣ່ານບໍ່ເຄີຍໄດ້ປະຕິບັດໂດຍເຕັມ ຕາມຂໍ້ບັງຄັບຕ່າງໆຂອງອົງການພະລັງປະຣະມະນູສາກົນ. ແນ່ນອນ ອິຣ່ານເປັນພາຄີໃນສົນທິສັນຍາ ຫ້າມເຜີຍແຜ່ນິວເຄລຍ ປະເທດດຽວໃນໂລກ - ປະເທດດຽວແທ້ໆ ທີ່ບໍ່ສາມາດເກ້ຍກ່ອມເຮັດໃຫ້ອົງການພະລັງປາລະມະນູສາກົນ ຫລື IAEA ໝັ້ນໃຈວ່າ ໂຄງການນີວເຄລຍຂອງຕົນ ແມ່ນເພື່ອເຫດຜົນທາງສັນຕິນັ້ນ.”
ປະທານາທິບໍດີໂອບາມາ ກ່າວສະຫລຸບວ່າ “ດ້ວຍເຫດນີ້ ປະຊາຄົມນາ ນາຊາດຈຶ່ງຈຳເປັນຕ້ອງໄດ້ນຳໃຊ້ ຜົນຮັບທີ່ຮຸນແຮງດັ່ງກ່າວນັ້ນ ຊຶ່ງການລົງໂທດເຫລົ່ານັ້ນ ແມ່ນສະທ້ອນເຖິງທັດສະນະຄວາມເຫັນທີ່ພ້ອມ ພຽງເປັນອັນນຶ່ງອັນດຽວກັນຂອງປະຊາຄົມນາໆຊາດ ທີ່ວ່າການແຂ່ງ ຂັນກັນດ້ານອາວຸດນີວເຄລຍໃນຂົງ ເຂດຕາເວັ ອອກກາງນັ້ນ ບໍ່ໄດ້ຢູ່ໃນຜົນປະໂຫຍດຂອງຜູ້ໃດທັງສິ້ນ ແລະພວກປະເທດທີ່ທ້າທາຍຕໍ່ການ ການຫ້າມແຜ່ຜາຍນິວເຄລຍຂອງໂລກນັ້ນແມ່ນຈະຕ້ອງຮັບຜິດຊອບ.
