ປະທານາທິບໍດີ ບາຣັກ ໂອບາມາ ແຫ່ງສະຫະລັດ ກ່າວວ່າ
ພວກນັກເຈລະຈາອາເມຣິກັນ ແລະອີຣ່ານ ໄດ້ມີຄວາມເຫັນ
ແຕກຕ່າງກັນໜ້ອຍລົງ ກ່ຽວກັບໂຄງການນີວເຄລຍຂອງອີ
ຣ່ານທີ່ຖືກສົງໄສວ່າ ມີເປົ້າໝາຍເພື່ອຈະຜະລິດອາວຸດນັ້ນ
ແຕ່ກໍກ່າວວ່າ ທ່ານຕຽມພ້ອມທີ່ຈະຍຸດຕິການເຈລະຈາກັນ
ຖ້າບໍ່ສາມາດບັນລຸຂໍ້ຕົກລົງທີ່ທັງສອງຝ່າຍຮັບເອົາໄດ້ນັ້ນ.
ທ່ານໂອບາມາກ່າວເຊັ່ນນີ້ ຢູ່ໃນການໃຫ້ສຳພາດທີ່ບັນທຶກພາບ
ໄວ້ກ່ອນ ແລະນຳອອກອາກາດທາງຊ່ອງ CBS ໃນວັນອາທິດ
ວານນີ້. ທ່ານກ່າວວ່າ ຂໍ້ຕົກລົງກັນໃດໆຈະຕ້ອງໃຫ້ພວກນັກ
ກວດກາຝ່າຍຕາເວັນຕົກໄປພິສູດເບິ່ງໄດ້ ວ່າເຕຫະຣ່ານບໍ່ດຳ
ເນີນການເພື່ອພັດທະນາອາວຸດນີວເຄລຍ.
ວັນເປົ້າໝາຍສຳຫລັບໃຫ້ບັນລຸຂໍ້ຕົກລົງກັນ ແມ່ນທ້າຍເດືອນນີ້. ທ່ານໂອບາມາ ທີ່ບັນທຶກ
ວີດີໂອ ການໃຫ້ສຳພາດໃນວັນເສົາຜ່ານມາ ກ່າວວ່າ “ຖ້າບໍ່ບັນລຸຂໍ້ຕົກລົງກັນ ພວກເຮົາ
ກໍຈະຍ່າງໜີ.”
ຕໍ່ມາ ໃນລາຍການ “Face the Nation” ນາຍົກລັດຖະມົນຕີອິສຣາແອລ ທ່ານ Benjamin
Netanyahu ກ່າວວ່າ ທ່ານ ແລະທ່ານໂອບາມາ “ມີເປົ້າໝາຍອັນດຽວກັນ" ກໍຄື ປ້ອງ
ກັນບໍ່ໃຫ້ອີຣ່ານ ພັດທະນາອາວຸດນີວເຄລຍ ແລະກ່າວຕໍ່ໄປວ່າ “ແຕ່ພວກເຮົາບໍ່ເຫັນ
ພ້ອມນຳກັນ ກ່ຽວກັບວິທີປ້ອງກັນນັ້ນ.”
ອີຣ່ານໄດ້ຢືນຢັດຢູ່ຕະຫຼອດມາ ວ່າໂຄງການນີວເຄລຍຂອງຕົນ ແມ່ນມີເປົ້າໝາຍໃນທາງສັນຕິ ແລະຈຳກັດໃສ່ແຕ່ການພັດທະນາພະລັງງານ ສຳລັບໃຊ້ໃນດ້ານພົນລະເຮືອນເທົ່ານັ້ນ.
