ປະທານາທິບໍດີບາຣັກ ໂອບາມາແຫ່ງສະຫະລັດກ່າວວ່າ ສະຫະລັດໄດ້ເຂົ້າຮ່ວມການໂຈມຕີທາງທະຫານຂອງພວກປະເທດຝ່າຍຕາເວັນຕົກຕໍ່ຕ້ານທ່ານກາດດາຟີ ຜູ້ນໍາລີເບຍ ເພື່ອຢຸດການສັງຫານໝູ່ປະຊາຊົນ ແລະຍຸດຕິການປາບປາມປະຊາຊົນລີເບຍຢ່າງໂຫດຫ້ຽມນັ້ນ.
ໃນຄໍາປາໄສທີ່ຖ່າຍທອດທາງໂທລະພາບໄປຍັງທົ່ວປະເທດໃນແລງວັນຈັນວານນີ້ ທ່ານໂອບາມາ ກ່າວວ່າ ສະຫະລັດຕ້ອງທໍາການເຄື່ອນໄຫວເວລາໃດຜົນປະໂຫຍດແລະຄ່ານິຍົມຂອງຕົນຖືກຂົ່ມຂູ່.
ປະທານາທິບໍດີຄາດວ່າ ຈະເນ້ນໜັກເຖິງເຫດຜົນຂອງທ່ານສໍາລັບການປະກອບສ່ວນຂອງ
ສະຫະລັດໃນຄວາມພະຍາຍາມທາງທະຫານໃນການໃຫ້ສໍາພາດກັບພວກຕາໜ່າງໂທລະ
ພາບໃຫຍ່ທັງ 3 ຊ່ອງຂອງສະຫະລັດໃນວັນອັງຄານມື້ນີ້.
ໃນຄໍາປາໄສຂອງທ່ານນັ້ນ ທ່ານໂອບາມາກ່າວວ່າ ບໍ່ມີຄໍາຖາມໃດໆວ່າ ລີເບຍແລະໂລກທັງປວງຈະດີຂຶ້ນຖ້າທ່ານກາດດາຟີຕົກຈາກອໍານາດໄປ. ແຕ່ທ່ານກ່າວຕໍ່ໄປວ່າ ການຂະຫຍາຍການປະຕິບັດງານທາງທະຫານ ທີ່ໄດ້ຮັບອະນຸມັດຈາກສະຫະປະຊາຊາດອອກໄປຕື່ມອີກ ທີ່ຮວມທັງການປ່ຽນແປງອໍານາດປົກຄອງໃນລີເບຍຈະເປັນຄວາມຜິດພາດ.
ຄໍາປາໄສຂອງທ່ານໂອບາມານີ້ແມ່ນມີວັດຖຸປະສົງເພື່ອແກ້ບັນຫາຄວາມເປັນຫ່ວງຕ່າງໆຂອງ
ພວກສະມາຊິກລັດຖະສະພາສະຫະລັດແລະໃນແຫ່ງອື່ນໆທີ່ໄດ້ຕໍາໜິຕິຕຽນທ່ານໂອບາມາວ່າ
ບໍ່ໄດ້ໃຫ້ຄວາມຈະແຈ້ງກ່ຽວກັບເປົ້າໝາຍຂອງສະຫະລັດກ່ອນຈະເອົາກໍາລັງຂອງສະຫະລັດ
ເຂົ້າໄປພົວພັນໃນການໂຈມຕີທາງອາກາດທີ່ມີວັດຖຸປະສົງເພື່ອຈັດຕັ້ງປະຕິບັດເຂດຫ້າມບິນ
ເໜືອລີເບຍນັ້ນ.
