ປະທານາທິບໍດີໂອບາມາໄດ້ຕັ້ງໃຈໃຊ້ຄໍາປາໄສຂອງທ່ານ ຍົກເດີມພັນຂຶ້ນຢ່າງຫລວງຫລາຍ ໃນການຕໍ່ສູ້ຂອງທ່ານກັບພັກຣີພັບບລິກັນ ກ່ຽວກັບວິທີການແກ້ໄຂບັນຫາການຫວ່າງງານທີ່ ຍັງດື້ດຶງຢູ່ໃນອັດຕາ 9.1 ຢ່າງບໍ່ມີທ່າທີວ່າຈະລຸດລົງເລີຍນັ້ນ ແລະສືບຕໍ່ສ້ອມແປງບັນຫາການຂາດດຸນງົບປະມານ ຂອງປະເທດຊາດຕໍ່ໄປ.
ໂດຍການເລ່ງລັດຈາກພັກເດໂມແຄຣທຂອງທ່ານເອງ ໃຫ້ນໍາສະເໜີຂໍ້ສະເໜີທີ່ໃຫຍ່ໂຕທີ່
ສຸດເທົ່າທີ່ສາມາດເຮັດໄດ້ນັ້ນ ທ່ານໂອບາມາໄດ້ເປີດເຜີຍຮ່າງກົດໝາຍຊຸດນຶ່ງ ທີ່ມີມູນຄ່າ
ປະມານ 450 ພັນລ້ານ ຫລື 450 ຕື້ໂດລາ ທີ່ີໂຮມທັງການຕໍ່ອາຍຸການຕັດພາສີເງິນ
ເດືອນສໍາລັບພວກຄົນງານແລະນາຍຈ້າງ ແລະໃຫ້ສິນນໍ້າໃຈໃຫ້ແກ່ພວກທຸລະກິດ ເພື່ອໃຫ້ ເຂົາເຈົ້າວ່າຈ້າງຄົນງານ.
ສໍາລັບຮ່າງກົດໝາຍໃຊ້ຈ່າຍເງິນນັ້ນ ທ່ານໂອບາມາໄດ້ສະເໜີອັນທີ່ທ່ານເອີ້ນວ່າ ກົດໝາຍວ່າດ້ວຍວຽກງານຂອງອາເມຣິກາ ຊຶ່ງຈະຖືກນໍາໄປພິຈາລະນາ ແລະລົງມະຕິ ໂດຍສະພາຕໍ່າທີ່ຄວບຄຸມໂດຍພັກຣີພັບບລິກັນນັ້ນ ກ່ອນ.
ທ່ານໂອບາມາກ່າວວ່າ ຮ່າງກົດໝາຍທີ່ວ່ານີ້ ຈະຊ່ວຍກະຕຸກຊຸກຍູ້ເສດຖະກິດທີ່ບໍ່ໄປບໍ່ມາທາງໃດ ຢູ່ໃນເວລານີ້. ທ່ານໂອບາມາກ່າວວ່າ
“ຂ້າພະເຈົ້າກໍາລັງສົ່ງແຜນການນຶ່ງໄປຍັງສະພາຄອງແກຣສ ຊື່ງພວກທ່ານຄວນ
ຈະໃຫ້ການອະນຸມັດໂດຍທັນທີ. ແຜນການນີ້ເອີ້ນວ່າ ກົດໝາຍວ່າດ້ວຍວຽກງານ
ຂອງອາເມຣິກາ. ມັນບໍ່ໜ້າຈະມີຂໍ້ໂຕ້ແຍ້ງກັນໃດໆ ກ່ຽວກັບກົດໝາຍສະບັບນີ້.
ທຸກສິງທຸກຢ່າງຢູ່ໃນແຜນການນີ້ ກໍແມ່ນຂໍ້ສະເໜີທີ່ຄ້າຍຄືກັນກັບອັນທີ່ໄດ້ຮັບການ
ສະໜັບສະໜຸນ ມາແລ້ວ ຈາກທັງຝ່າຍເດໂມແຄຣທແລະຣີພັບບລິກັນ ໂຮມທັງ
ຫລາຍໆຄົນທີ່ນັ່ງຟັງຢູ່ທີ່ນີ້ໃນຄໍ່າຄືນນີ້. ແລະທຸກສິ່ງທຸກຢ່າງຢູ່ໃນຮ່າງກົດໝາຍ
ສະບັບນີ້ ແມ່ນຈະມີເງິນໃຊ້ຈ່າຍ. ທຸກໆສິ່ງເລີຍ.”
ຄໍາປາໄສຂອງທ່ານໂອບາມາ ມີຂຶ້ນຫລັງຈາກການຕໍ່ສູ້ກັນດ້ານການເມືອງອັນແສນລໍາບາກ
ມາໄດ້ຫລາຍເດືອນແລ້ວ ກັບຝ່າຍຣີພັບບລິກັນ ກ່ຽວກັບວິທີການລົດການຂາດດຸນງົບປະ
ມານຂອງລັດຖະບານລົງ ແລະລົດໜີ້ສິນຂອງຊາດ ຈໍານວນ 14 ພັນຕື້ໂດລານັ້ນ.
ການປານີປານອມກັນໃນເດືອນກໍລະກົດຜ່ານມາ ໄດ້ອໍານວຍໃຫ້ມີການຕັດການໃຊ້ຈ່າຍລົງ
1 ພັນຕື້ໂດລາ ທີ່ພົວພັນກັບການເພີ່ມລະດັບເພດານໜີ້ສິນຂອງຊາດຂຶ້ນ ແຕ່ຂະນະດຽວ
ກັນ ກໍໄດ້ນໍາໄປສູ່ການຖືກລົດລະດັບຄວາມໜ້າເຊື່ອຖືດ້ານສິນເຊື່ອຂອງລັດຖະບານລົງ ທີ່
ໄດ້ສ້າງຄວາມເສຍຫາຍຢ່າງຮ້າຍແຮງ.
ທ່ານໂອບາມາໄດ້ເນ້ນຢໍ້າເປັນພິເສດ ເຖິງ
ຄວາມສໍາຄັນຂອງການສະໜັບສະໜຸນທີ່
ເຄີຍໄດ້ຮັບໃນຜ່ານມາ ຈາກທັງສອງພັກ
ການເມືອງສໍາລັບຂໍ້ສະເໜີຕ່າງໆໃນແຜນ
ການສ້າງໜ້າວຽກຂອງທ່ານນັ້ນ ແລະທ່ານ
ຮຽກຮ້ອງໃຫ້ທັງຝ່າຍເດໂມແຄຣທ ແລະຣີ
ພັບບລິກັນ ຈົ່ງຍຸຕິການທໍາສົງຄາມການ
ເມືອງກັນ ເພື່ອນໍາເອົາປະຊາຊົນກັບຄືນໄປ
ທໍາງານ ສ້າງລາຍໄດ້ ແລະນໍາເອົາເສດຖະ
ກິດກັບຄືນມາເຂົ້າຮູບເຂົ້າຮອຍ. ທ່ານໂອ ບາມາກ່າວວ່າ:
“ປະຊາຊົນຂອງປະເທດນີ້ ພາກັນທໍາ
ງານໜັກເພື່ອໃຫ້ປະຕິບັດຄວາມຮັບ
ຜິດຊອບຕ່າງໆຂອງພວກເຂົາເຈົ້າໄດ້.
ຄໍາຖາມໃນຄໍ່າຄືນນີ້ ກໍແມ່ນວ່າພວກ
ເຮົາເດ້ ຈະປະຕິບັດຄວາມຮັບຜິດຊອບ
ຂອງພວກເຮົາໄດ້ຫລືບໍ່? ຄໍາຖາມກໍຄືວ່າ ຕໍ່ໜ້າວິກິດການຂອງຊາດ ທີ່ມີຢູ່ໃນ
ເວລານີ້ ພວກເຮົາຈະສາມາດຢຸດການຫລິ້ນລະຄອນສັດການເມືອງນີ້ໄດ້ບໍ່?ແລະ
ຫັນມາເຮັດສິ່ງໃດສິ່ງນຶ່ງຢ່າງແທ້ຈິງເພື່ອຊ່ວຍເສດຖະກິດໄດ້ຫລືບໍ່?ພວກເຮົາຈະ
ສາມາດກອບກູ້ເອົາຄວາມຍຸຕິທໍາແລະຄວາມໝັ້ນຄົງ ທີ່ໄດ້ກໍານົດປະເທດນີ້ ມາຕັ້ງ
ແຕ່ຕອນເລິ່ມຕົ້ນຂອງພວກເຮົານັ້ນ ກັບຄືນມາ ໃນລະດັບໃດ ລະດັບນຶ່ງ ໄດ້ຫລືບໍ່?”
ພາກສ່ວນທີ່ສໍາຄັນຕ່າງໆຂອງແຜນການຂອງທ່ານໂອບາມ ແມ່ນໂຮມທັງຂໍ້ສະເໜີໃຫ້ສ້າງ
ສາຄືນໃໝ່ແລະປັບປຸງໃຫ້ທັນສະໄໝຂຶ້ນ ໂຄງລ່າງພື້ນຖານແລະໂຮງຮຽນຕ່າງໆຂອງສະຫະ
ລັດ ໃຫ້ການຊ່ວຍເຫລືອດ້ານການເງິນແກ່ບັນດາລັດແລະລັດຖະບານທ້ອງຖິ່ນ ທີ່ຂາດເງິນ
ໃຫ້ການເຝິກອົບລົມດ້ານວຽກງານ ເພື່ອຊ່ວຍເຫລືອພວກທີ່ຫວ່າງງານມາເປັນເວລາດົນນານ
ແລະເອົາບາດກ້າວຕ່າງໆ ເພື່ອຊຸກຍູ້ໃຫ້ມີການວ່າຈ້າງພວກນັກລົບເກົ່າ.
ທ່ານໂອບາມາກ່າວວ່າ ບັນດາຊາວອາເມຣິກັນທີ່ຮັ່ງມີ ແລະພວກບໍລິສັດໃຫຍ່ໆທັງຫລາຍ
ຄວນຈະໄດ້ໃຊ້ຈ່າຍເງິນເພີ່ມຂຶ້ນ ຜ່ານການລົບລ້າງຊ່ອງຫວ່າງດ້ານພາສີນັ້ນ ແລະໄດ້ກ່າວ
ຍໍ້າຄໍາຮຽກຮ້ອງຂອງທ່ານ ໃຫ້ມີການຮັບຜ່ານແຜນການທີ່ມີຄວາມສົມດຸນ ທີ່ຈະຮວມເອົາ
ການປັບປຸງແບບພໍປານກາງ ພວກໂຄງການຮັກສາສຸຂະພາບ ທີ່ແພງຫລາຍຂອງລັດຖະ ບານນັ້ນ.
ປະທານາທິບໍດີໂອບາມາຍັງມີແຜນ ຈະສົ່ງແຜນການທີ່ໃຫຍ່ໂຕກວ່ານັ້ນ ໄປຍັງລັດຖະສະ
ພາ ໃນອີກສິບມື້ ທີ່ຈະໂຮມທັງຄ່າໃຊ້ຈ່າຍຂອງຂໍ້ສະເໜີກ່ຽວກັບວຽກງານຂອງທ່ານ ແລະ
ບາດກ້າວຕ່າງໆເພື່ອສ້າງຄວາມທຸ່ນທຽງໃນໄລຍະຍາວ ໃຫ້ແກ່ໜີ້ສິນຂອງສະຫະລັດ.
ແລະທ່ານໂອບາມາຂໍຮ້ອງໃຫ້ຄະນະກໍາມະການງົບປະມານຂອງສະພາ ທີ່ປະກອບດ້ວຍ
ສະມາຊິກຈາກທັງສອງພັກ ທີ່ຖືກສ້າງຕັ້ງຂຶ້ນມາໂດຍຂໍ້ຕົກລົງກັນ ເລື່ອງໜີ້ສິນແລະການ
ຂາດດຸນງົບປະມານນັ້ນ ໃຫ້ຊອກຫາຊ່ອງທາງປະຢັດເພີ່ມຕື່ມ ໃຫ້ໄດ້ຫລາຍກວ່າຈໍານວນ
1500 ຕື້ໂດລາ ທີ່ໄດ້ຮັບມອບໝາຍໃຫ້ເຮັດນັ້ນ.
ໃນການສະແດງປະຕິກິລິຍາຕອບໃນເບຶ້ອງ
ຕົ້ນນັ້ນ ໂຄສົກສະພາຕໍ່າ ຈອນ ເບເນີ
ຈາກພັກຣີພັບບລິກັນ ກ່າວວ່າ ຂໍ້ສະເໜີ
ຂອງທ່ານໂອບາມາມີຫລາຍຢ່າງດີໆ ທີ່
ສົມຄວນທີ່ຈະໄດ້ຮັບການພິຈາລະນາ
ແຕ່ທ່ານກ່າວຕື່ມວ່າ ທ່ານຫວັງວ່າ ທ່ານ
ປະທານາທິບໍດີຈະໃຫ້ການພິຈາລະນາແກ່
ຂໍ້ສະເໜີຂອງຝ່າຍຣີພັບບລິກັນຢ່າງເອົາ
ຈິງເອົາຈັງເຊ່ນກັນ. ພວກຣີພັບບລິກັນ
ຄົນອື່ນໆມີຄວາມເຫັນທີ່ຮຸນແຮງກວ່ານັ້ນ.
ສະມາຊິກສະພາສູງ ທ່ານ ອໍຣິນ ແຮັຈ
ໄດ້ສະແດງຄວາມບໍ່ແນ່ໃຈ ແຕ່ກໍກ່າວວ່າ
ທ່ານຈະລໍຖ້າເບິ່ງລາຍລະອຽດຂອງແຜນ
ການດັ່ງກ່າວເສຍກ່ອນ. ທ່ານ Hatch ກ່າວວ່າ:
“ຂ້າພະເຈົ້າຈະສຶກສາເບິ່ງໃຫ້ຄັກແນ່ ແລະກໍຫວັງວ່າ ຈະໃຫ້ການສະໜັບສະໜຸນ
ປະທານາທິບໍດີໄດ້ ແຕ່ໃນເວລານີ້ ເບິ່ງຄືວ່າ ຍັງຢູ່ໃນສະພາບເກົ່າຫລາຍກວ່າ.”
ຄວາມເຫັນຈາກພວກຜູ້ນໍາສໍາຄັນຂອງຝ່າຍເດໂມແຄຣທ ແມ່ນຍ້ອງຍໍສັນລະເສີນປະທານາທິ
ບໍດີ ໂດຍກ່າວວ່າ ທ່ານໂອບາມາໄດ້ນໍາສະເໜີຂໍ້ສະເໜີທີ່ສົມເຫດສົມຜົນ ເພື່ອແກ້ໄຂບັນຫາ
ການຫວ່າງງານ ຊຶ່ງງົບປະມານຂອງຂໍ້ສະເໜີເຫລົ່ານັ້ນ ແມ່ນຈະເປັນພາກສ່ວນນຶ່ງຂອງ
ຄວາມພະຍາຍາມ ໃນຂອບເຂດທີ່ກ້ວາງຂວາງກ່ວາ ເພື່ອລົດຜ່ອນໜີ້ສິນ ແລະການຂາດດຸ ງົບປະມານລົງນັ້ນ.
ປະທານາທິບໍດີໂອບາມາ ກ່າວມ້ວນທ້າຍວ່າ ທ່ານຈະທໍາການເດີນທາງໃນໄລຍະຫລາຍໆ
ອາທິດຕໍ່ໜ້ານີ້ ເພື່ອປຸກລະດົມເອົາການສະໜັບສະໜຸນຈາກມະຫາຊົນ ສໍາລັບຂໍ້ສະເໜີກ່ຽວ
ກັບວຽກງານຂອງທ່ານ ແລະຮຽກຮ້ອງໃຫ້ຊາວອາເມຣິກັນ ບອກສະພາຄອງແກຣສວ່າ
ການບໍ່ເຮັດບໍ່ທໍາຫຍັງເລີຍນັ້ນ ບໍ່ແມ່ນທາງເລືອກ.
