ຝົນຕົກບໍ່ໄດ້ເຮັດໃຫ້ຄວາມຕື່ນເຕັ້ນຈືດຈາງໄປສຳລັບການຢ້ຽມ
ຢາມຄັ້ງປະຫວັດສາດຂອງປະທານາທິບໍດີບາຣັກ ໂອບາມາ ທີ່
ອິນເດຍ ໃນຂະນະທີ່ພວກທະຫານ ຫຼາຍພັນຄົນເຂົ້າປະກອບ
ສ່ວນໃນການເດີນສວນສະໜາມຢ່າງຄຶກຄື້ນໃນວັນຈັມມື້ນີ້ ບ່ອນ
ທີ່ທ່ານໂອບາມາ ໄດ້ເປັນແຂກຮັບເຊີນທີ່ມີກຽດໄປຮ່ວມນຳນັ້ນ.
ທ່ານໂອບາມາເປັນປະທານາທິບໍດີສະຫະລັດຄົນທຳອິດ ທີ່ໄປ
ຮ່ວມວັນສະຫຼອງກົດໝາຍລັດຖະທຳມະນູນສະບັບທຳອິດຂອງ
ອິນເດຍ ໃນຖານະເປັນປະເທດເອກກະລາດ ທີ່ມີຜົນບັງຄັບໃຊ້
ມາຕັ້ງແຕ່ວັນທີ 26 ມັງກອນ ປີ 1950 ເປັນຕົ້ນມາ.
ການສວນສະໜາມ ວັນສາທາລະນະລັດ ທີ່ນິວເດລີ
ປະທານາທິບໍດີສະຫະລັດ ໄດ້ໃຊ້ເວລາມື້ທຳອິດໃນການຢ້ຽມຢາມເປັນເວລາ 3 ມື້ ຂອງ
ທ່ານ ໃນວັນອາທິດວານນີ້ ເພື່ອຜູກສາຍພົວພັນກັບນາຍົກ Narendra Modi ແຫ່ງອິນເດຍ ແລະ ບັນລຸຂໍ້ຕົກລົງກັນຫຼາຍສະບັບ.
ທ່ານ ໂອບາມາ ແລະທ່ານໂມດີ ໄດ້ປະກາດໃຫ້ຮູ້ວ່າ ພວກທ່ານໄດ້
"ບັນລຸ" ຂໍ້ຕົກລົງດ້ານພະລັງນີວເຄລຍ ທີ່ໄດ້ຕົກຢູ່ໃນ ສະພາບບໍ່
ໄປບໍ່ມາ ມາເປັນເວລາດົນນານນັ້ນ.
ສະຫະລັດ ໄດ້ລົງນາມໃນຂໍ້ຕົກລົງກັບອິນເດຍໃນປີ 2008 ທີ່ຈະ
ອະນຸມັດດ້ານເທັກໂນໂລຈີນີວເຄລຍທີ່ໃຊ້ທາງພົນລະເຮືອນ .
ແຕ່ການຈັດຕັ້ງປະຕິບັດ ຂໍ້ຕົກລົງດັ່ງກ່າວໄດ້ຊັກຊ້າມາ ກ່ຽວກັບ
ກົດໝາຍຂອງອິນເດຍສະບັບນຶ່ງ ທີ່ຈະເຮັດໃຫ້ພວກບໍລິສັດຕ່າງໆ
ທີ່ກໍ່ສ້າງ ແລະສະໜອງອຸບປະກອນເປັນຜູ້ຮັບຜິດຊອບໃນກໍລະນີ
ທີ່ເກີດອຸບັດເຫດຂຶ້ນນັ້ນ.
ທັງສອງ ຝ່າຍໄດ້ຕົກລົງກັນໃນວັນອາທິດວານນີ້ ເພື່ອຈັດຕັ້ງເງິນປະກັນໄພມູນຄ່າຫຼາຍພັນລ້ານດອນລາຂຶ້ນ ທີ່ບໍ່ບັງຄັບໃຫ້ອິນເດຍຈຳເປັນຕ້ອງປ່ຽນກົດໝາຍຂອງຕົນ.
ລາຍລະອຽດຂອງຂໍ້ຕົກລົງກັນນີ້ ຍັງບໍ່ທັນແຈ້ງຂາວເທື່ອ ແຕ່ປະທານາທິບໍດີໂອບາມາ ເອີ້ນຂໍ້ຕົກລົງກັນໃນວັນອາທິດວານນີ້ວ່າ ເປັນບາດກ້າວ ທີ່ສຳຄັນອັນນຶ່ງ ທີ່ສະແດງໃຫ້ເຫັນວິທີທີ່ທັງສອງຝ່າຍສາມາດດຳເນີນການຮ່ວມກັນໄດ້ ເພື່ອຍົກລະດັບສາຍພົວພັນກັນຂຶ້ນ.
