ລິ້ງ ສຳຫລັບເຂົ້າຫາ

ປ.ໂອບາມາ ພົບປະ 3 ຝ່າຍ ກັບຜູ້ນຳ ຍີ່ປຸ່ນ ແລະ ເກົາຫຼີໃຕ້ (ວີດີໂອ)


ປະທານາທິບໍດີ Obama (ກາງ) ພົບປະກັບນາຍົກລັດຖະມົນຕີ ຍີ່ປຸ່ນ (ຂວາ ) ທ່ານ Shinzo Abe ແລະປະທານາທິບໍດີເກົາຫຼີໃຕ້ (ຊ້າຍ) ທ່ານນາງ Park Geun-hye.
ບັນດາ​ຜູ້​ນຳ ຍີ່ປຸ່ນ ​ແລະເກົາຫລີ​ໃຕ້ ​ໄດ້​ພົບ​ປະ​ສົນທະນາ
ກັນ​ແບບສາມ​ຝ່າຍ​ກັບ ​ປະທານາທິບໍດີສະຫະລັດ ທ່ານ
Barack Obama ຢູ່​ນອກ​ກອງ​ປະຊຸມ ນິວ​ເຄລຍນາໆ
ຊາດ ທີ່​ກຸງ Hague ປະເທດເນເທີແລນ.

ກ່ອນ​ການ​ພົບປະ​ເລີ້ມ​ຂື້ນ​ໃນ​ວັນ​ອັງຄານ​ວານ​ນີ້ ທ່ານ
Obama ກ່າວວ່າ ການ ປະສານງານຢ່າງເລິກ​ເຊິ່ງ ລະ
ຫວ່າງກຸງວໍ​ຊິງ​ຕັນ ​ກຸງໂຕ​ກຽວ ​ແລະກຸງ​ໂຊ​ລ ທີ່ ຮວມ​ທັງ
“ການຮ່ວມມື​ທາງ​ທະຫານ ທີ່​ຮວມ​ທັງ​ການ​ຊ້ອມ​ລົບຮ່ວມ”
ແມ່ນມີ​ຄວາມ​ສຳຄັນ​ທີ່​ສຸດ ​ໃນ​ການ​ຮັບມືກັບເກົາຫລີ​ເໜືອ.

ທ່ານ Obama ກ່າວ​ວ່າ “​ໃນ​ລະຍະ​ຫ້າ​ປີ​ທີ່​ຜ່ານ​ມາ​ນີ້ ການ​ປະສານ​ງານ​ຢ່າງ​ໃກ້​ຊິດ ລະຫວ່າງປະ​ເທດ​ທັງ​ສາມ​ຂອງ​ພວກເຮົາ ​ໄດ້ປະສົບຄວາມສຳເລັດໃນ ການປ່ຽນແປງ ວິທີການຮັບມືກັບເກົາຫຼີເໜືອ ແລະການຮ່ວມມືສາມຝ່າຍຂອງ ພວກເຮົາໄດ້ສົ່ງ​ສັນ​ຍານໄປຍັງກຸງ​ພຽງ​ຢາງວ່າ ​ການທ້າທາຍເກາະຜິດ ​ແລະ ການຂົ່ມ​ຂູ່ຂອງພຽງຢາງນັ້ນ
ຈະໄດ້ຮັບ​ການ​ຕອບ​ໂຕ້​ແບບເປັນເອກກະພາບຮ່ວມ​ກັນ ​ແລະຄວາມໝາຍ​ໝັ້ນຂອງ
ສະຫະລັດຕໍ່ຄວາມ​ປອດ​ໄພ​ຂອງ​ທັງ​ຍີ່ປຸ່ນ ​ແລະ ສາທາລະນະ​ລັດເກົາຫລີ ແມ່ນແນ່ວ
ແນ່ບໍ່ມີການປ່ຽນແປງ.”

ປະທານາທິບໍດີ ​ເກົາຫລີ​ໃຕ້ ທ່ານ​ນາງ Park Geun-hey ​ແລະ ນາຍົກລັດ ຖະມົນຕີຍີ່
ປຸ່ນ ທ່ານ Shinzo Abe ຕ່າງກໍໄດ້ເຫັນພ້ອມນຳກັນວ່າ ການ​ຕ​ອບ​ໂຕ້​ຮ່ວມ​ກັນ ແມ່ນ​ມີ​
ຄວາມ​ສຳຄັນຫຼາຍໃນການຮັບມື​ກັບ​ການ​ຂົ່ມຂູ່່ຈາກ​ໂຄງການ ນິວ​ເຄຣຍ ​ແລະ​ລູກ​ສອນ
ໄຟ ​ຂອງ​ເກົາຫລີ​ເໜືອ.

ຄວາມສຳພັນ​ລະຫວ່າງ ສອງ​ປະ​ເທດພັນທະ​ມິດຂອງສະຫະລັດ ​ໄດ້ຊຸດໂຊມລົງ ໃນໄລ
ຍະສອງສາມປີ​ທີ່​ຜ່ານ​ມາ ​ແລະ​ນີ້ ແມ່ນເປັນການພົບພໍ້ກັນ ຢ່າງ​ເປັນ​ທາງ​ເທື່ອທຳອິດ
ລ​ະຫວ່າງ ປະທານາທິບໍດີ ​ເກົາຫລີ​ໃຕ້ ​ແລະ ນາຍົກລັດຖະມົນຕີ ຍີ່ປຸ່ນ.

ສະຫະລັດ​ ​ໄດ້​ຮຽກຮ້ອງ​ໃຫ້ ກຸງ​ໂຕ​ກຽວ ​ແລະ​ກຸງ​ໂຊ​ລ ຫລຸດ​ຜ່ອນ​ຄວາມ​ເຄັ່ງ​ຕືງ ກ່ຽວ
ກັບການ​ໂຕ້​ຖຽງ​ທາງປະຫວັດ​ສາດ ​ແລະ​ເພັ່ງເລັງໃສ່​ບັນຫາ​ຕ່າງໆ ທີ່ມີຜົນ​ປະ​ໂຫຍ​ດ ນຳກັນ ​ເຊັ່ນ​ວ່າ ໂຄງການ​ນິວ​ເຄຣຍເກົາຫລີ​ເໜືອເປັນຕົ້ນ.
XS
SM
MD
LG