ປະທານາທະບໍດີສະຫະລັດ ທ່ານ Barack Obama ແລະ ບັນດາຜູ້ນຳຈາກຢູໂຣບ ໄດ້ພ້ອມກັນເຫັນດີ ທີ່ຈະຕັ້ງມາດຕະການລົງໂທດຕໍ່ ຣັດເຊຍ ໃຫ້ໜັກຂຶ້ນກວ່າເກົ່າ ຖ້າວ່າ ຣັດເຊຍບໍ່ຍອມເລີ່ມຈັດຕັ້ງ ປະຕິບັດຂໍ້ຕົກລົງ Minsk ແລະ ໃຫ້ຄວາມເຄົາລົບ ຕໍ່ອະທິປະໄຕ ຂອງ Ukraine. ກອງປະຊຸມໃຫຍ່ຂອງພວກທ່ານໄດ້ສິ້ນສຸດລົງ ໃນ ວັນຈັນຜ່ານມານີ້ ຫຼັງຈາກໄດ້ບັນລຸຫຼາຍບັນຫາຢ່າງກວ້າງຂວາງ ລວມ ມີການຄ້າ, ການປ່ຽນແປງດິນຟ້າອາກາດແລະການກໍ່ການຮ້າຍ. ນັກຂ່າວວີໂອເອ ປະຈຳທຳນຽບຂາວ Luiz Ramirez ໄດ້ເດີນທາງໄປພ້ອມທ່ານປະທານາທິບໍດີ ແລະ ໄດ້ມີບົດລາຍງານຈາກ Schloss Elmau ສະຖານທີ່ຈັດກອງປະຊຸມດັ່ງກ່າວ ເຊິ່ງ ພຸດທະສອນ ຈະນຳລາຍລະອຽດມາສະເໜີທ່ານ.
ການເອົາບັນດາສະມາຊິກຂອງກຸ່ມ G7 ຫຼື 7 ປະເທດທີ່ຈະເລີນ ທາງດ້ານອຸດສາຫະກຳ ຈາກຢູໂຣບ ເພື່ອມາຕົກລົງກັນກ່ຽວກັບການຕໍ່ ມາດຕະການລົງໂທດຣັດເຊຍ ເຊິ່ງຈະມີກຳນົດໝົດອາຍຸໃນສອງເດືອນ ຂ້າງໜ້ານິ້ ແມ່ນເປັນສິ່ງທີ່ທ້າທາຍສຳລັບ ປະທານາທິບໍດີ Obama. ທ່ານມີຄວາມຫວັງ ຢາກຈະສົ່ງຂໍ້ຄວາມທີ່ເປັນໜຶ່ງດຽວກັນ ໃຫ້ກັບຣັດເຊຍ. ເຊິ່ງໃນວັນຈັນຜ່ານມານີ້, ທ່ານກໍໄດ້ໃນສິ່ງທີ່ທ່ານຕ້ອງການ.
ທ່ານ Obama ເວົ້າວ່າ “ຄູ່ຮ່ວມມືຈາກ ຢູໂຣບຂອງພວກເຮົາໄດ້ຢືນຢັນວ່າ ພວກເຂົາຈະຮັກສາມາດຕະການລົງໂທດຕໍ່ ຣັດເຊຍ ຈົນກວ່າພວກເຂົາຈັດຕັ້ງປະຕິດບັດຂໍ້ຕົກລົງ Minsk ຢ່າງເຕັມທີ່, ເຊິ່ງໝາຍເຖິງການຕໍ່ອາຍຸມາດຕະການລົງໂທດ ທີ່ມີຢູ່ຂອງຢູໂຣບ ກາຍເດືອນ ກໍລະກົດອອກໄປ.”
ສະຫະລັດ ແລະສະມາຊິກ G7 ອື່ນໆກໍຍັງໄດ້ມີຄຳເຕືອນຕໍ່ Moscow ວ່າ ບັນດາສະມາຊິກຂອງກຸ່ມແມ່ນພ້ອມແລ້ວທີ່ຈະກຳນົດເພີ່ມເຕີມມາດ ຕະການລົງໂທດທີ່ໜັກຂຶ້ນກວ່າເກົ່າຖ້າ ຣັດເຊຍ ບໍ່ໃຫ້ຄວາມເຄົາລົບ ຕໍ່ ອະທິປະໄຕຂອງ Ukraine.
ໃນຄຳປາໄສ ຂອງການສະຫຼຸບ ກອງປະຊຸມໃຫຍ່ສອງມື້, ທ່ານ Obama ໄດ້ກ່າວວ່າ ປະທານາທິບໍດີ ຣັດເຊຍ ທ່ານ Vladimir Putin ຕ້ອງໄດ້ຮີບຕັດສິນໃຈ.
ທ່ານ Obama ໄດ້ກ່າວວ່າ “ແມ່ນລາວກຳລັງສືບຕໍ່ທຳລາຍເສດຖະ ກິດຂອງປະເທດລາວ ແລະ ສືບຕໍ່ການຢູ່ໂດດດ່ຽວຂອງຣັດເຊຍ ໃນການສະແຫວງຫາຄວາມປາຖະນາໃນແງ່ລົບ ເພື່ອສ້າງຄືນຄວາມຈະເລີນຮຸ່ງເຮືອງຂອງມະຫາອານາຈັກໂຊວຽດ ບໍ? ຫຼື ລາວຍອມຮັບວ່າ ຄວາມຍິ່ງໃຫຍ່ຂອງຣັດເຊຍ ແມ່ນບໍ່ໄດ້ກາງຕໍ່ເລື່ອງການລະເມີດຜືນ ແຜ່ນແດນອັນຄົບຖ້ວນ ແລະ ອຳນາດອະທິປະໄຕຂອງບັນດາປະເທດອື່ນໆ ບໍ?”
ປະທານາທິບໍດີ Obama ໄດ້ເນັ້ນຢ້ຳເຖິງຄວາມພະຍາຍາມຂອງທ່ານ ເພື່ອຊຸກຍູ້ຂໍ້ຕົກລົງດ້ານການຄ້າຂະໜາດໃຫຍ່ ກັບບັນດາຄູ່ຮ່ວມມື ທັງໃນເຂດ Pacific ແລະ Atlantic. ແລະທ່ານກໍ່ໄດ້ຮຽກຮ້ອງໃຫ້ຢູໂຣບ ຊ່ວຍແກ້ໄຂບັນຫາວິກິດການໜີ້ສິນຂອງ Greece.
ການປະຊຸມໃນວັນຈັນຜ່ານມານີ້ ຍັງລວມມີຫົວຂໍ້ ກ່ຽວກັບການກໍ່ການຮ້າຍ ເຊິ່ງເປັນບັນຫາທີ່ໜ້າເປັນຫ່ວງຫຼາຍ ສຳລັບບັນດາປະເທດ G7, ບາງປະເທດ ທີ່ເຂົ້າຮ່ວມໃນການໂຈມຕີທາງອາກາດ ພາຍໃຕ້ການນຳ ພາຂອງສະຫະລັດ ໃສ່ພວກຫົວຮຸນແຮງລັດອິສລາມ.
ປະທານາທິບໍດີ Obama ໄດ້ພົບປະກັບນາຍົກລັດຖະມົນຕີ Irag ທ່ານ Haider al-Abadi ຜູ້ທີ່ໄດ້ກ່າວວ່າ ການເສຍເມືອງ Ramadi ແມ່ນເປັນພຽງການພ່າຍແພ້ຊົ່ວຄາວຂອງທະຫານ Irag ເທົ່ານັ້ນ. ຜູ້ນຳທັງສອງຝ່າຍໄດ້ເຈລະຈາກ່ຽວກັບຍຸດທະສາດໃນການຕໍ່ຕ້ານພວກລັດອິສລາມ.
ທ່ານ Obama ໄດ້ກ່າວວ່າ ສະຫະລັດຕ້ອງໄດ້ເລັ່ງການຝຶກແອບໃຫ້ແກ່ກອງທັບ Irag.
ທ່ານ Obama ເວົ້າວ່າ “ ພວກເຮົາຍັງບໍ່ມີຍຸດທະສາດທີ່ສົມບູນແບບເທື່ອ ເພາະວ່າ ມັນຕ້ອງມີຄຳໝັ້ນສັນຍາ ໃນພາກສ່ວນຂອງ Irag ເຊັ່ນກັນ ກ່ຽວກັບ ວິທີການຮັບເອົາທະຫານໃໝ່ ແລະ ການຝຶກແອບມີຂຶ້ນແບບໃດ”
ທ່ານ ໄດ້ກ່າວວ່າ ທະຫານ Irag ຕ້ອງໄດ້ເພີ່ມການເກນທະຫານ ແລະ ເຂົ້າຫາຊາວ Sunni ເພື່ອທີ່ຈະເອົາຊະນະພວກຫົວຮຸນແຮງລັດອິສລາມ.
Africa ໄດ້ມີບົດບາດທີ່ສຳຄັນ ໃນກອງປະຊຸມຄັ້ງນີ້. ປະທານາທິບໍດີ Nigeria ທ່ານ Muhammadu Buhari ໄດ້ຖືກເຊີນໃຫ້ເຂົ້າຮ່ວມໃນກອງປະຊຸມເພື່ອກ່າວເຖິງຄວາມພະຍາຍາມຂອງລັດຖະບານຂອງທ່ານ ໃນການຕໍ່ສູ້ຕ້ານພວກກຸ່ມຫົວຮຸນແຮງ Boko Haram ແລະ ທ່ານນາງ Ellen Sirleaf Johnson ປະທານາທິບໍດີຂອງ Liberia ກໍໄດ້ຖືກເຊີນເຂົ້າຮ່ວມເຊັ່ນກັນ ເພື່ອກ່າວເຖິງບົດຮຽນຕ່າງໆ ກ່ຽວກັບໂລກລະບາດ Ebola ທີ່ເກີດຂື້ນເມື່ອບໍ່ດົນມານີ້ ໃນອາຟຣິກາຕາເວັນຕົກ.
ບັນດາຜູ້ນຳ G7 ໄດ້ໃຫ້ຄຳໝັ້ນສັນຍາ ທີ່ຈະປ້ອງກັນໂລກລະບາດ ເຊິ່ງອາດຈະເກີດຂຶ້ນໃນອະນາຄົດ ບໍ່ໃຫ້ກາຍມາເປັນການແຜ່ລະບາດ ຮ້າຍແຮງໂດຍສະເໜີໃຫ້ການຊ່ວຍເຫຼືອແກ່ 60 ປະເທດ, ລວມທັງບັນດາປະເທດໃນ ອາຟຣິກາຕາເວັນຕົກ.
