ເບິ່ງວີດີໂອພາສາອັງກິດ:
ເຖິງແມ່ນຈະມີບັນດາເສດຖະກິດທີ່ກໍາລັງໂຜ່ໂຕຂຶ້ນມາລາຍໃຫຍ່ໆຂອງໂລກ ເຂົ້າຮ່ວມກອງ
ປະຂຸມສຸດຍອດຄັ້ງນີ້ນໍາກໍຕາມ ນັກວິເຄາະຫລາຍໆຄົນເຫັນພ້ອມນໍາກັນວ່າ ບັນຫາວິກິດ
ການຂອງພວກປະເທດໃຊ້ເງິນຢູໂຣນັ້ນ ເບິ່ງຊົງວ່າຈະເປັນຫົວຂໍ້ຄອບງໍາກອງປະຊຸມສຸດຍອດ
ຈີ 20 ທີ່ເລິ່ມຂຶ້ນໃນວັນຈັນມື້ນີ້ ຢູ່ເມືອງຕາກອາກາດ Los Cabos ແຄມຝັ່ງມະຫາສະມຸດປາ
ຊິຟິກຂອງແມັກຊິໂກ.
Stewart Patrick ເຈົ້າໜ້າທີ່ອາວຸໂສປະຈໍາສະພາຄວາມສໍາພັນຕ່າງປະເທດ ກ່າວວ່າ
“ບັນຫາວິກິດການຂອງເຂດຢູໂຣ ຫລືຂອງພວກປະເທດໃຊ້ເງິນຢູໂຣນັ້ນ ຈະເປັນຫົວຂໍ້
ນໍາໜ້າກອງປະຊຸມ ອັນດັບນຶ່ງ ແລະອັນດັບສອງ ເວລາກອງປະຊຸມໄຂຂຶ້ນທີ່ເມືອງຕາກ
ອາກາດ Los Cabos.”
ການເລືອກຕັ້ງເອົາສະມາຊິກສະພາຂອງປະເທດກຣີສໃນວັນອາທິດວານນີ້ ກໍອາດເພີ່ມຄວາມ
ຮີບດ່ວນ ໃສ່ຄວາມພະຍາຍາມເພື່ອແກ້ໄຂບັນຫາວິກິດການນີ້ ຫຼາຍຂຶ້ນ ຊຶ່ງຊາວກຣີສຜູ້ມີສິດ
ປ່ອນບັດທັງຫຼາຍພາກັນໄປລົງຄະແນນສຽງ ເພື່ອເລືອກເອົາໃນລະຫວ່າງຜູ້ສະໝັກເລືອກຕັ້ງທີ່ສະໜັບສະໜຸນ ມາດຕະການປະຢັດມັດທະຍັດ ທີ່ມາພ້ອມກັບເງິນຊ່ວຍເຫລືອຂອງອີຢູເພື່ອ
ກູ້ເສດຖະກິດຂອງກຣີສໄວ້ນັ້ນ ແລະພວກທີ່ຕ້ອງການຈະລົບລ້າງຂໍ້ຕົກລົງກັບອີຢູ ທີ່ອາດສາ
ມາດຜັກດັນກຣີສອອກຈາກເຂດຢູໂຣໂຊນນັ້ນ.
ທາງລັດຖະບານປະທານາທິບໍດີໂອບາມານັ້ນ ຫວັງວ່າ ບັນດາຜູ້ນໍາອີຢູຫລືສະຫະພາບຢູໂຣບ
ທີ່ກອງປະຊຸມສຸດຍອດຄັ້ງນີ້ ຈະສາມາດປະກາດໃຫ້ຮູ້ ໂດຍສັງເຂບ ກ່ຽວກັບແຜນການຮັບມື
ຂອງພວກຕົນຕໍ່ວິກິດການໜີ້ສິນແລະການທະນາຄານຂອງບັນດາປະເທດສະມາຊິກອີຢູນັ້ນ
ແລະຫວັງອີກວ່າ ແຜນການດັ່ງກ່າວຈະມີມາດຕະການປະຢັດມັດທະຍັດໜ້ອຍລົງ ແລະເພີ່ມ
ຄວາມພະຍາຍາມໃນການຊຸກຍູ້ການເຕີບໂຕຂອງເສດຖະກິດ ແລະເຮັດໃຫ້ລະບົບການເງິນ
ຂອງຢູໂຣບ ມີຄວາມທຸ່ນທ່ຽງຫຼາຍຂຶ້ນ. ທ່ານໂອບາມາ ກ່າວວ່າ:
“ແລະພາກສ່ວນນຶ່ງຂອງແຜນການນັ້ນ ກໍຄືການລົງມືດໍາເນີນການຢ່າງແຈ້ງຂາວຊັດເຈນ
ໄວເທົ່າທີ່ຈະໄວໄດ້ ເພື່ອທຸ່ມເງິນທຶນເຂົ້າໃສ່ພວກທະນາຄານທີ່ອ່ອນແອທັງຫລາຍ. ແລະ
ທີ່ສໍາຄັນເທົ່າໆກັນ ກໍຄືບັນດາຜູ້ນໍາທັງຫຼາຍ ສາມາດວາງໂຄງຮ່າງປະຕິບັດງານ ແລະ
ວິໄສທັດສໍາລັບເຂດຢູໂຣມີຄວາມເຂັ້ມແຂງກວ່າເກົ່າ ໂຮມທັງການຮ່ວມງານກັນຫລາຍ
ຂຶ້ນກວ່າເກົ່າ ໃນດ້ານນະໂຍບາຍງົບປະມານແລະການທະນາຄານ.”
ນັກວິເຄາະ Stewart Patrick ຈາກສະພາຄວາມສໍາພັນຕ່າງປະເທດ ກ່າວວ່າ ການພັງທະ
ລາຍລົງຂອງເຂດຢູໂຣໂຊນ ອາດສາມາດສົ່ງຜົນກະທົບອອກໄປ ກາຍພາກພື້ນຢູ່ໂຣບໄດ້.
ທ່ານແພທຣິກ ກ່າວຕື່ມວ່າ:
“ນອກນີ້ແລ້ວ ກໍມີຄວາມຢ້ານກົວກັນວ່າ ການພັງທະລາຍລົງຂອງອີຢູ ຈະຊ່ວຍຈ່ອງດຶງ
ເສດຖະກິດໂລກໃຫ້ຕົກຕໍ່າລົງໄປ ໃນຊ່ວງເວລາທີ່ບາງເສດຖະກິດທີ່ກໍາລັງໂຜ່ໂຕຂຶ້ນມາ
ລາຍໃຫຍ່ໆບາງປະເທດ ອັນໂຮມທັງຈີນແລະອິນເດຍນໍານັ້ນ ກໍາລັງເລິ່ມສະດຸດແດ່ໜ້ອຍ
ນຶ່ງແລ້ວ ໃນຖານະເປັນເຄື່ອງຈັກຂັບດັນຄວາມເຕີບໂຕທາງເສດຖະກິດຂອງໂລກນັ້ນ.”
ພາກພື້ນຢູໂຣບເປັນພາຄີການຄ້າທີ່ໃຫຍ່ທີ່ສຸດຂອງອາເມຣິກາ ແລະຖ້າຫາກວ່າອີຢູບໍ່ສາມາດ
ນໍາເອົາເສດຖະກິດຂອງຕົນ ກັບຄືນສູ່ເສ້ນທາງແຫ່ງການເຕີບໂຕໄດ້ແລ້ວ ກໍມີທາງວ່າມັນຈະ
ສ້າງຄວາມເດືອດຮ້ອນໃຫ້ແກ່ເສດຖະ ກິດຂອງສະຫະລັດໄດ້ ຊຶ່ງອາດສາມາດສ້າງຄວາມປາ
ໄຊໃຫ້ແກ່ຄວາມພະຍາຍາມເພື່ອໃຫ້ໄດ້ຮັບເລືອກຕັ້ງອີກເປັນສະໄໝທີ່ສອງຂອງປະທານາທິ
ບໍດີໂອບາມາໄດ້.
ເວລາຢູ່ທີ່ເມືອງຕາກອາກາດ Los Cabos ນັ້ນ ທ່ານໂອບາມາຈະພົບປະຫາລືກັບທ່ານ
Vladimir Putin ປະທານາທິບໍດີຣັດເຊຍ ຊຶ່ງຈະເປັນກອງປະຊຸມບັ້ນນຶ່ງທີ່ຈະມີການຕິດຕາມ
ສິ້ງຊອມເບິ່ງຢ່າງໃກ້ຊິດ.
ຜູ້ນໍາທັງສອງອາດປຶກສາຫາລືກັນ ກ່ຽວກັບຂໍ້ຄັດຄ້ານຂອງຣັດເຊຍຕໍ່ການລົງໂທດ ຕໍ່ອິຣ່ານ
ແລະຊີເຣຍ ແລະຄວາມລະແວງສົງໄສຂອງຣັດເຊຍກ່ຽວກັບແຜນການຂອງສະຫະລັດ ທີ່ຈະ
ຕິດຕັ້ງລະບົບປ້ອງກັນລູກສອນໄຟຂີປະນາວຸດ ຢູ່ໃນພາກພື້ນຢູໂຣບ.
ແຕ່ David Satter ຜູ້ຂຽນລາຍງານແລະເຈົ້າໜ້າທີ່ອາວຸໂສປະຈໍາສະຖາບັນ Hudson ບໍ່ຄາດ
ໝາຍວ່າ ຈະມີຄວາມກ້າວໜ້າໃດໆອອກມາຈາກການສົນທະນາຫາລືລະຫວ່າງຜູ້ນໍາທັງສອງ.
ທ່ານ Satter ກ່າວວ່າ
“ວັດຖຸປະສົງເຫຼົ່ານັ້ນ ບໍ່ຊົງທີ່ຈະບັນລຸໄດ້ທີ່ກອງປະຊຸມສຸດຍອດຄັ້ງນີ້ ຍ້ອນວ່າຝ່າຍຣັດ
ເຊຍບໍ່ມີຄວາມສົນໃຈທີ່ຈະໃຫ້ມີການ ຕົກລົງກັນໄດ້ ກ່ຽວກັບບັນຫາເຫຼົ່ານີ້ຢູ່ແລ້ວ.”
ແຕ່ບັນດາຜູ້ນໍາ ຈີ 20 ສ່ວນໃຫຍ່ ແມ່ນມີຄວາມສົນໃຈແທ້ໆໃນການແກ້ໄຂບັນຫາເສດຖະກິດ
ໂລກ ຊຶ່ງພວກເຂົາເຈົ້າຫວັງທີ່ຈະເລີ່ມຕົ້ນ ດ້ວຍການເກ້ຍກ່ອມແລະຊຸກຍູ້ໃຫ້ສະຫະພາບຢູໂຣບ
ແກ້ໄຂບັນຫາຂອງພວກເຂົາເຈົ້າເສຍກ່ອນ.