ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວວ່າ ທ່ານ
ພວມກະກຽມ ທີ່ຈະໃຊ້ສິດອຳນາດຝ່າຍບໍລິຫານຂອງທ່ານ ຊຶ່ງ
ຈະອະນຸຍາດໃຫ້ທ່ານ ບໍ່ຕ້ອງຜ່ານລັດຖະສະພາ ໃນການອອກ
ດຳລັດເພື່ອປະຕິຮູບເລື່ອງຄົນເຂົ້າເມືອງ ໃນຂອບເຂດ
ທີ່ກວ້າງຂວາງ.
ໃນການຖະແຫລງ ເມື່ອວັນອາທິດມື້ນີ້ ໃນຕອນທ້າຍ ຂອງກອງ
ປະຊຸມສຸດຍອດກຸ່ມ G-20 ທີ່ອອສເຕຣເລຍນັ້ນ ທ່ານໂອບາມາ
ເວົ້າວ່າ ທ່ານຈະ ບໍ່ລັງເລໃຈໃດໆ ໃນການອອກກົດລະບຽບໃໝ່
ດ້ານຄົນເຂົ້າເມືອງ ຍ້ອນການຂົ່ມຂູ່ ຂອງສະມາຊິກລັດຖະສະພາ
ບາງຄົນທີ່ຈະເອົາມາດຕະການ ທີ່ອາດນຳໄປສູ່ການປິດລັດຖະບານລົງອີກເທື່ອນຶ່ງ.
ແຜນການໃໝ່ ຂອງປະທານາທິບໍດີ ທີ່ຈະອອກດຳລັດກ່ຽວກັບເລື່ອງຄົນເຂົ້າເມືອງ ພາຍໃນ ທ້າຍປີນີ້ ນອກຈາກວ່າສະພາຈະລົງຄະແນນສຽງ ກ່ຽວກັບຮ່າງກົດໝາຍ ປະຕິຮູບ ໃນຂອບ
ເຂດທີ່ກວ້າງຂວາງ ທີ່ອາດສາມາດ ປົກປ້ອງ ພວກເຂົ້າເມືອງຜິດກົດໝາຍຫຼາຍລ້ານຄົນ
ຈາກການສົ່ງກັບຄືນປະເທດນັ້ນ.
ລັດຖະມົນຕີ ກະຊວງຮັກສາຄວາມປອດໄພພາຍໃນຂອງສະຫະລັດ ທ່ານ Jeh Johnson
ກ່າວໃນວັນເສົາວານນີ້ ຢູ່ທີ່ຫໍສະມຸດ ປະທານາທິບໍດີ Ronald Reagan ໃນລັດແຄລີຟໍເນຍ ວ່າ ລັດຖະບານ ທ່ານໂອບາມາແມ່ນຢູ່ໃນ “ຂັ້ນຕອນສຸດທ້າຍ” ກ່ຽວກັບການເອົາບາດ ກ້າວດັ່ງກ່າວ. ທ່ານບັນລະຍາຍວ່າ ລະບົບຄົນເຂົ້າເມືອງ ໃນປັດຈຸບັນນີ້ ແມ່ນ “ເພພັງແລ້ວ.”
ທ່ານ Johnson ກ່າວອີກວ່າ ມັນເປັນທີ່ໜ້າເສຍໃຈ ທີ່ບັນດາສະມາ ຊິກພັກຣີພັບບລີກັນ ໃນສະພາຕ່ຳ ບໍ່ໄດ້ດຳເນີນການຫຍັງເລີຍ ກ່ຽວ ກັບກົດໝາຍ ປະຕິຮູບລະບົບ ຄົນເຂົ້າເມືອງ ໃນປີແລ້ວນີ້.
ຫົວໜ້າກະຊວງຮັກສາຄວາມປອດໄພພາຍໃນຂອງສະຫະລັດ ເວົ້າວ່າ ການອອກດຳລັດ
ຝ່າຍບໍລິຫານ ຂອງປະທານາທິບໍດີ ແມ່ນຈະຢູ່ໃນຂອບເຂດ ທີ່ກວ້າງຂວາງຮອບດ້ານ ແລະ ຈະເສີມຂະຫຍາຍຄວາມເຂັ້ມແຂງ ໃນດ້ານຄວາມປອດໄພ ຢູ່ຕາມຊາຍແດນ ຂອງປະເທດ.
ສະມາຊິກສະພາສູງ John McCain ນຶ່ງໃນບັນດາສະມາຊິກຂອງພັກຣີພັບບລີກັນທີ່ໃຫ້ ການສະໜັບສະໜຸນກ່ຽວກັບການປະຕິຮູບເລື່ອງຄົນເຂົ້າເມືອງ ຮຽກຮ້ອງໃຫ້ທ່ານໂອບາ
ມາ ໃຫ້ເວລາຕື່ມອີກແກ່ສະພາຊຸດໃໝ່ ເພື່ອເບິ່ງວ່າ ມັນຈະສາມາດເຄື່ອນໄຫວໄປໜ້າໄດ້ ຫລືບໍ່. ທ່ານໄດ້ເຕືອນວ່າ ການເອົາບາດກ້າວໃດໆກໍຕາມຂອງຝ່າຍບໍລິຫານ ອາດຈະກໍ່ ໃຫ້ເກີດຜົນສະທ້ອນຮ້າຍແຮງຢ່າງແທ້ຈິງ ຕໍ່ຄວາມສຳພັນລະຫວ່າງທຳນຽບຂາວກັບລັດ ຖະສະພາ.
ທ່ານ McCain ເປັນສະມາຊິກສະພາສູງຈາກລັດອາຣິໂຊນາ ຊຶ່ງເປັນລັດຊາຍແດນບ່ອນ ທີ່ພວກຄົນເຂົ້າເມືອງບໍ່ມີເອກກະສານເປັນຈຳນວນຫຼວງຫຼາຍໄດ້ຂ້າມເຂົ້າມາແຕ່ປະເທດ ເມັກຊິໂກນັ້ນ.
