ລິ້ງ ສຳຫລັບເຂົ້າຫາ

ທ່ານໂອບາມາ ຢືນຢັນ ການສະໜັບສະໜູນຢູໂຣບ ໃນການຢ້ຽມຢາມອາທິດແລ້ວນີ້

  • ໄພສານ ວໍຣະຈັກ

ປະທານາທິບໍດີບາຣັກໂອບາມາ ກ່າວຖະແຫຼງຕໍ່ປະຊາຊົນ ທີ່ນະຄອນ Dublin ປະເທດໄອຣ໌ແລນ (23 ພຶດສະພາ 2011)

ປະທານາທິບໍດີບາຣັກ ໂອບາມາ ໄດ້ເດີນທາງໄປຢ້ຽມຢາມ 4 ປະເທດໃນຢູໂຣບເປັນເວລາ 6 ມື້ ​ໃນອາທິດ​ແລ້ວ​ນີ້. ດັ່ງທີ່ນາຍ Kent Klein ຜູ້ສື່ຂ່າວຂອງ VOA ລາຍງານມາຈາກ ທຳນຽບຂາວ ປະທານາທິບໍດີສະຫະລັດໄດ້ໃຊ້ເວລາສ່ວນໃຫຍ່ໃນການເດີນທາງຄັ້ງນີ້ ເພື່ອ ໃຫ້ການຢືນຢັນອີກຄັ້ງນຶ່ງວ່າ ການເປັນພັນທະມິດລະຫວ່າງສະຫະລັດແລະຢູໂຣບແມ່ນຍັງ ມີຄວາມສຳຄັນຢູ່.

ປະທານາທິບໍດີໂອບາມາບໍ່ໄດ້ລົງນາມໃນຂໍ້ຕົກລົງທີ່ສຳຄັນຫຼື
ປະກາດໃຫ້ຊາບກ່ຽວກັບນະໂຍບາຍໃໝ່ໃດໆ ໃນລະຫວ່າງ
ທີ່ທ່ານຢ້ຽມຢາມຢູໂຣບ​ເປັນ​ເວລາ​ເກືອບ​ນຶ່ງ​ສັບປະດາ​ນັ້ນ.

ແຕ່ເບິ່ງຄືວ່າທ່ານໄດ້ປະສົບກັບຄວາມສຳເລັດໃນເປົ້າໝາຍ
ຕົ້ນຕໍ ກ່ຽວກັບການເດີນທາງໄປຢ້ຽມຢາມຂອງທ່ານ ນັ້ນກໍ
ຄືໃຫ້ການຄໍ້າປະກັນແກ່ຢູໂຣບວ່າການເປັນພັນທະມິດຂ້າມ
ມະຫາສະມຸດອັດລັນຕິກແມ່ນຍັງມີຄວາມສຳຄັນຕໍ່ສະຫະລັດ.

ສົງຄາມໃນອີຣັກ ແລະອັຟການິສຖານ ຄວາມວຸ້ນວາຍໃນ
ພາກຕາເວັນອອກກາງ ຄວາມອຸດົມຮັ່ງມີ ໃນເຂດເອເຊຍ
ແລະວິກິດການພາຍໃນປະເທດ ໄດ້ຄອບງຳ ຄວາມສົນໃຈ
ສ່ວນໃຫຍ່ຂອງທ່ານໂອບາມານັບແຕ່ທ່ານໄດ້ເຂົ້າກຳຕຳແໜ່ງເປັນປະທານາທິບໍດີມາ.

ຍິ່ງໄປກວ່ານັ້ນ ລັດຖະບານທ່ານໂອບາມາຍັງປະກາດວ່າ ຕົນຖືວ່າກຸ່ມຈີ 20 ທີ່ມີສະມາຊິກ
ຈາກທົ່ວທຸກທະວີບນັ້ນມີຄວາມສຳຄັນຫຼາຍໄປກວ່າກຸ່ມຈີ 8 ທີ່ມີຢູໂຣບເປັນສູນກາງ.

ທ່ານໂອບາມາເລີ່ມການຢ້ຽມຢາມທາງດ້ານການທູດຂອງທ່ານທີ່ປະເທດ Ireland ບ່ອນທີ່
ທ່ານໄດ້ພົບປະກັບພວກຜູ້ນຳຂອງປະເທດ ດື່ມເບຍທີ່ຮ້ານກິນດື່ມນ້ອຍໆແຫ່ງນຶ່ງທີ່ເມືອງ
Moneygall ຊຶ່ງເປັນບ້ານເກີດເມືອງນອນບັນພະບຸລຸດຂອງທ່ານແລະປະກາດວ່າທ່ານເປັນ
ຄົນເຊື້ອສາຍ Ireland ຕໍ່ໜ້າປະຊາຊົນຫຼາຍສິບພັນຄົນທີ່ນະຄອນ Dublin.

ທ່ານໂອບາມາກ່າວວ່າ “ສະບາຍດີນະຄອນ Dublin ສະບາຍດີປະເທດ Ireland
ຂ້າພະເຈົ້າມີຊື່ວ່າ ບາຣັກໂອບາມາ ມາ​ຈາກ​ຄອບຄົວ​ໂອ​ບາ​ມາ ​ແຫ່ງ​ເມືອງ Mo-
neygall."

ທ່ານບໍ່ໄດ້ຮັບປາກ​ທີ່​ຈະໃຫ້ການຊ່ອຍເຫຼືອທາງດ້ານການເງິນໃດໆຂອງ​ສະຫະລັດເພື່ອສະ
ໜັບສະໜຸນເສດຖະກິດທີ່ພວມປະສົບບັນຫາຂອງ Ireland ມີແຕ່ໃຫ້ຄຳໝັ້ນສັນຍາສະໜັບ ສະໜຸນທາງດ້ານຈິດໃຈທໍ່ນັ້ນ.

ທ່ານໂອບາມາ ກວດແຖວທະຫານກອງ ກຽດຕິຍົດຮ່ວມກັບເຈົ້າຊາຍຟີລິບຂະນະ ທີ່ເດີນທາງໄປເຖິງ ພະລາດຊະວັງ ບັກ ກິ່ງແຮມ (24 ພຶດສະພາ 2011)
ທ່ານໂອບາມາ ກວດແຖວທະຫານກອງ ກຽດຕິຍົດຮ່ວມກັບເຈົ້າຊາຍຟີລິບຂະນະ ທີ່ເດີນທາງໄປເຖິງ ພະລາດຊະວັງ ບັກ ກິ່ງແຮມ (24 ພຶດສະພາ 2011)

ປະເທດຕໍ່ໄປທີ່ປະທານາທິບໍດີໂອບາມາ
ໄປຢ້ຽມຢາມກໍແມ່ນອັງກິດ. ສະຫະລັດ
ແລະອັງກິດເປັນພັນທະມິດທີ່ໃກ້ຊິດກັນ
ທີ່ສຸດ ນັບແຕ່ສັດຕະວັດທີ 19 ເປັນຕົ້ນ
ມາ ແລະປະເທດທັງສອງເປັນຄູ່ການຄ້າ
ທີ່ໃຫຍ່ທີ່ສຸດໃນໂລກ.

ແຕ່ການເສຍມາລະຍາດທາງພິທີການ
ທູດຈຳນວນນຶ່ງແລະສິ່ງທີ່ມອງ​ເຫັນ​ກັນ
ວ່າ ເປັນການ​ເມີນ​ເສີຍບໍ່​ໃຫ້​ຄວາມ​ສົນ​
ໃຈ ທີ່ໄດ້ເລີ່ມມາຕັ້ງແຕ່ພິທີສາບານໂຕ
ເຂົ້າຮັບຕຳແໜ່ງ ຂອງທ່ານໂອບາມາ
ແລ້ວ​ນັ້ນ ໄດ້ພາ​ໃຫ້​ມີ​ການຕັ້ງຄຳຖາມ
ຂຶ້ນ​ມາກ່ຽວກັບສຸຂະພາບ ຂອງອັນທີ່
ມັກເອີ້ນກັນວ່າ “ຄວາມສຳພັນພິເສດ”
ລະຫວ່າງ​ສະຫະລັດ​ກັບອັງກິດນັ້ນ.

ອັງກິດ ໄດ້ຈັດພິທີຕ້ອນຮັບຢ່າງເປັນທາງການ ແບບເປັນກຽດພິເສດທີ່ບໍ່ຄ່ອຍເຫັນກັນແກ່
ປະທານາທິບໍດີໂອບາມາ ຮວມທັງ​ໃຫ້ໂອກາດທ່ານ​ໄດ້ກ່າວຄຳ ປາໄສທີ່ຫໍສະພາແຫ່ງຊາດ
Westminster Hall ທີ່​ເກົ່າ​ແກ່ 900 ປີ ຊຶ່ງທີ່ນັ້ນປະທານາທິບໍດີໂອມາບາໄດ້ປະຕິ​ເສດ​ຕໍ່
ຄຳໂຕ້ແຍ້ງທີ່ວ່າ ພວກເສດຖະກິດທີ່ພຸ່ງພົ້ນຂຶ້​ນມາໃໝ່​ໃນຈີນ ອິນເດຍແລະບຣາຊີລນັ້ນ ຈະ
ເຂົ້າມາແທນທີ່ສະຫະລັດແລະອັງກິດ ເປັນປະເທດຜູ້ນຳຂອງໂລກ.

ທ່ານໂອບາມາກ່າວວ່າ “ຄຳໂຕ້ແຍ້ງນັ້ນ ແມ່ນບໍ່ຖືກຕ້ອງ. ເວລາໃນການເປັນຜູ້ນຳ
ພາຂອງເຮົາແມ່ນປັດຈຸບັນນີ້. ມັນແມ່ນສະຫະລັດແລະສະຫະລາດຊະອານາຈັກ
ອັງກິດແລະພັນທະມິດປະຊາທິປະໄຕຂອງພວກເຮົາທີ່ຫຼໍ່ຫຼອມໂລກໃຫ້ບັນດາປະ
ເທດໃໝ່ຕ່າງໆສາມາດ​ໂຜ່​ໂຕ​ຂຶ້ນ​ມາແລະສ່ວນ​ບຸກຄົນສາມາດຈະ​ເລີ​ນຮຸ່ງ​ເຮືອງ
ຂຶ້ນ​ມາ​ໄດ້ ແລະແມ່ນ​ແຕ່​ໃນ​ຂະນະ​ທີ່ຫຼາຍປະເທດເພີ່ມຂຶ້ນກ້າວ​ເຂົ້າ​ມາ​ຮັບຄວາມ
ຮັບຜິດຊອບໃນ​ການນຳພາໂລກນັ້ນ ການເປັນພັນທະມິດຂອງພວກເຮົາ ກໍຍັງຈະ
ສືບຕໍ່ມີຄວາມຈຳເປັນ ຕໍ່ເປົ້າໝາຍຂອງສັດຕະວັດ ທີ່ມີສັນຕິພາບ ຄວາມວັດທະ
ນາຖາວອນ ແລະຄວາມຍຸດຕິທຳເພີ່ມຂຶ້ນນັ້ນ."

ປະທານາທິບໍດີໂອບາມາແລະນາຍົກລັດຖະມົນຕີອັງກິດ ທ່ານ David Cameron ໄດ້ສົນ
ທະນາຫາລືກັນກ່ຽວກັບບັນຫາຫຼາຍໆເລື່ອງ ຮວມທັງລີເບຍ. ເປັນທີ່ປາກົດວ່ານາຍົກລັດ
ຖະມົນຕີ Cameron ຢາກຈະໃຫ້ເອົາມາດຕະການແບບໜັກມືເພີ່ມຂຶ້ນເພື່ອພະຍາຍາມຂັບ
ໄລ່ຜູ້ນຳລີເບຍ ທ່ານ Muammar Gadhafi ອອກຈາກອຳນາດ ຂະນະທີ່ທ່ານໂອບາມາ
ຮຽກຮ້ອງໃຫ້ດຳເນີນການແບບມີຄວາມລະມັດລະວັງຫລາຍ​ກ່ວາ.

ແຕ່ພວກຜູ້ນຳທັງສອງໄດ້ສະແດງໃຫ້ເຫັນເຖິງຄວາມຜູກພັນສ່ວນ​ໂຕທີ່ີ​ແໜ້ນໜາຂື້ນຂອງ
ພວກທ່ານ ໃນການຕີປິງປ໋ອງຄູ່ ກັບພວກເດັກນ້ອຍນັກຮຽນທີ່ກຸງລອນດອນ ແລະເສີບ
ແຮມເບີເກີໃນງານ​ລ້ຽງບາບີຄິວ ທີ່ບ້ານພັກນາຍົກລັດຖະມົນຕີອັງກິດ ນໍາເບີ 10 ຖະໜົນ
Downing ນັ້ນ. ນອກນີ້ທັງທ່ານໂອບາມາ ແລະພະລາຊີນີ Elizabeth ແຫ່ງອັງກິດ ຕ່າງ
ກໍ​ໄດ້​ກ່າວ​ເນ້ນປະ​ໂຫຍ​ກ “ຄວາມສຳພັນພິເສດ” ລະຫວ່າງ​ສອງ​ປະ​ເທດເວລາພວກທ່ານດື່ມ ອວຍພອນໃນງານລ້ຽງຮັບຮອງອາຫານຄໍ່າທີ່ພະລາດຊະວັງ Buckingham.

ຫຼັງຈາກນັ້ນ ປະທານາທິບໍດີໂອບາມາກໍໄດ້ໄປຮ່ວມກອງປະຊຸມສຸດຍອດຂອງກຸ່ມຈີ 8 ທີ່
ເມືອງ Deauville ປະເທດຝຣັ່ງ ເພື່ອຊອກຫາຊ່ອງທາງໃນການໃຫ້ຄວາມຊ່ອຍເຫຼືອແກ່
ປະເທດອີຈິບແລະຕູນີເຊຍແລະປະເທດອາຣັບອື່ນໆທີ່ສະແດງຮ່ອງຮອຍໃຫ້ເຫັນເຖິງການ
ປະຕິຮູບໄປສູ່ປະຊາທິປະໄຕນັ້ນ.

ກຸ່ມ 8 ປະເທດປະຊາທິປະໄຕທີ່ຈະເລີນທາງດ້ານອຸດສາຫະກຳຂອງໂລກບໍ່ໄດ້ໃຫ້ຄໍາ​ໝັ້ນ
ສັນຍາ​ຢ່າງ​ເປັນ​ຮູບ​ປະ​ທໍາ​ໃດໆແຕ່ກໍກ່າວວ່າ ອາດມີການສະເໜີ​ເງິນ​ຊ່ວຍ​ເຫລືອ ຈໍານວນ
20 ພັນລ້ານ​ດອນລາ ໃຫ້ອີຈິບແລະຕູນີເຊຍ ສໍາລັບໂຄງການປະຕິຮູບຕ່າງໆ.

ທີ່ເມືອງ Deauville ປະທານາທິບໍດີໂອບາມາບໍ່ສາມາດສ້າງຄວາມໝັ້ນໃຈ ໃຫ້ແກ່ປະທາ
ນາທິບໍດີຣັດເຊຍ ທ່ານ Dmitry Medvedev ໄດ້ວ່າ ລະບົບປ້ອງກັນລູກສອນໄຟຂອງ
ສະຫະລັດ ທີ່ມີການສະເໜີໄປນັ້ນ ບໍ່ໄດ້ແນເປົ້າໝາຍໃສ່ລູກສອນໄຟຣັດເຊຍ.

ແຕ່ແນວໃດກໍຕາມ ທ່ານ Medvedev ໄດ້ຕົກລົງທີ່​ຈະໃຫ້ການສະໜັບສະໜຸນ ຕໍ່ການດຳ
ເນີນຄວາມພະຍາຍາມທີ່ຈະຂັບໄລ່ທ່ານ Moammar Gadhafi ລົງຈາກອຳນາດຊຶ່ງຈະ​ເປັນ​ການໂດດດ່ຽວຜູ້ນຳຂອງລີເບຍເພີ່ມຂຶ້ນ.

ທີ່ນະຄອນຫຼວງວໍຊໍ​ຂອງ​ປະ​ເທດ​ໂປແລນນັ້ນ ທ່ານໂອບາມາໄດ້ໃຫ້ຄວາມ​ໝັ້ນ​ໃຈອີກຄັ້ງ
ນຶ່ງ ຕໍ່ພວກຜູ້ນຳຂອງປະເທດດັ່ງກ່າວວ່າ ການປັບປຸງຄວາມສຳພັນໃຫ້ດີຂຶ້ນກັບຣັດເຊຍ
ບໍ່ໄດ້ໝາຍເຖິງການຫລຸດ​ນ້ອຍ​ຖອຍ​ລົງໃນພັນທະຂອງວໍຊິງຕັນທີ່​ຈະປົກປ້ອງຄຸ້ມຄອງໂປ
ແລນ ຊຶ່ງເປັນປະເທດພາຄີຂອງອົງການເນໂຕ້ດ້ວຍກັນນັ້ນ.

ປະທານາທິບໍດີໂອບາມາກ່າວວ່າ “ສິ່ງທີ່ພວກເຮົາຕ້ອງການຢາກເຮັດກໍຄືສ້າງບັນ
ຍາກາດຂຶ້ນຢູ່ໃນຂົງເຂດ ເພື່ອໃຫ້ມີສັນຕິພາບແລະຄວາມໝັ້ນຄົງ. ນີ້ແມ່ນເປັນ
ສິ່ງທີ່ດີບໍ່ພຽງແຕ່ສຳລັບຂົງເຂດທໍ່ນັ້ນ ແຕ່ຍັງເປັນສິ່ງທີ່ດີສຳລັບສະຫະລັດອະ
ເມຣິກາ ແລະພວກເຮົາຈະມາຊ່ອຍໂປແລນສະເໝີ.”

ນອກນັ້ນປະທານາທິບໍດີໂອບາມາຍັງໄດ້ຕົກລົງທີ່ຈະສົ່ງເຮືອບິນລົບ F-16 ແລະເຮືອບິນ
ຂົນສົ່ງ C-130 ໄປໃຫ້ໂປແລນເພື່ອຝຶກແອບ ແລະຈະຂໍໃຫ້ລັດຖະສະພາ ຜ່ອນຜັນກ່ຽວ
ກັບເລື່ອງວີຊ່າ ໃຫ້ແກ່ພວກນັກທ່ອງທ່ຽວຊາວໂປແລນ ທີ່ເດີນທາງມາຢ້ຽມຢາມສະຫະ
ລັດ.

ທ່ານໂອບາມາໄດ້ໃຊ້ເວລາສ່ວນໃຫຍ່ໃນການຢ້ຽມຢາມປະເທດໂປແລນຢູ່ທີ່ນະຄອນຫຼວງ
ວໍຊໍເພື່ອຢ້ຽມຄຳນັບປະເທດເຈົ້າພາບ.

ທ່ານໄດ້ໄປວາງພວງມາລາທີ່ຂຸມຝັງສົບທະຫານນິລະນາມຂອງໂປແລນ ທີ່ອະນຸສາວະລີ
ຂອງພວກທີ່ຖືກສັງຫານໂດຍນາຊີເຢຍຣະມັນຢູ່ຄຸ້ມຄົນທຸກຂອງນະຄອນວໍຊໍ ແລະທີ່ອະນຸ
ສາວະລີຂອງມື້ລາງປະທານາທິບໍດີ Lech Kaczynski ແລະພວກເຄາະຮ້າຍອື່ນໆໃນອຸ ບັດຕິເຫດເຮືອບິນຕົກທີ່ເມືອງ Smolensk ໃນປີກາຍນີ້.

ນອກນັ້ນ ປະທານາທິບໍດີສະຫະລັດຍັງໄດ້ພົບປະກັບພວກຜູ້ນຳຈຸນຶ່ງຂອງສະຫະພັນກຳ
ມະບານ Solidarity ທີ່ເປັນຜູ້ຊຸກຍູ້ໃຫ້ມີປະຊາທິປະໄຕໃນໂປແລນນັ້ນ.

ປະທານາທິບໍດີໂອບາມາໄດ້ເຕືອນຊາວຢູໂຣບໃນທຸກໆບ່ອນຢຸດແວ່ຂອງທ່ານ ວ່າທ່ານຂໍ
ໃຫ້ການຢືນຢັນອີກຄັ້ງນຶ່ງວ່າ ການເປັນພັນທະມິດຂ້າມມະຫາສະມຸດອັດລັນຕິກຂອງສະ
ຫະລັດ ແມ່ນຮາກຖານທີ່ສຳຄັນໃນການພົວພັນກັບໂລກ ຂອງວໍຊິງຕັນ.

XS
SM
MD
LG