ລິ້ງ ສຳຫລັບເຂົ້າຫາ

ວັນພຸດ, ໑໙ ມິຖຸນາ ໒໐໒໔

ທ່ານໂອບາມາ ຢ້ຽມຢາມ 4 ປະເທດໃນຢູໂຣບ


ປະທານາທິບໍດີໂອບາມາ ຖ່າຍຮູບຮ່ວມກັບ ປະທານາທິບໍດີ Ireland ທ່ານນາງ Mary McAleese ແລະສາມີ ພ້ອມກັບທ່ານນາງ Michelle Obama ສະຕີໝາຍເລກນຶ່ງຂອງສະຫະລັດ(ຂວາສຸດ)
ວັນທີ 23 ພຶດສະພາ 2011
ປະທານາທິບໍດີໂອບາມາ ຖ່າຍຮູບຮ່ວມກັບ ປະທານາທິບໍດີ Ireland ທ່ານນາງ Mary McAleese ແລະສາມີ ພ້ອມກັບທ່ານນາງ Michelle Obama ສະຕີໝາຍເລກນຶ່ງຂອງສະຫະລັດ(ຂວາສຸດ) ວັນທີ 23 ພຶດສະພາ 2011


















ປະທານາທິບໍດີ​ບາຣັກ​ໂອ​ບາ​ມາ​ ກໍາລັງ​ຢູ່​ໃນ​ປະ​ເທດ Ireland ​ໃນ​ວັນ​ຈັນ​ມື້​ນີ້ ​ເພື່ອ​ເລີ້ມ​ຕົ້ນ​ການ​ຢ້ຽມຢາມ​ເປັນ​ເວລາ 6 ມື້​ ໃນ 4 ປະ​ເທດ​ທີ່ ຈະ​ຮວມທັງ​ການ​ດໍາ​ເນີນ​ການ​ທູດ​ລະດັບ​ສູງ​ກ່ຽວ​ກັບ​ການລຸກຮື​ຂຶ້ນ​ຂອງປະຊາຊົນ​ໃນ​ພາກ​ຕາ​ເວັນ​ອອກ​ກາງ ການ​ໂອ້ລົມ​ສົນທະນາ​ກັນ​ວ່າ​ດ້ວຍ​ຄວາມ​ຫຍຸ້ງ​ຍາກ​ຕ່າງໆ​ທາງ​ດ້ານ​ເສດຖະກິດ​ຂອງ​ໂລກທີ່​ກອງ​ປະຊຸມ​ສຸດ​ຍອດ​ຂອງ​ກຸ່ມ 8 ປະ​ເທດ​ຊັ້ນ​ນໍາ​ໃນ​ດ້ານ​ອຸດສາຫະກໍາ​ ຫລື G-8 ທີ່​ປະເທດ​ຝຣັ່ງ ​ແລະ​ການສະ​ເຫລີມ ສະຫລອງ​ຮາກ​ເຫງົ້າ​ຫລື​ເຊື້ອສາຍ​ທີ່​ຫ່າງ​ໄກຂອງ​ທ່ານ​ຈາກ​ປະ​ເທດ Ireland ນັ້ນ.

ຄວາ​ມວຸ້ນວາຍ​ທີ່​ນອງ​ເລືອດ​ໃນ​ລີ​ເບຍ ​ແລະ​ບົດບາດ​ຂອງ​ສະຫະລັດ​ໃນ​ການ​ຖິ້ມ​ລະ​ເບີດ​ຂອງ​ກຸ່ມ​ເນ​ໂຕ້​ ໃສ່​ພວກ​ທະຫານ​ທີ່​ຈົງ​ຮັກ​ພັກດີ​ຕໍ່ມວມມາ​ ກາດ​ດາ​ຟີ ຜູ້​ນໍາ​ລີ​ເບຍ ​ເບິ່ງ​ຄື​ວ່າ​ຈະ​ເປັນ​ຫົວ​ຂໍ້​ສໍາຄັນ​ທ່ີ​ສຸດຂອງ​ການ​ໂອ້​ລົມl​ສົນທະນາ​ກັນ​ເລື້ອງ​ນະ​ໂຍບານ​ການ​ຕ່າງປະ​ເທດ​ຂອງທ່ານ ​ໂອ​ບາ​ມາ​ກັບ​ບັນດາ​ຜູ້​ນໍາ​ໃນ​ຢູ​ໂຣບນັ້ນ. ​ແຕ່​ກໍ​ເປັນ​ທີ່ຄາດ​ກັນເຊ່ນ​ກັນ ວ່າ ປະທາ​ນາ​ທິບໍດີ​ໂອບາ​ມາ​ ພ້ອມ​ດ້ວຍ​ພວກຄູ່​ຕໍາ​ແໜ່​ງຈາກ​ຢູ​ໂຣບ ຈະສົນທະນາຫາລືກັນ​ເລື້ອງ​ສິ່ງ​ທ້າ​ທາຍ​ທີ່​ໜ້າ​ຢ້ານ​ກົວ​ຕ່າງໆ​ທີ່ພວກທ່ານພວມ​ປະ​ເຊີນຢູ່ໃນ​ການ​ພະຍາຍາມ​ຟື້ນ​ໂຕ​ຄືນ​ຈາກ​ສະພາວະ​ເສດຖະກິດ​ຕົກ​ຕໍ່າຂອງ​ໂລກ​ນັ້ນ.

ໃນໄລຍະ​ຫລາຍ​ໆມື້ຕໍ່ໜ້າ​ນີ້ ຜູ້​ນໍາ​ສະຫະລັດ​ມີແຜນ​ທີ່ຈະ​ທໍາ​ການ​ພົບ​ປະ​ກັນຄົນລະ​ເທື່ອ ​ກັບ​ທ່ານ David Cameron ນາຍົກລັດຖະມົນຕີອັງກິດ ປະທານາທິບໍດີ Dimitry Medvedev ​ແຫ່ງຣັດ​ເຊຍ ທ່ານ Nicolas Sarkozy ປະ​ທາ​ນາ​ທິບໍດີ​ຝຣັ່ງ ​ແລະ​ທ່ານ​ນະ​ໂອ​ໂຕ ກັນ ນາຍົກລັດຖະມົນຕີຍີ່ປຸ່ນ ​ແລະພົບ​ປະຮ່ວມ​ກັນ​ກັບ​ພວກ​ຜູ້ນໍາ​ອື່ນໆ​ອີກຂອງ​ໂລກ​.

ທ່ານໂອ​ບາ​ມາ​ພົບ​ປະ​ກັບ​ປະທານາທິບໍດີ​ແມຣີ ​ແມັກ​ອາລີ​ສ (Mary McAleese) ​ແລະ​ນາຍົກລັດຖະມົນຕີ Enda Kenny ​ແຫ່ງ Ireland ທີ່​ນະຄອນຫລວງ Dublin ​ໃນ​ຕອນ​ເຊົ້າ​ວັນ​ຈັນ​ມື້​ນີ້. ​ໃນ​ວັນ​ອັງຄານ​ມື້​ອື່ນ ທ່ານ​ໂອ​ບາ​ມາ​ຈະ​ເດີນທາງ​ໄປ​ຍັງ​ອັງກິດ​ເພື່ອ​ທໍາ​ການ​ຢ້ຽມຢາມ​ຢ່າງ​ເປັນທາງການ​ເປັນ​ເວລາ 2 ມື້ ຊຶ່ງ​ທ່ານປະທານາທິບໍດີ​ພ້ອມ​ດ້ວຍ ​ພັນລະ​ຍາ​ ທ່ານ​ນາງ Michelle Obama ຈະ​ພັກ​ຢູ່​ທີ່​ພະລາດ​ຊະ​ວັງ Buckingham ​ໃນ​ນາມ​ເປັນ​ແຂກ​ຂອງພະຣາຊິ​ນີ Elizabeth. ຫລັງ​ຈາກນັ້ນ ທ່ານ​ໂອ​ບາ​ມ້າ​ຈະ​ມຸ້ງ​ໜ້າ​ໄປ​ຍັງ​ປະ​ເທດ​ຝຣັ່ງ​ເພື່ອ​ເຂົ້າ​ຮ່ວມ​ໃນ​ກອງ​ປະຊຸມ​ສຸດ​ຍອດ​ຂອງ​ກຸ່ມ 8 ປະ​ເທດ​ຈະ​ເລີ​ນດ້ານ​ອຸດສາຫະກໍາ ​ແລະ​ບ່ອນ​ແວ່ແຫ່ງສຸດ​ທ້າຍ​ແມ່ນ​ປະ​ເທດ Poland ເພື່ອ​ທໍາ​ການ​ພົບປະ​ກັບ​ພວກ​ຜູ້​ນໍາ​ປະ​ເທດ​ໃນພາກ​ກາງ​ຢູ​ໂຣບ.

XS
SM
MD
LG