ທຳນຽບຂາວກ່າວວ່າ ປະທານາທິບໍດີ ບາຣັກ ໂອບາມາ ພວມຈະ
ຍຸດຕິ “ຍຸກທີ່ກໍ່ໃຫ້ເກີດວິກິດການ ແລະ ການປະຢັດມັດທະ
ຍັດທີ່ບໍ່ມີເຫດຜົນ” ຂະນະທີ່ທ່ານຕຽມຈະເປີດເຜີຍ ຮ່າງງົບ
ປະມານການໃຊ້ຈ່າຍປະຈຳປີ 2016 ຂອງທ່ານ.
ໃນຖະແຫລງຂ່າວສະບັບນຶ່ງໃນວັນພະຫັດວານນີ້ ທຳນຽບຂາວ
ກ່າວວ່າ ທ່ານ ໂອບາມາ ທີ່ສັງກັດພັກເດໂມແຄຣັດ ຈະຮຽກຮ້ອງ
ໃຫ້ລົບລ້າງ ການຕັດການໃຊ້ຈ່າຍແບບອັດຕະໂນມັດ ທີ່ທ່ານໄດ້
ຕົກລົງກັບບັນດາຜູ້ແທນພັກຣີພັບບລີກັນ ທີ່ເປັນຝ່າຍຄ້ານ ໃນ
ລະຫວ່າງ ວິກິດການດ້ານງົບປະມານເມື່ອປີ 2011 ທີ່ສະຫະລັດ
ໄດ້ດີ້ນຮົນເພື່ອຟື້ນໂຕຄືນ ຈາກສະພາບເສດຖະກິດຕົກຕ່ຳຂອງ
ໂລກນັ້ນ.
ຂໍ້ສະເໜີງົບປະມານປະຈຳປີ 2016 ຂອງທ່ານ ໂອບາມາ ທີ່ມີກຳນົດຈະເປີດເຜີຍ ໃນວັນ
ຈັນຈະມາເຖິງນີ້ ແມ່ນຈະຮຽກຮ້ອງໃຫ້ ເພີ້ມການໃຊ້ຈ່າຍຂຶ້ນ 7 ເປີເຊັນ ປະມານ 74 ຕື້
ດອນລາ ຊຶ່ງເປັນອັນທີ່ບັນດາພັກການເມືອງທັງຫຼາຍ ໄດ້ຕົກລົງກັນມາແລ້ວ ໃນເມື່ອກ່ອນ.
ທຳນຽບຂາວ ກ່າວວ່າ ການຕັດການໃຊ້ຈ່າຍແບບອັດຕະໂນມັດ ທີ່ຮູ້ຈັກກັນໃນວໍຊິງຕັນ
ວ່າ “sequestration” ນັ້ນ ໄດ້ສ້າງຄວາມເສຍ ຫາຍໃຫ້ແກ່ເສດຖະກິດສະຫະລັດ ແລະ
ກອງທັບຂອງຕົນອີກດ້ວຍ. ທຳນຽບຂາວກ່າວວ່າ ທ່ານໂອບາມາ ຈະຊອກຫາຊ່ອງທາງ
ເພື່ອ “ຕ່າວປີ້ນຄືນທັງໝົດ” ໃນການຕັດການໃຊ້ຈ່າຍພາຍໃນປະເທດຕ່າງໆ ພ້ອມ
ກັນນັ້ນ ກໍຈະເພີ້ມງົບປະມານການໃຊ້ຈ່າຍ ສຳຫລັບກອງທັບ ແລະ ໂຄງການປ້ອງກັນ
ປະເທດຕ່າງໆ ໃນຈຳນວນທີ່ເທົ່າທຽມກັນ.
ແຜນງົບປະມານປະຈຳປີດັ່ງກ່າວ ທີ່ຈະເລີ້ມນຳໃຊ້ໃນເດືອນ ຕຸລາຈະຮຽກຮ້ອງໃຫ້ເພີ້ມ
ການໃຊ້ຈ່າຍ ເພື່ອສ້າງຄວາມກ້າວໜ້າ ໃຫ້ແກ່ການຜະລິດ ການກໍ່ສ້າງທາງ ແລະຂົວຕ່າງໆ ແລະແນໃສ່ການຄົ້ນຄວ້າ ເພື່ອຮັກສາໃຫ້ຫາຍຂາດ ໂຣກເບົາຫວານ ແລະ ໂຣກມະເຮັງ. ງົບປະມານດັ່ງກ່າວ ຍັງຈະຮຽກຮ້ອງໃຫ້ມີມາດຕາການຕ່າງໆ ທີ່ແນໃສ່ ການຊ່ອຍເຫຼືອ ພວກຊົນຊັ້ນກາງຂອງປະເທດ ດ້ວຍການຫລຸດພາສີ ໃນການໃຊ້ຈ່າຍຮັກສາປິນປົວລູກເຕົ້າຂອງເຂົາເຈົ້າ ການຈ່າຍເງິນໃຫ້ເວລາພັກ ໃນຍາມເຈັບປ່ວຍ ແລະ ການໃຫ້ທຶນການສຶກສາຂັ້ນວິທະຍາໄລສອງປີ ສຳຫລັບບັນດານັກສຶກສາ.
ທຳນຽບຂາວ ກ່າວອີກວ່າ ການເພີ້ມງົບປະມານການໃຊ້ຈ່າຍ ສາມາດແລກປ່ຽນກັບ
“ການຕັດງົບປະມານການໃຊ້ຈ່າຍໃນໂຄງການຕ່າງໆທີ່ບໍ່ມີປະສິດທິຜົນ ແລະ
ປິດ ຊ່ອງວ່າງຕ່າງໆຂອງລະບົບພາສີ” ທີ່ນຳໃຊ້ໂດຍພວກເສຍພາສີທີ່ຮັ່ງມີນັ້ນ ແຕ່
ຫາກວ່າ ບໍ່ໄດ້ໃຫ້ລາຍລະອຽດໃດໆ ເພີ້ມຕື່ມ.
ພັກຣີພັບບລີກັນ ທີ່ຄວບຄຸມທັງສອງສະພາຂອງສະຫະລັດ ໄດ້ສະແດງການຄັດຄ້ານແລ້ວ
ຕໍ່ບາງດ້ານຂອງຮ່າງງົບປະມານປີ 2016 ຂອງທ່ານ ໂອບາມາ ໃນຂະນະທີ່ທ່ານເປີດເຜີຍ
ບາງສ່ວນໃຫ້ຊາບ ໃນຄຳປາໄສ ເມື່ອສອງສາມອາທິດຜ່ານມານີ້ ຮວມທັງຄຳປາໄສຕໍ່ສະພາ ແລະປະເທດ ຊາດຂອງທ່ານ.