ໃນການຖົກຖຽງໂຕ້ແຍ້ງກັນກັບລັດຖະສະພາ ກ່ຽວກັບການຂາດດຸນງົບປະມານແລະການລົດໜີ້ສິນຂອງລັດຖະບານແລະພາສີນັ້ນ ທ່ານໂອບາມາໄດ້ເນັ້ນຍໍ້າຢູ່ເລື້ອຍໆເຖິງຄວາມຈໍາເປັນ ສໍາລັບຄວາມສົມດຸນໃນການແກ້ໄຂງົບປະມານແຫ່ງຊາດທີ່ບໍ່ລົງຕົວນັ້ນແລະການເສຍສະລະ ຮ່ວມກັນ ແຕ່ວ່າໃນຂະນະດຽວກັນ ກໍບໍ່ສ້າງຄວາມເດືອດຮ້ອນໃຫ້ແກ່ພວກຊາວອາເມຣິກັນ ທີ່ທຸກຍາກທັງຫລາຍ.
ແຜນການຊຸດທີສອງຂອງທ່ານໂອບາມາ ຊຶ່ງຕິດຕາມມາຫລັງຈາກຂໍ້ສະເໜີສ້າງໜ້າວຽກ
ມູນຄ່າ 447 ພັນລ້ານໂດລາ ຫລື 447 ຕື້ໂດລາຂອງທ່ານ ຊຶ່ງໂຮມທັງຄໍາແນະນໍາຕໍ່
ຄະນະກໍາມະການລົດການຂາດດຸນງົບປະມານຮ່ວມຂອງລັດຖະສະພານັ້ນ ແມ່ນໄດ້ເພີ່ມ
ເດີມພັນຂຶ້ນອີກ ໃນການຕໍ່ສູ້ກັນທາງດ້ານການເມືອງກັບພັກຝ່າຍຄ້ານຣີພັບບລິກັນນັ້ນ.
ແຜນການດັ່ງກ່າວຈະປະຢັດການຂາດດຸງົບປະມານລົງໄດ້ຫລາຍກວ່າ 3,200 ຕື້ໂດລາໃນ
ສິບປີຕໍ່ໜ້າ ໂດຍຮວມເອົາການຕັດການໃຊ້ຈ່າຍລົງກັບການຂຶ້ນພາສີຊຸດໃໝ່ ໂຮມທັງການ
ເກັບພາສີໃນອັດຕາຕໍ່າສຸດຈາກພວກເສດຖີທັງຫລາຍ.
ພ້ອມກັບການຕັດລາຍຈ່າຍລົງ 1,000 ຕື້ໂດລາກ່ອນໜ້ານີ້ ທີ່ໄດ້ມາຈາກການປານີປານອມ
ທີ່ຍາກລໍາບາກກັບພັກຣີພັບບລິກັນນັ້ນ ຈໍານວນການຕັດລົງທັງໝົດ ກໍຈະຕົກເປັນ 4,400
ຕື້ໂດລາ ແລະຢູ່ໃນລະດັບຂອງອັນທີ່ເອີ້ນກັນວ່າ ການຕໍ່ຮອງກັນຄັ້ງໃຫຍ່ ທີ່ທ່ານໂອບາມາ
ໄດ້ເຫັນດີນໍາເມື່ອຕົ້ນປີນີ້ ແຕ່ພັກຣີພັບບລິກັນບໍ່ຍອມຮັບເອົານັ້ນ. ທ່ານໂອບາມາກ່າວວ່າ
“ມັນເປັນແຜນການທີ່ຈະລົດຜ່ອນໜີ້ສິນຂອງພວກເຮົາລົງໄດ້ ຫລາຍກວ່າ 4 ພັນຕື້
ໂດລາ ຊຶ່ງຈະບັນລຸການປະຢັດນີ້ໄດ້ ໃນແນວທາງທີ່ວ່າຍຸຕິທໍາ ໂດຍການຂໍຮ້ອງໃຫ້
ທຸກໆຄົນຈົ່ງກະທໍາໃນສ່ວນຂອງຕົນ ເພື່ອວ່າຈະບໍ່ມີຜູ້ໃດຕ້ອງແບບຫາບພາລະທີ່ໜັກ
ໜ່ວງເກີນໄປ ຕາມລໍາພັງ.”
ແຜນການຂອງທ່ານໂອບາມາ ແນເປົ້າໝາຍໃສ່ຊ່ອງວາງດ້ານພາສີ ທີ່ເອື້ອອໍານວຍຕໍ່
ພວກຮັ່ງມີ ແລະປ່ອຍໃຫ້ການຕັດພາສີທີ່ລັດຖະສະພາໄດ້ອະນຸມັດໃຫ້ ພາຍໃຕ້ລັດຖະ
ບານຂອງອະດີດປະທານາທິບໍດີພັກຣີພັບບລິກັນ ທ່ານ George W. Bush ນັ້ນ
ໝົດອາຍຸລົງຕາມກໍານົດທ້າຍປີນີ້. ແຜນການຂອງທ່ານໂອບາມາຍັງຮຽກຮ້ອງໃຫ້ມີການ
ປະຕິຮູບພາສີ ຢ່າງກວ້າງຂວາງອີກ.
ນອກນັ້ນແລ້ວ ກໍໂຮມເອົາທັງບາດກ້າວຕ່າງໆທີ່ພັກຣີພັບບລິກັນໄດ້ຕ້ານຢັນ ເຊ່ນການ
ລົບລ້າງການໂຍະຍານພາສີແກ່ພວກບໍລິສັດນໍ້າມັນແລະແກສ ຍຸຕິການໄດ້ປຽບດ້ານ
ພາສີຂອງພວກບໍລິຫານທີ່ມີເງິນເດືອນສູງຂອງພວກບໍລິສັດຫລັກຊັບທີ່ Wall Street
ແລະລົບລ້າງຜົນປະໂຫຍດຕ່າງໆສໍາລັບພວກທີ່ມີເຮືອບິນໄອພົ່ນ ສ່ວນຕົວ.
ນອກນີ້ແລ້ວ ແຜນການຂອງທ່ານໂອບາມາຍັງຫລິ່ງເຫັນການປະຢັດໄດ້ອີກ ໃນຈໍານວນ
1;100 ຕື້ໂດລາ ຈາກການລົດຈໍານວນທະຫານໃນອີຣັກແລະອັຟການີສຖານລົງ ແລະອີກ
250 ຕື້ໂດລາ ໃນໂຄງການອື່ນໆທີ່ຖືວ່າ ຈໍາເປັນຕ້ອງປະຕິບັດ ແລະລົດຄວາມຟຸ້ມເຟືອຍ
ຂອງລັດຖະບານລົງໂດຍການປັບປຸງອົງກອນຕ່າງໆຂອງລັດຖະບານກາງ.
ທ່ານໂອບາມາ ໄດ້ສະເໜີການ
ປະຢັດຫລາຍກວ່າ 300 ຕື້ໂດ
ລາ ຈາກໂຄງການເມດິແຄແລະ
ເມດິເຄດ ຊຶ່ງເປັນໂຄງການຮັກ
ສາສຸຂະພາບສໍາລັບພວກຄົນ
ເຖົ້າແລະພວກຄົນທຸກທີ່ຖືກັນວ່າ
ເປັນພາລະໜັກທາງເສດຖະກິດ
ແລະເປັນພາກສ່ວນນຶ່ງຂອງການ
ຕັດພວກໂຄງການທີ່ຕ້ອງປະຕິ
ບັດ ມູນຄ່າຫລາຍກວ່າ 5,000
ຕື້ໂດລານັ້ນ.
ປະທານາທິບໍດີໂອບາມາ ໄດ້
ຕອບໂຕ້ພວກນັກວິຈານຂອງ
ພັກຣີພັບບລິກັນ ແລະພັກນໍ້າ
ຊາ ອະນຸລັກນິຍົມ ຫລື Tea
Party ທີ່ກ່າວຫາທ່ານວ່າດໍາ
ເນີນສົງຄາມຊົນຊັ້ນ ໂດຍແນເປົ້າໝາຍໃສ່ພວກຮັ່ງມີ ເພື່ອເພີ່ມພາສີນັ້ນ.
ທ່ານໂອບາມາກ່າວວ່າ ທ່ານຈະປະຕິເສດສິ່ງໃດກໍຕາມທີ່ລົດສະວັດດີການລົງ ສໍາລັບພວກ
ທີ່ອາໃສກາງຕໍ່ໂຄງການສຸຂະພາບທີ່ສໍາຄັນຂອງລັດຖະບານ ແລະເງິນສະວັດດີການໄພສັງ
ຄົມ ເວັ້ນເສຍແຕ່ວ່າມີການຮ້ອງຂໍໃຫ້ພວກຮັ່ງມີຊາວອະເມຣິກັນ ແລະພວກບໍລິສັດໃຫຍ່ໆ
ທັງຫລາຍ ຈ່າຍພາສີເພີ່ມຂຶ້ນ. ທ່ານໂອບາມາກ່າວວ່າ
“ຂ້າພະເຈົ້າຈະບໍ່ສະໜັບສະໜຸນແຜນການໃດໆທີ່ເຮັດໃຫ້ພາລະແບບຫາບທັງໝົດໃນ
ການຖົມຂຸມງົບປະມານຂອງພວກເຮົານັ້ນ ຕົກຢູ່ທີ່ພວກຊາວອາເມຣິກັນທໍາມະດາສາມັນ.
ແລະຂ້າພະເຈົ້າກໍຈະໃຊ້ສິດຍັບຍັ້ງຍັດຕິໃດໆ ທີ່ປ່ຽນແປງສະວັດດີການສໍາລັບພວກທີ່ອາ
ໃສກາງຕໍ່ເມດິແຄ ແລະບໍ່ເພີ່ມລາຍໄດ້ຂຶ້ນຢ່າງຫລວງຫລາຍໂດຍການຮ້ອງຂໍໃຫ້ພວກ
ຊາວອະເມຣິກັນທີ່ຮັ່ງມີທີ່ສຸດ ຫລືພວກບໍລິສັດທີ່ໃຫຍ່ທີ່ສຸດ ມີສ່ວນອອກເງິນຮ່ວມຢ່າງ ຍຸດຕິທໍານັ້ນ.”
ທໍານຽບຂາວກ່າວວ່າ ການຈັດຕັ້ງປະຕິບັດແຜນການດັ່ງກ່າວ ແມ່ນຈະເຮັດໃຫ້ສະຫະລັດ
ຕົກຢູ່ໃນຖານະທີ່ວ່າ ການໃຊ້ຈ່າຍເພີ່ມຂຶ້ນໃດໆຂອງລັດຖະບານ ຈະບໍ່ເພີ່ມພູນເຂົ້າໃສ່ໜີ້
ສິນຂອງຊາດນັ້ນ ພາຍໃນ ປີ 2017 ຊຶ່ງໃນປັດຈຸບັນນີ້ ໜີ້ສິນຂອງຊາດແມ່ນມີຈໍານວນ
ຫລາຍກວ່າ 14 ພັນຕື້ໂດລາແລ້ວ.
ທ່ານ ທິມ ໄກ້ທ໌ເນີ ລັດຖະມົນຕີກະຊວງການເງິນ ກ່າວວ່າ
“ເປັນຫຍັງຕ້ອງແມ່ນຈໍານວນ 4 ພັນຕື້ໂດລາ? ນັ້ນຫລະຄືຈໍານວນທີ່ພວກເຮົາຕ້ອງ
ການເພື່ອລົດລະດັບການຂາດດຸນງົບປະມານລົງ ເພື່ອໃຫ້ສາມາດປະຄອງການໃຊ້
ຈ່າຍຂອງລັດຖະບານໄວ້ໄດ້ ໃນລະດັບນີ້ຕໍ່ໄປ.”
ພາຍໃຕ້ການປານີປານອມກັນເລື່ອງການຂາດດຸນງົບປະມານຄັ້ງຜ່ານມາ ຊຶ່ງພັກຣີພັບ
ບລິກັນໄດ້ເອົາໄປພົວພັນ ກັບເພດານໜີ້ສິນຂອງຊາດນັ້ນ ຄະນະກໍາມະການຮ່ວມຂອງ
ລັດຖະສະພາສະພາ ແມ່ນຈະຕ້ອງຊອກຫາທາງຕັດການໃຊ້ຈ່າຍລົງ ຫລືປະຢັດໃຫ້ໄດ້
ຕື່ມອີກ 1,500 ຕື້ໂດລາພາຍໃນທ້າຍເດືອນພະຈິກປີນີ້. ຖ້າເຮັດບໍ່ໄດ້ ກໍໝາຍຄວາມວ່າ
ຈະມີການການຕັດລົງໂດຍອັດຕະໂນມັດ.
ເບິ່ງວີດີໂອກ່ຽວກັບຄໍາປາໄສປະຈໍາສັບປະດາຂອງທ່ານໂອບາມາ ຮຽກຮ້ອງໃຫ້ສະພາ
ຮັບຜ່ານ ຮ່າງກົດໝາຍສ້າງວຽກງານຂອງທ່ານ ຫລື the American Jobs Act:
