ລາຍງານກ່ຽວກັບໜ້າວຽກຂອງລັດຖະບານ ທີ່ຖືກນໍາອອກເຜີຍແຜ່ເມື່ອວັນສຸກອາທິດແລ້ວນີ້ ສະແດງໃຫ້ເຫັນວ່າ ໄດ້ ມີການສ້າງໜ້າວຽກເພີ້ມ ຂຶ້ນເຖິງ 244,000 ວຽກ ຢູ່ໃນ ສະຫະລັດ ໃນເດືອນແລ້ວນີ້ ຊື່ງແມ່ນດີກ່ວາ ທີ່ພວກນັກເສດຖະສາດທັງຫລາຍໄດ້ທໍານາຍໄວ້.
ປະທານາທິບໍດີ ໂອບາມາ ໄດ້ໄປຢ້ຽມຢາມໂຮງງານແຫ່ງນຶ່ງ ໃນເມືອງ Indianapolis ລັດອິນເດຍນາ ແລະ ບອກພວກຄົນງານຢູ່ທີ່ນັ້ນວ່າ ພາກສ່ວນເອກະຊົນຂອງສະຫະລັດ ໄດ້ສ້າງໜ້າວຽກເພີ່ມຂຶ້ນທຸກໆເດືອນ ມາເປັນເວລາປີກວ່າແລ້ວ. ປະທານາທິບໍດີ ໂອບາມາ ກ່າວຕໍ່
ໄປວ່າ:
“ນັ້ນໝາຍຄວາມວ່າ ຕະຫລອດໄລຍະ 14 ເດືອນຜ່ານມາ ຄືພຽງປີປາຍເທົ່ານັ້ນ ພວກ
ເຮົາໄດ້ເພີ່ມໜ້າວຽກຕື່ມອີກຫລາຍກວ່າສອງລ້ານໜ້າວຽກ ໃນພາກສ່ວນເອກະຊົນ.”
ແຕ່ວ່າອັດຕາການຫວ່າງງານໄດ້ຖີບສູງຂຶ້ນ ຄືຈາກ 8.8 ເປີເຊັນໃນເດືອນມີນາ ມາເປັນ
9.0 ເປີເຊັນໃນເດືອນເມສາ ຊຶ່ງສ່ວນໃຫຍ່ແມ່ນເປັນຍ້ອນວ່າ ພວກຄົນຫວ່າງງານທີ່ໄດ້ຢຸດ
ເຊົາຊອກວຽກໄປນັ້ນ ໄດ້ພາກັນເລີ່ມຊອກວຽກຄືນອີກ.
ຢ່າງໃດກໍຕາມ ປະທານາທິບໍດີ ໂອບາມາ ກ່າວວ່າ ເວລານີ້ ເສດຖະກິດຂອງປະເທດກໍາ
ລັງກ້າວໄປໃນທິດທາງທີ່ຖືກຕ້ອງ ເຖິງແມ່ນກໍາລັງມີອັນທີ່ທ່ານເອີ້ນວ່າ ລົມຕ້ານຢ່າງແຮງ
ເຊັ່ນລາຄານໍ້າມັນແອສຊັງທີ່ກໍາລັງຖີບຕົວສູງຂື້ນນັບມື້ນັ້ນ ກໍຕາມ. ທ່ານໂອບາມາກ່າວວ່າ:
“ພວກເຮົາໄດ້ປະເຊີນກັບລາຄາ
ນໍ້າມັນແອສຊັງທີ່ແພງຂຶ້ນ ທີ່ໄດ້
ກັດກິນເງິນເດືອນຂອງທ່ານໄປ
ຫລາຍຂຶ້ນ ແລະນັ້ນກໍຄືລົມຕ້ານ
ທີ່ພວກເຮົາຈະຕ້ອງໄດ້ຮັບມືກັບ
ມັນ. ແລະກໍມີເຫດການແຜ່ນ
ດິນໄຫວໃນຍີ່ປຸ່ນ ທີ່ໄດ້ສ້າງຜົນ
ກະທົບອັນໃຫຍ່ຫລວງ ຕໍ່ການ
ຜະຫລິດຕ່າງໆຢູ່ປະເທດເຮົາ ເຊັ່ນກັນ.”
ທ່ານໂອບາມາກ່າວວ່າ ແນ່ນອນ
ມັນຈະຕ້ອງມີຂື້ນມີລົງ ໃນຂະນະ
ທີ່ປະເທດຊາດກ້າວອອກຈາກສະ
ພາວະເສດຖະກິດຕົກຕໍ່ານັ້ນ ແຕ່
ທ່ານກ່າວວ່າ ທ່ານຍັງມີຄວາມ
ຫວັງແລະກໍາລັງໃຈຢູ່ ກ່ຽວກັບອະນາຄົດຂອງເສດຖະກິດຂອງສະຫະລັດນັ້ນ ຊຶ່ງທ່ານກ່າວຕໍ່ໄປວ່າ:
“ແຕ່ຄວາມຈິງແລ້ວ ພວກເຮົາກໍຍັງກໍາລັງທໍາຄວາມກ້າວໜ້າຢູ່ ແລະນັ້ນພິສູດໃຫ້ເຫັນ
ເຖິງຄວາມສາມາດໃນການກັບຄືນສູ່ສະພາບເດີມຂອງເສດຖະກິດອາເມຣິການັ້ນ ວ່າ
ມີລະດັບສູງປານໃດ ແລະພວກຄົນງານອາເມຣິກັນກໍມີຄວາມສາມາດທີ່ຈະກັບຄືນສູ່
ສະພາບເດີມໄດ້ຢ່າງໃດ ແລະສະແດງໃຫ້ເຫັນວ່າ ພວກເຮົາສາມາດລົ້ມລົງໄດ້ ແລະ
ກໍສາມາດລຸກຂຶ້ນແລະພາກັນເດີນໜ້າຕໍ່ໄປໄດ້. ນັ້ນຫລະຄືສິ່ງທີ່ພວກເຮົາກໍາລັງເຮັດຢູ່ ໃນເວລານີ້.”
ໂດຍບໍ່ນັບໜ້າວຽກທີ່ຖືກຕັດລົງໂດຍລັດຖະບານຕ່າງໆ ທັງໃນລະດັບທ້ອງຖິ່ນ ລະດັບລັດ
ແລະລະດັບຊາດ ກໍຄືລັດຖະບານກາງນັ້ນ ເສດຖະກິດສະຫະລັດໄດ້ສ້າງໜ້າວຽກໃໝ່ຂຶ້ນອີກ
268,000 ວຽກໃນເດືອນແລ້ວນີ້ ຊຶ່ງແມ່ນຫລາຍທີ່ສຸດນັບຕັ້ງແຕ່ເດືອນກຸມພາປີ 2006 ມາ.
ນັບເປັນເດືອນທີສາມລຽນຕິດ ທີ່ໄດ້ມີການສ້າງໜ້າວຽກເພີ່ມຂຶ້ນຫລາຍກວ່າ 200,000 ໜ້າ
ວຽກ ແລະໜ້າວຽກທີ່ໄດ້ສ້າງເພີ່ມຂຶ້ນໃນເດືອນກຸມພາແລະເດືອນມີນານັ້ນ ກໍໄດ້ຖືກປັບໂຕ
ເລກໃຫ້ສູງຂື້ນ.
ແຕ່ແນວໃດກໍຕາມ ກໍປາກົດວ່າຍັງມີຊາວອາເມຣິກັນທີ່ຫວ່າງງານຢູ່ໃນຈໍານວນ 13 ລ້ານ
7 ແສນຄົນໃນເດືອນແລ້ວນີ້ ຊຶ່ງເປັນຈໍານວນເກືອບສອງເທົ່າຂອງເດືອນດຽວກັນ ເມື່ອປີ
2007 ກ່ອນເສດຖະກິດເລິ່ມເຂົ້າສູ່ສະພາວະຖອຍຫລັງນັ້ນ.
ໂດຍລວມແລ້ວ ໂຕເລກກ່ຽວກັບໜ້າວຽກໃໝ່ນີ້ຊີ້ໃຫ້ເຫັນວ່າ ວົງການທຸລະກິດທັງຫລາຍ
ແມ່ນມີຄວາມໝັ້ນໃຈໃນເສດຖະກິດ ແລະເຕັມໃຈທີ່ຈະວ່າຈ້າງຄົນງານຕື່ມ ເຖິງແມ່ນມີການ
ເຕີບໂຕທີ່ຊັກຊ້າແດ່ໃນຕົ້ນປີ ບວກກັບລາຄາພະລັງງານທີ່ຖີບຕົວສູງຂຶ້ນກໍຕາມ.
