ການເພ່ງເລັງໃສ່ດ້ານເສດຖະກິດຂອງປະທານາທິບໍດີໂອບາມາ ແມ່ນມີຂຶ້ນ ໃນລະຫວ່າງການກ່າວຄໍາປາໄສ ທີ່ມະຫາວິທະຍາໄລຊຸມຊົນທ້ອງຖິ່ນແຫ່ງນຶ່ງທີ່ເມືອງ Cleveland ລັດໂອໄຮໂອ ຊຶ່ງເປັນລັດນຶ່ງໃນຫຼາຍໆລັດທີ່ເປັນ ບ່ອນໂຄສະນາຫາສຽງຕໍ່ສູ້ກັນຢ່າງດຸເດືອດ ທີ່ຈະຕັດສິນວ່າຜູ້ໃດຈະເປັນຜູ້ຊະນະໃນການເລືອກຕັ້ງເດືອນພະຈິກປີນີ້.
ທ່ານໂອບາມາ ໄດ້ປ້ອງກັນປະຫວັດຜົນງານດ້ານເສດຖະກິດຂອງທ່ານເອງ ແລະໄດ້ເຕືອນເຖິງຜົນສະທ້ອນທີ່ຈະຕາມມາຖ້າຫາກພັກຣີພັບບລິກັນຊະນະການເລືອກຕັ້ງໃນເດືອນພະຈິກນີ້.
ທ່ານໂອບາມາກ່າວວ່າ: “ພວກເຮົາຈະເຮັດໃຫ້ອະນາຄົດຂອງພວກເຮົາເສຍຫາຍບໍ່ໄດ້ ໂດຍການເຮັດຄືນອີກຊໍ້າສອງ ຄວາມຜິດຂອງອະດີດຜ່ານມາ. ບໍ່ ບໍ່ແມ່ນດຽວນີ້ ບໍ່ແມ່ນໃນເວລາທີ່ມີເດີມພັນກັນຫຼາຍທີ່ສຸດນັ້ນ.”
ຢູ່ໃນອີກແຫ່ງນຶ່ງຂອງລັດໂອໄຮໂອ ຄືທີ່ເມືອງ Cincinnati ທ່ານ ມິດ ຣອມນີ ສັງກັດພັກຣີພັບບລິກັນ ທີ່ຄາດກັນວ່າຈະເປັນຜູ້ສະໝັກເລືອກຕັ້ງແຂ່ງກັບປະທານາທິບໍດີໂອບາມານັ້ນ ກໍໄດ້ສະເໜີແຜນການຂອງທ່ານເອງ ແລະກ່າວໂຈມຕີປະຫວັດຜົນງານຂອງທ່ານໂອບາມາ ກ່ຽວກັບການສ້າງໜ້າວຽກ ແລະໜີ້ສິນ ຊຶ່ງທ່ານກ່າວວ່າ:
“ທ່ານຢາກໄດ້ຜົນງານແບບນັ້ນຕື່ມອີກສີ່ປີຫວະ? ທ່ານເອີ້ນວ່າ ມັນເປັນການເດີນໜ້າຫວະ? ເດີນໜ້າໄປຕົກເຫວນັ້ນຕີ໊. ນັ້ນຄືການເດີນໜ້າໄປຍັງປະເທດກຣີສຫຼາຍກວ່າ. ຂ້າພະເຈົ້າບໍ່ຕ້ອງການແບບນັ້ນ. ຂ້າພະເຈົ້າຈະ ນໍາເອົາອາເມຣິກາ ກັບຄືນເຂົ້າມາຢູ່ໃນເສັ້ນທາງແຫ່ງການມີງົບປະມານທີ່ສົມດຸນໃຫ້ໄດ້ໃນທີ່ສຸດ ແລະພວກເຮົາຈະລົດຂະໜາດ
ຂອງລັດຖະບານໃຫ້ນ້ອຍລົງກວ່າເກົ່າ.”
ທີ່ນະຄອນ Los Angeles ລັດແຄລິຟໍເນຍ ນາຍ Andre Henry ທີ່ຕົກງານ ບໍ່ມີວຽກເຮັດ ແລະເສຍເຮືອນໄປ ຕ້ອງອາໄສຢູ່ໃນລົດຕູ້ຂອງລາວ ແລະບໍ່ມີເວລາສົນໃຈນໍາເລື່ອງການເມືອງ. ລາວກ່າວວ່າ ທ່ານໂອບາມາວ່າ ຈະແກ້ໄຂບັນຫາເສດຖະກິດໃຫ້ໄດ້ພາຍໃນສອງປີ ແຕ່ວ່າມັນດົນເຕີບແລ້ວ.
ນາຍ ເຮັນຣີ ປະທັງຊີວິດຢູ່ລອດດ້ວຍການເຮັດວຽກສ້ອມແປງເລັກໆນ້ອຍໆໃຫ້ແກ່ເພື່ອນບ້ານ ນາຍເຮັນຣີ ເວົ້າວ່າ:
“ມັນຄ້າຍກັບວ່າເປັນຄົນໝົດຕົວເນາະ ບໍ່ມີລາຍໄດ້. ເຮົາມີລາຍຈ່າຍ ມີໜີ້ຕ້ອງຊໍາລະ
ແລະກໍບໍ່ມີເງິນຊໍາລະໜີ້ ຈັ່ງແມ່ນວຸ້ນວາຍສັບສົນແທ້ໆ. ດຽວນີ້ ຂ້ອຍຕ້ອງໄດ້ຊຸກຫົວ
ນອນຢູ່ໃນລົດຕູ້ຂ້ອຍ ເພາະບໍ່ສາມາດຈະຮັກສາເຮືອນໄວ້ໄດ້ ຍ້ອນວ່າຕົກງານ. ບໍ່ມີ
ໃຜໃຊ້ຈ່າຍເງິນເລີຍດຽວນີ້ ເພາະວ່າເສດຖະກິດຝືດເຄືອງຫລາຍ.”
ວີດີໂອລາຍງານພາສາອັງກິດ:
John Fortier ນັກວິເຄາະການເມືອງກ່າວວ່າ ການບໍລິຫານເສດຖະກິດຂອງປະທານາທິບໍດີ ຄືບັນຫາແກນກາງຂອງການໂຄສະນາຫາສຽງເລືອກຕັ້ງປີນີ້. ທ່ານ ຟໍເຈຍ ກ່າວວ່າ:
“ທ່ານໂອບາມາໄດ້ຮັບຄະແນນນິຍົມໃນລະດັບປານກາງ ຈາກປະຊາຊົນທີ່ເຫັນດີ
ນໍາການບໍລິຫານງານຂອງທ່ານ ຄືຢູ່ໃນລະຫວ່າງ 47 ເປີເຊັນ ຫຼືປະມານນັ້ນ ຊຶ່ງ
ເບິ່ງຄືວ່າມັນຈະເປັນການເລືອກຕັ້ງທີ່ສູສີກັນ ແລະຖ້າຫາກວ່າ ເສດຖະກິດຍັງຢູ່
ໃນສະພາບຝືດເຄືອງຢ່າງໜັກ ດັ່ງທີ່ເປັນຢູ່ໃນປັດຈຸບັນນີ້ແລ້ວ ຂ້າພະເຈົ້າຄິດວ່າ
ຈະເປັນການເລືອກຕັ້ງທີ່ສູສີກັນທີ່ສຸດ.”
ໃນລະຫວ່າງນີ້ ໄປຫາເດືອນພະຈິກ ທັງປະທານາທິບໍດີໂອບາມາ ແລະ ທ່ານ ມິດ ຣອມນີ ຕ່າງກໍຈະພະຍາຍາມເກ້ຍກ່ອມພວກປ່ອນບັດທີ່ຍັງມີຄວາມແຄງໃຈສົງໄສທັງຫຼາຍ ໃຫ້ເຂົ້າໃຈວ່າ ພວກທ່ານກໍຮູ້ສຶກເຫັນໃຈນໍາ ຄວາມເດືອດຮ້ອນທາງເສດຖະກິດຂອງພວກເຂົາເຈົ້າ ແລະ
ກໍມີແຜນການກອບກູ້ເສດຖະກິດທີ່ດີທີ່ສຸດ. ແຕ່ນາຍ Andre Henry ກ່າວວ່າ
“ມັນບໍ່ແມ່ນສິ່ງທີ່ເພີ່ນເວົ້າ ແຕ່ມັນຢູ່ທີ່ວ່າ ເພີ່ມຈະປະຕິບັດໃນສິ່ງທີ່ເພິ່ນເວົ້າຫລືບໍ່?
ເພີ່ນຈະເຮັດຕາມທີ່ເວົ້າໄປຫລືບໍ່ ຊຶ່ງສ່ວນຫຼາຍແລ້ວ ພວກເພິ່ນແມ່ນບໍ່ເຮັດຕາມທີ່
ເວົ້າໄປ. ສໍາລັບຂ້ອຍແລ້ວ ການເປັນປະທານາທິບໍດີ ມັນເປັນຕໍາແໜ່ງທີ່ເຮົາຕ້ອງ
ດູແລເບິ່ງແຍງສຸກທຸກຂອງປະຊາຊົນອາເມຣິກັນທັງໝົດ.”
ເວົ້າແລ້ວ ນາຍເຮັນຣີ ກໍອອກໄປຊອກເຮັດວຽກເລັກໆນ້ອຍໆ ແລະປະເຊີນກັບອະນາຄົດ
ທີ່ບໍ່ແນ່ນອນ.