ລິ້ງ ສຳຫລັບເຂົ້າຫາ

ສະພາບເສດຖະກິດ ອາດເປັນບັນຫາ ຕໍ່ທ່ານໂອບາມາ

  • ໄພສານ ວໍຣະຈັກ

ປະທານາທິບໍດີສະຫະລັດ ທ່ານບາຣັກ ໂອບາມາ ກ່າວເຖິງຄວາມສຳຄັນ ໃນການຝຶກອົບຮົມ ແລະການກະກຽມ ພວກຄົນງານເພື່ອແຂ່ງເອົາວຽກເຮັດງານທຳໃນດ້ານການຜະລິດຢູ່ໃນທົ່ວປະເທດທີ່ອາເລັກຊານເດຍລັດເວີຈີເນຍ (7 ມິຖຸນາ 2011)

ໃນດ້ານການເມືອງກ່ຽວກັບການເລືອກຕັ້ງປະທານາທິບໍດີສະຫະລັດນັ້ນ ການຢັ່ງຫາງສຽງຄັ້ງ ໃໝ່ຂອງປະຊາຊົນ ແມ່ນມີຮ່ອງຮອຍ ຂອງຄຳເຕືອນບາງຢ່າງ ສຳລັບປະທານາທິບໍດີບາຣັກ ໂອບາມາໃນຂະນະທີ່ທ່ານກະກຽມເຂົ້າແຂ່ງຂັນໃນການເລືອກຕັ້ງປະທານາທິບໍດີໃນປີ 2012. ຜູ້ສື່ຂ່າວແຫ່ງຊາດຂອງວີໂອເອ Jim Malone ມີລາຍງານກ່ຽວກັບເລື່ອງນີ້ຈາກກຸງວໍຊິງຕັນ

ການຢັ່ງຫາງສຽງເທື່ອຫຼ້າສຸດຂອງໜັງສືພິມ Washintong Post ຮ່ວມກັບຕາໜ່າງໂທລະ
ພາບ ABC ຂອງສະຫະລັດພົບວ່າ ຄວາມເຫັນຂອງປະຊາຊົນກ່ຽວກັບສະພາບເສດຖະກິດ
ພາຍໃນປະເທດແມ່ນມີຄວາມບໍ່ພໍໃຈຫຼາຍຂຶ້ນແລະມີຊາວອະເມຣິກັນໃນຈຳນວນເພີ່ມຂຶ້ນຖືວ່າ
ປະທານາທິບໍດີໂອບາມາເປັນຜູ້ຮັບຜິດຊອບ.

ໜັງສືພິມ Washintong Post ແລະໂທລະພາບ ABC ພົບວ່າໃນສັດສ່ວນ 59 ຕໍ່ 40
ເປີເຊັນຂອງຊາວອະເມຣິກັນ ບໍ່ເຫັນພ້ອມກັບການຮັບມື ຫຼືການຈັດການໃນດ້ານເສດຖະກິດ
ຂອງປະທານາທິບໍດີທີ່ຍັງສືບຕໍ່ເປັນບັນຫາສຳຄັນສຳລັບບັນດາຜູ້ມີສິດປ່ອນບັດໃນການເລືອກ
ຕັ້ງປີໜ້ານຳດ້ວຍ.

ຜົນການຢັ່ງຫາງສຽງທີ່ວ່ານີ້ ມີຂຶ້ນຫຼັງຈາກໄດ້ມີການນຳເຜີຍແຜ່ລາຍງານກ່ຽວກັບເລື່ອງວຽກ
ເຮັດງານທຳທີ່ຂີ້ຮ້າຍກວ່າທີ່ໄດ້ຄາດການໄວ້ໃນສັບປະດາກ່ອນ ຊຶ່ງສະແດງໃຫ້ເຫັນວ່າ ອັດ
ຕາຄົນຫວ່າງງານຂອງສະຫະລັດໄດ້ເພີ່ມຂຶ້ນເປັນ 9.1% ທີ່ພວກນັກຊ່ຽວຊານທາງດ້ານການ
ເມືອງກ່າວວ່າເປັນອັດຕາທີ່ສູງເກີນໄປສຳລັບປະທານາທິບໍດີທີ່ຕ້ອງການຢາກສະມັກເຂົ້າແຂ່ງ
ຂັນເອົາຕຳແໜ່ງຕື່ມອີກນັ້ນ.

ທ່ານໂອບາມາ ໄດ້ເວົ້າເຖິງບັນຫາດັ່ງກ່າວ ທີ່ກອງປະຊຸມຖະແຫຼງຂ່າວ ຢູ່ທຳນຽບຂາວເມື່ອ
ໄວໆມານີ້.

ປະທານາທິບໍດີໂອບາມາກ່າວວ່າ “ພວກເຮົາໄດ້ກຳນົດເສັ້ນທາງໄວ້ແລ້ວ ທີ່ຈະນຳ
ພາພວກເຮົາໄປສູ່ການມີເສດຖະກິດເຕີບໂຕ ໃນໄລຍະຍາວ. ແຕ່ພວກເຮົາຍັງ
ມີວຽກງານອັນໃຫຍ່ຫຼວງຕ້ອງໄດ້ກະທຳ ຕາບໃດທີ່ຍັງມີຜູ້ຄົນຈຳນວນ ນຶ່ງທີ່ບໍ່ມີ ວຽກເຮັດງານທຳພາກັນຊອກຫາວຽກການເຮັດດ້ວຍເຫດນີ້ໃນທຸກໆ ຊົ້າເວລາ
ຂ້າພະເຈົ້າຕື່ນຂຶ້ນມາ ຂ້າພະເຈົ້າກໍຄິດກ່ຽວກັບວ່າຈະເຮັດວິທີໃດ ພວກເຮົາຈຶ່ງ
ຈະໃຫ້ຜູ້ຄົນເຫຼົ່າມີວຽກການເຮັດຄືນໃໝ່ອີກ.”

ການຟຶ້ື້ນໂຕຄືນຂອງເສດຖະກິດທີ່ບໍ່ເຂັ້ມແຂງແມ່ນຈຸດເພັ່ງເລັງທີ່ສຳຄັນຂອງພັກຣີພັບບລີ
ກັນທີ່ພວມຊອກຫາຊ່ອງທາງ ເພື່ອຢາກຈະເອົາຊະນະປະທານາທິບໍດີໂອບາມາ ໃນການ
ເລືອກຕັ້ງປີໜ້າ.

ອະດີດຜູ້ປົກຄອງລັດມິນເນໂຊຕ້າທ່ານ Tim Pawlenty ໄດ້ເປີດເຜີຍແຜນການເສດຖະ
ກິດຂອງທ່ານທີ່ນະຄອນ Chicago ທີ່ຮວມທັງການຕັດ ທັງໃນດ້ານການໃຊ້ຈ່າຍ ແລະ
ດ້ານພາສີນຳດ້ວຍ.

ທ່ານ Pawlenty ເວົ້າວ່າ “ປະທານາທິບໍດີມີຄວາມເພິ່ງພໍໃຈ ກັບເສດຖະກິດຊັ້ນ
2 ຂອງອະເມຣິກັນທີ່ຜະລິດໂດຍນະໂຍບາຍຊັ້ນ 3 ຂອງທ່ານ. ແຕ່ຂ້າພະເຈົ້າ ບໍ່ພໍໃຈເລີຍກ່ຽວກັບເລື່ອງນີ້.”

ການຢັ່ງຫາງສຽງຂອງໜັງສືພິມ Washintong Post ແລະໂທລະພາບ ABC ຍັງພົບ
ວ່າປະທານາທິບໍດີໂອບາມາຈະເອົາຊະນະຢ່າງງ່າຍດາຍຕໍ່ບັນດາຜູ້ສະມັກເປັນປະທານາທິ
ບໍດີສ່ວນໃຫຍ່ຂອງພັກຣີພັບບລີກັນ ຖ້າການເລືອກຕັ້ງຫາກມີຂຶ້ນໃນເວລານີ້. ແຕ່ການຢັ່ງ
ຫາງສຽງພົບວ່າທ່ານມີຄະແນນທໍ່ໆກັນກັບອະດີດຜູ້ປົກຄອງລັດ Massachusetts ທ່ານ
Mitt Romney ຜູ້ທີ່ຍັງສືບຕໍ່ມີຄະແນນສຽງນຳໜ້າໝູ່ ໃນການຢັ່ງຫາງສຽງເບິ່ງພວກສະ ໜັບສະໜຸນຕໍ່ຜູ້ສະມັກຂອງພັກຣີພັບບລີກັນນັ້ນ.

ທ່ານ Mitt Romney
ທ່ານ Mitt Romney

ຂະນະດຽວ ກັນການຢັ່ງຫາງສຽງຈຳນວນ
ນຶ່ງເມື່ອໄວໆມານີ້ພົບວ່າ ສະມາຊິກຂອງ
ພັກຣີພັບບລີກັນຈຳນວນຫຼວງຫຼາຍ ຍັງບໍ່
ພໍໃຈ ກັບພວກທີ່ສະມັກເຂົ້າແຂ່ງຂັນເອົາ
ຕຳແໜ່ງປະທານາທິບໍດີ ທີ່ມີຢູ່ໃນປັດຈຸບັນ
ນີ້. ແຕ່ຜູ້ປົກຄອງລັດ Mississippi ທ່ານ
Haley Barbour ກ່າວຕໍ່ລາຍການ Face
the Nation ຂອງໂທລະພາບ CBS ວ່າ
ຜູ້ສະມັກຂອງພັກຣີພັບບລີກັນສາມາດປະ
ສົບກັບຄວາມສຳເລັດ ໃນການເລືອກຕັ້ງ
ປີໜ້າຖ້າພວກເຂົາເຈົ້າ ຫາກຍັງສືບຕໍ່ເພັ່ງ
ເລັງໃສ່ການຈັດການ ກ່ຽວກັບເລື່ອງເສດ
ຖະກິດຂອງປະທານາທິບໍດີ.

ທ່ານ Barbour ເວົ້າວ່າ “ຂ້າພະເຈົ້າຄິດວ່າເຫດການໃນທຳນອງດຽວກັນ ສາມາດ
ເກີດຂຶ້ນໄດ້ສຳລັບພວກເຮົາຖ້າການເລືອກຕັ້ງ ແມ່ນກ່ຽວກັບນະໂຍບາຍຂອງທ່ານ ໂອບາມາແລະຜົນຂອງນະໂຍບາຍເຫຼົ່ານີ້. ນັ້ນແມ່ນກະແຈສຳຄັນ ສຳລັບການໂຄ ສະນາຫາສຽງຂອງພັກຣີພັບບລີກັນໃນປີ 2012.”

ທ່ານ James Carville ເປັນທີ່ປຶກສາທາງດ້ານການເມືອງຄົນສຳຄັນຂອງອະດີດປະທານາ
ທິບໍດີ Bill Clinton ໃນຊຸມປີ 1990 ຊຶ່ງທ່ານໄດ້ກ່າວຕໍ່ລາຍການ Good Morning A-
merica ຂອງໂທລະພາບ ABC ວ່າປະທານາທິບໍດີໂອບາມາຕ້ອງໄດ້ດຳເນີນການເພີ່ມຕື່ມ
ກ່ຽວກັບການຢັ່ງຮູ້ຫຼືເຂົ້າໃຈເຖິງຄວາມຮູ້ສຶກຂອງຊາວອະເມຣິກັນທີ່ພວມດີ້ນຮົນຕໍ່ສູ້ໃນການ
ຊອກຫາວຽກເຮັດງານທຳຫຼືປົກປັກຮັກສາເຮືອນຊານຂອງພວກເຂົາເຈົ້າບໍ່ໃຫ້ຖືກຢຶດ.

ທ່ານ Carville ເວົ້າວ່າ “ອາດມີຫຼາຍໆສິ່ງຫຼາຍໆຢ່າງທີ່ທ່ານສາມາດກ່າວເຖິງແຕ່ ທ່ານຕ້ອງໄດ້ເຂົ້າໄປໃນທີ່ນັ້ນແລ້ວ ກໍຮຳແຂນເສື້ອຂຶ້ນແລະກໍເວົ້າວ່າ ຂ້ອຍໄດ້ຕໍ່
ສູ້ກັບສິ່ງນີ້ທຸກໆມື້ນີ້ແມ່ນສິ່ງທີ່ພວກເຮົາກຳລັງກະທຳແລະມັນເປັນສິ່ງທີ່ພວກເຮົາ
ຈຳເປັນຕ້ອງໄດ້ເຮັດ. ຂ້ອຍເຂົ້າໃຈດີກ່ຽວກັບວ່າແມ່ນຫຍັງໄດ້ ເກີດຂຶ້ນໃນຊີວິດ
ຂອງເຈົ້າ.”

ການຢັ່ງຫາງສຽງເທື່ອຫຼ້າສຸດຂອງໜັງສືພິມ Washintong Post ແລະໂທລະພາບ ABC
ຍັງພົບວ່າ ອັດຕາການອະນຸມັດໂດຍທົ່ວໄປ ກ່ຽວກັບວຽກງານ ທີ່ປະທານາທິບໍດີໂອບາມາ
ໄດ້ເຮັດໄປນັ້ນ ໄດ້ຫຼຸດລົງເປັນ 47% ເຫັນພ້ອມນຳ ແລະອີກ 49% ບໍ່ເຫັນພ້ອມ ຊຶ່ງເປັນ
ການຫຼຸດລົງນ້ອຍນຶ່ງ ຈາກລະດັບທີ່ທ່ານໄດ້ຮັບ ລຸນຫຼັງໜ່ວຍກ້າຕາຍຂອງສະຫະລັດໄດ້ບຸກ
ເຂົ້າໄປສັງຫານນາຍໂອຊາມາບິນລາເດັນຜູ້ນຳກຸ່ມກໍ່ການຮ້າຍອາລກາຍດານັ້ນ.

ນັກສຳຫຼວດຄວາມເຫັນຂອງມາຫາວິທະຍາໄລ Quinnipiac ທ່ານ Peter Brown ກ່າວ
ວ່າ ຄະແນນເພີ່ມຂຶ້ນທີ່ທ່ານໄດ້ຮັບ ຍ້ອນການສັງຫານນາຍໂອຊາມາບິນລາເດັນນັ້ນອາດ
ກາຍເປັນຄວາມຊົງຈຳໄປແລ້ວ ເມື່ອເຖິງເວລາໃນການເລືອກຕັ້ງປະທານາທິບໍດີສະຫະລັດ
ໃນເດືອນພະຈິກປີໜ້າ.

ທ່ານ Brown ເວົ້າວ່າ “ການເລືອກຕັ້ງ ແມ່ນເປັນການລົງປະຊາມະຕິສະເໝີ ສຳ ລັບຜູ້ທີ່ເຂົ້າແຂ່ງຂັນເອົາຕຳແໜ່ງຕື່ມອີກ. ຖ້າຈະເວົ້າແທ້ໆແລ້ວ ການເລືອກຕັ້ງ
ໃນປີ 2012 ຈະແມ່ນກ່ຽວກັບເສດຖະກິດຂອງສະຫະລັດ ກ່ຽວກັບການຂາດດຸນ ງົບປະມານແລະມັນຈະມີຜົນກະທົບແບບໃດ ຕໍ່ເສດຖະກິດແລະສິ່ງທີ່ທ່ານໂອບາ
ມາໄດ້ດຳເນີນການໄປ ກ່ຽວກັບເລື່ອງນີ້ ແລະສິ່ງທີ່ພວກມີສິດປ່ອນ ບັດເຂົ້າໃຈ ວ່າພວກຜູ້ສະມັກຂອງພັກຣີພັບບລີກັນຈະດຳເນີນໃນເລື່ອງນີ້.”

ມື້ລາງປະທານາທິບໍດີ Ronald Reagan ໄດ້ຊະນະການເລືອກຕັ້ງເປັນສະໄໝທີ 2 ໃນປີ
1984 ທັງໆທີ່ອັດຕາຄົນຫວ່າງງານ ສູງເຖິງ 7.2% ກໍຈິງ ແຕ່ປະທານາທິບໍດີອີກ 3 ທ່ານ
ທີ່ໄດ້ພະຍາຍາມສະມັກ ເຂົ້າແຂ່ງຂັນເອົາຕຳແໜ່ງຕື່ມອີກໃນຂະນະທີ່ມີອັດຕາຄົນຫວ່າງງານ
ສູງກວ່າ 6% ບໍ່ໄດ້ຮັບຄະແນນດີເລີຍ. ທັງປະທານາທິບໍດີ Gerald Ford ປະທານາທິບໍດີ
Jimmy Carter ແລະປະທານາທິບໍດີ George H.W. Bush ຕ່າງກໍໄດ້ເສຍໄຊຊຶ່ງສ່ວນ
ນຶ່ງແລ້ວກໍເປັນຍ້ອນອັດຕາຄົນຫວ່າງງານສູງ.

XS
SM
MD
LG