ປະທານາທິບໍດີສະຫະລັດທ່ານບາຣັກ ໂອບາມາ ໄດ້ຕັດສິນໃຈ
ເລື່ອນເວລາ ໃນການເອົາບາດກ້າວດ້ານຄົນເຂົ້າເມືອງ ໄປໃສ່
ຫຼັງຈາກການເລືອກຕັ້ງ ສະມາຊິກສະພາ ໃນເດືອນພະຈິກນີ້.
ເຈົ້າໜ້າທີ່ທຳນຽບຂາວ ກ່າວໃນວັນເສົາວານນີ້ວ່າ ປະທານາ
ທິບໍດີ ເຊື່ອວ່າ ການເອົາບາດກ້າວຕ່າງໆຂອງທ່ານໃນບັນຫາ
ທີ່ມີຄວາມສຳຄັນສູງ ທາງດ້ານການເມືອງລະຫວ່າງການໂຄສະ
ນາຫາສຽງ ສຳຫລັບການເລືອກຕັ້ງກາງສະໄໝ ອາດສ້າງຄວາມ
ເສຍຫາຍ ໃຫ້ແກ່ການດຳເນີນ ຄວາມພະຍາຍາມທີ່ຈະປະຕິຮູບ
ລະບົບດັ່ງກ່າວຢ່າງກວ້າງຂວາງ. ແຕ່ພວກເຂົາເຈົ້າເວົ້າວ່າ ທ່ານ
ໂອບາມາ ມີແຜນທີ່ຈະເອົາບາດກ້າວກ່ອນ ທ້າຍປີນີ້.
ຢູ່ໃນການສຳພາດ ທີ່ຈະອອກອາກາດ ໃນວັນອາທິດມື້ນີ້ ໃນລາຍການພົບນັກຂ່າວ ຫຼື
Meet the Press ຂອງໂທລະພາບ NBC ນັ້ນທ່ານ ໂອບາມາ ໄດ້ກ່າວວ່າ ການຕັດສິນ
ໃຈກ່ຽວກັບການເລື່ອນເວລາ ໄດ້ມີ ຂຶ້ນກໍເພື່ອຮັບປະກັນວ່າ ການໃຊ້ອຳນາດບໍລິຫານພິ
ເສດຂອງທ່ານ ແມ່ນຈະເຮັດໃນແບບທີ່ “ຍືນຍົງ.” ທ່ານຍັງໄດ້ກ່າວອີກວ່າ ມັນຈະໃຫ້
ເວລາເພີ້ມຕື່ມແກ່ປະຊາຊົນເພື່ອໃຫ້ “ເຂົ້າໃຈວ່າ ແມ່ນຫຍັງຄືຂໍ້ເທັດຈິງກ່ຽວກັບເລື່ອງ
ຄົນເຂົ້າເມືອງ ສິ່ງທີ່ພວກເຮົາໄດ້ປະຕິບັດໄປແລ້ວນັ້ນກ່ຽວກັບບັນຫາພວກເດັກ
ນ້ອຍທີ່ເຂົ້າມາທາງພາກໃຕ້ຂອງສະຫະລັດໂດຍບໍ່ມີຜູ້ປົກຄອງຕິດຕາມມານຳ
ແລະເປັນຍ້ອນຫຍັງມັນຈຶ່ງມີຄວາມຈຳເປັນ.”
ການເລື່ອນເວລາດັ່ງກ່າວນີ້ແມ່ນເບິ່ງກັນຢ່າງກວ້າງຂວາງວ່າ ເປັນການຫລຸດຜ່ອນຄວາມ
ກົດດັນຕໍ່ສະມາຊິກສະພາສູງຂອງພັກ Democrats ທີ່ບ່ອນນັ່ງ ຂອງພວກທ່ານກຳລັງຕົກ
ຢູ່ໃນອັນຕະລາຍ ຍ້ອນໄດ້ຖືກໂຈມຕີຈາກບັນດາສະມາຊິກພັກ Republicans ທີ່ສ່ວນ
ໃຫຍ່ຄັດຄ້ານຕໍ່ອັນ ທີ່ເຂົາເຈົ້າເຫັນວ່າ ເປັນການໃຫ້ອະໄພຍະໂທດ ແກ່ພວກລັກລອບ
ເຂົ້າເມືອງຜິດກົດໝາຍ ແລະຈາກພວກນັກເຄື່ອນໄຫວດ້ານຄົນເຂົ້າເມືອງ ຜູ້ທີ່ຕ້ອງການ
ໃຫ້ເອົາບາດກ້າວດຽວນີ້.
