ປະທານາທິບໍດີສະຫະລັດ ທ່ານບາຣັກໂອບາມາ ປະກາດແຜນການຕັດການຂາດດຸນ
ງົບປະມານຂອງທ່ານໃຫ້ຊາບໃນວັນຈັນວານນີ້ ແຕ່ພວກສະມາຊິກລັດຖະສະພາສັງ
ກັດພັກ Republican ໄດ້ປະຕິເສດຕໍ່ຂໍ້ສະເໜີຂອງທ່ານຢ່າງໄວ.
ໃນຄໍາປາໄສທີ່ທໍານຽບຂາວ ທ່ານໂອບາມາຮຽກຮ້ອງໄປຍັງຊາວອາເມຣິກັນທຸກຄົນ
ຮວມທັງພວກຮັ່ງມີແລະພວກບໍລິສັດຕ່າງໆໃຫ້ມີສ່ວນແບ່ງທີ່ຍຸຕິທໍາໃນຄ່າໃຊ້ຈ່າຍຂອງ
ລັດຖະບານນັ້ນ. ທ່ານໂອບາມາໄດ້ຂູ່ ທີ່ຈະໃຊ້ສິດຍັບຍັ້ງຕໍ່ຂໍ້ສະເໜີໃດໆກໍຕາມທີ່ຈະ
ຕັດຄ່າໃຊ້ຈ່າຍດ້ານການຮັກສາພະຍາບານສໍາລັບພວກສູງອາຍຸ ນອກຈາກວ່າຂໍ້ສະເໜີ
ດັ່ງກ່າວຈະຂຶ້ນຄ່າພາສີລາຍໄດ້ຂອງພວກຄົນຮັ່ງມີນຳພ້ອມ. ທ່ານໂອບາມາປະກາດວ່າ
ອັນນີ້ມັນບໍ່ແມ່ນການທໍາສົງຄາມຊົນຊັ້ນ ແຕ່ມັນແມ່ນໂຕເລກ.
ປະທານສະພາຕໍ່າທີ່ສັງກັດພັກ Republican ທ່ານ John Boehner ກ່າວວ່າ ແຜນ
ການຂອງປະທານາທິບໍດີ ເຮັດໃຫ້ຊາວອາເມຣິກັນຈຸນຶ່ງເປັນປໍລະປັກຕໍ່ອີກຈຸນຶ່ງ. ພວກ
ສະມາຊິກພັກ Republican ກ່າວວ່າການເສຍພາສີຫລາຍຂຶ້ນເປັນໄພຫລືທໍາລາຍການ
ລົງທຶນແລະການເຕີບໂຕທາງເສດຖະກິດ. ພວກສະມາຊິກເຫຼົ່ານີ້ ຢາກໃຫ້ຫຼຸດຜ່ອນການ
ຂາດ ດຸນງົບປະມານລົງ ໂດຍທັງໝົດມາຈາກການຕັດຄ່າໃຊ້ຈ່າຍຕ່າງໆ ຮວມທັງຄ່າໃຊ້
ຈ່າຍສໍາລັບເບ້ຍບໍານານແລະໂຄງການຮັກສາສຸກຂະພາບຕ່າງໆສໍາລັບພວກຄົນສູງອາຍຸ
ແລະພວກຄົນທຸກຍາກທີ່ເອີ້ນວ່າ ເງິນຄໍ້າປະກັນສັງຄົມແລະການຮັກສາພະຍາບານນັ້ນ.
ປະທານາທິບໍດີໂອບາມາ ໄດ້ສະເໜີໃຫ້ຂຶ້ນພາສີສໍາລັບພວກຄົນຮັ່ງມີ ຕັດຄ່າໃຊ້ຈ່າຍລົງ
ສໍາລັບໂຄງການສັງຄົມບາງຢ່າງແລະລົດຄ່າໃຊ້ຈ່າຍທາງທະຫານລົງໃນໂຄງການອັນນຶ່ງ
ທີ່ມີວັດຖຸປະສົງເພື່ອລົດໜີ້ສິນຢ່າງມະຫາສານຂອງສະຫະລັດລົງຕື່ມອີກ 3 ພັນຕື້ໃນໄລ
ຍະ 10 ປີຕໍ່ໜ້າ.
ປະທານາທິບໍດີໂອບາມາໄດ້ສະເໜີໃຫ້ຂຶ້ນພາສີຕື່ມອີກ 1500 ຕື້ໂດລາ ຮວມທັງຂໍ້ກໍານົດ
ອັນນຶ່ງທີ່ອະນຸມັດໃຫ້ພວກຜູ້ຄົນບາງຄົນທີ່ມີລາຍໄດ້ຫລາຍກວ່າ 1 ລ້ານໂດລາຂຶ້ນໄປ
ນັ້ນຈະບໍ່ໄດ້ຮັບການຍົກເວ້ນອີກຕໍ່ໄປໃຫ້ເສຍພາສີລາຍໄດ້ໃນອັດຕາຕໍ່າກວ່າພວກຄົນ
ອາເມຣິກັນທີ່ມີລາຍໄດ້ພໍປານກາງນັ້ນ. ທ່ານໂອບາມາຍັງຮຽກຮ້ອງເຊ່ນກັນ ປ່ອຍໃຫ້
ການຕັດພາສີໃນຍຸກສະໄໝຂອງອະດີດປະທານາທິບໍດີ Bush ໝົດອາຍຸລົງພາຍໃນທ້າຍ
ປີ 2012 ຊຶ່ງຈະຢຸດການຕັດຄ່າພາສີບາງຢ່າງລົງສໍາລັບພວກຄອບຄົວອາເມຣິກັນທີ່ມີລາຍ
ໄດ້ຫລາຍກວ່າ 250 ພັນໂດລາຕໍ່ປີນັ້ນ.
ນອກນັ້ນ ທ່ານໂອບາມາຍັງກ່າວເຊ່ນກັນວ່າ ໃນຂັ້ນຕໍ່ໄປນັ້ນ ທ່ານສາມາດປະຢັດເງິນ
ໄວ້ໄດ້ 1 ພັນຕື້ໂດລາຈາກການຖອນທະຫານອາເມຣິກັນອອກຈາກອີຣັກແລະອັຟກາ
ນິສຖານນັ້ນ.
