ຈີນກ່າວວ່າ ການເຄື່ອນໄຫວຂອງສະຫະລັດທີ່ຈະຂະຫຍາຍການມີໜ້າຂອງທະຫານສະຫະລັດໃນອອສເຕຣເລຍ ຄວນຈະໄດ້ຮັບການພິຈາລະ ນາຫລາຍຂຶ້ນແລະອາດຈະບໍ່ເປັນການເໝາະສົມ.
ທ່ານ Liu Weimin ໂຄສົກກະຊວງການຕ່າງປະເທດຈີນກ່າວຕໍ່ກອງ ປະຊຸມນັກຂ່າວທີ່ກຸງປັກກິງໃນວັນພຸດມື້ນີ້ວ່າ ມັນກຸ້ມຄ່າທີ່ຈະທໍາການໂອ້ລົມສົນທະນາກັນວ່າ ແຜນການຂອງສະຫະລັດທີ່ຈະສົ່ງພວກທະຫານມາຣິນໄປປະຈໍາຢູ່ໃນພາກເໜືອຂອງອອສເຕຣເລຍນັ້ນ ແມ່ນຖືກຕ້ອງສອດຄ່ອງກັບຜົນປະໂຫຍດສ່ວນຮວມຂອງປະຊາຄົມນາໆຊາດ ຫລືບໍ?
ຂໍ້ຕົກລົງທີ່ປະກາດໃຫ້ຮູ້ໃນລະຫວ່າງການຢ້ຽມຢາມຂອງທ່ານໂອບາມາທີ່ອອສເຕຣເລຍໃນວັນພຸດມື້ນີ້ ເນ້ນໜັກເຖິງຄວາມເປັນຫ່ວງໃນພາກພື້ນ ກ່ຽວກັບການມີອໍານາດອິດທິພົນຫລາຍຂຶ້ນຂອງຈີນນັ້ນ.
ອົງການຂ່າວ AFP ຂອງຝຣັ່ງອ້າງຄໍາເວົ້າຂອງທ່ານ Ben Rhodes ຮອງທີ່ປຶກສາດ້ານຄວາມປອດໄພແຫ່ງຊາດຂອງສະຫະລັດ ທີ່ກ່າວຕອບວ່າ ສະຫະລັດເຊື່ອວ່າການສົ່ງທະຫານໄປປະຈໍາການຢູ່ໃນອອສເຕຣເລຍ ແມ່ນຖືກຕ້ອງເໝາະສົມຢ່າງສິ້ນເຊີງ.
