ຫລັງຈາກໄດ້ເດີນທາງໄປເຖິງນະຄອນວໍຊໍ ໃນຕອນເຊົ້າວັນສຸກມື້ນີ້ ເພື່ອເຂົ້າຮ່ວມກອງປະຊຸມສຸດຍອດອົງການເນໂຕ້ ໃນອັນທີ່ຄາດກັນວ່າ ຈະເປັນການເດີນທາງເທື່ອສຸດທ້າຍ ໃນນາມປະທານາທິບໍດີໄປຢ້ຽມຢາມຢູໂຣບນັ້ນ ທ່ານ ບາຣັກ ໂອບາມາກ່າວວ່າ ທ່ານຄາດວ່າ ຈະມີການແຍກອອກແບບລາບລື່ນ ລະຫວ່າງອັງກິດແລະສະຫະພາບຢູໂຣບ.
“ເຖິງແມ່ນຈະມີຄວາມຫຍຸ້ງຍາກຫຼາຍປານໃດກໍຕາມ ຂ້າພະເຈົ້າມີຄວາມເຊື່ອໝັ້ນວ່າ ສະຫະຣາຊະອານາຈັກແລະສະຫະພາບຢູໂຣບຫຼືອີຢູ ຈະສາມາດຕົກລົງກັນໄດ້ກ່ຽວກັບ ການປ່ຽນແປງໄປສູ່ຄວາມສຳພັນອັນໃໝ່ໃນຂະນະທີ່ທຸກໆປະເທດຂອງພວກເຮົາກຳລັງເພັ່ງເລັງ ເພື່ອຄ້ຳປະກັນ ສະຖຽນລະພາບທາງດ້ານການເງິນແລະເຮັດໃຫ້ເສດຖະກິດໂລກເຕີບໂຕ” ນັ້ນຄືຄຳເວົ້າທີ່ປະທານາທິບໍດີ ໂອບາມາ ໄດ້ຂຽນລົງ ໃນບົດຄວາມເຫັນ ຂອງໜັງສືພິມ Financial Times ທີ່ນະຄອນຫຼວງລອນດອນ.
ໃນຂະນະທີ່ທ່ານໂອບາມາກ່າວວ່າ ອັງກິດໄດລົງຄະແນນສຽງເພື່ອຖອນໂຕອອກຈາກອີຢູ ພາໃຫ້ມີຄຳຖາມຢ່າງແທ້ຈິງ ກ່ຽວກັບອະນາຄົດຂອງການຮວມຕົວພາຍ ໃນທະວີບຢູໂຣບ ກໍຈິງແຕ່ທ່ານກ່າວວ່າ ສະຫະລັດແລະອັງກິດຍັງຈະສືບຕໍ່ຮັກສາ ການມີຄວາມສຳພັນແບບພິເສດໄວ້ຢູ່.
ປະທານາທິບໍດີຂຽນວ່າ “ຂ້າພະເຈົ້າບໍ່ມີຄວາມສົງໄສໃດໆທີ່ວ່າ ສະຫະຣາຊະອານາຈັກຍັງຈະສືບຕໍ່ ເປັນສະມາຊິກທີ່ມີຄວາມສາມາດທີ່ສຸດປະເທດນຶ່ງ ຂອງອົງການເນໂຕ້ ອັນເປັນປະເທດທີ່ໄດ້ປະກອບສ່ວນໂດຍເຕັມ ໃນການຮັກສາຄວາມໝັ້ນຄົງຂອງພວກເຮົາ ແລະເປັນປະເທດທີ່ໃຫ້ການສະໜັບສະໜຸນຫລາຍທີ່ສຸດຕໍ່ການປະຕິບັດງານຂອງພັນທະມິດ.”
ທ່ານໂອບາມາ ຈະສົມທົບກັບບັນດາຜູ້ນຳອື່ນໆຂອງອົງການເນໂຕ້ໃນການເຂົ້າຮ່ວມກອງ ປະຊຸມສຸດຍອດເປັນເວລາ 2 ມື້ ທີ່ນະຄອນວໍຊໍ ກ່ອນຈະອອກເດີນທາງໄປຍັງປະເທດສະເປນ ໃນການຢ້ຽມຢາມປະເທດດັ່ງກ່າວເປັນເທື່ອທຳອິດ. ໃນ ຕອນເຊົ້າວັນສຸກມື້ນີ້ ທ່ານໂອບາມາ ມີໝາຍກຳນົດ ທີ່ຈະພົບປະກັບປະທານສະພາບໍລິຫານຢູໂຣບ ທ່ານ Donald Tusk ແລະ ປະທານກຳມາທິການຢູໂຣບທ່ານ Jean-Claude Juncker. ເຈົ້າໜ້າທີ່ທຳ ນຽບຂາວ ກ່າວວ່າ ພວກຜູ້ນຳທັງສາມ ຈະຫາລືກັນກ່ຽວກັບຄຳສະເໜີແນະ ຂອງທ່ານໂອບາມາ ເພື່ອເອົາບາດກ້າວໃນຂັ້ນຕໍ່ໄປກ່ຽວກັບການເຈລະຈາໃນການຖອນໂຕຂອງອັງກິດ.
