ປະທານາທິບໍດີ ບາຣັກ ໂອບາມາ ແຫ່ງສະຫະລັດ ກໍາລັງຈະສະເໜີອັນທີ່ທໍານຽບຂາວ
ເອີ້ນວ່າ ວິທີການທີ່ສົມດູນ ສໍາລັບການຂຶ້ນພາສີແລະ ຫລຸດຄ່າໃຊ້ຈ່າຍລົງ ຂະນະທີ່ທ່ານ
ສົ່ງຮ່າງງົບປະມານຂອງລັດຖະບານກາງ ປະຈໍາປີ 2013 ໄປຍັງລັດຖະສະພານັ້ນ.
ທ່ານໂອບາມາ ກໍານົດຈະເປີດເຜີຍຮ່າງງົບປະມານປະຈໍາປີຂອງທ່ານໃຫ້ຊາບໃນວັນຈັນມື້ນີ້
ທີ່ມະຫາວິທະຍາໄລປະຊາຄົມແຫ່ງນຶ່ງຢູ່ໃກ້ໆກັບນະຄອນຫລວງວໍຊິງຕັນ ໂດຍຈະເນ້ນເຖິງ
ການຊຸກຍູ້ຂອງທ່ານເພື່ອໃຫ້ເພີ່ມງົບປະມານດ້ານການສຶກສາ ໂຄງລ່າງພື້ນຖານ ແລະໂຄງ
ການສ້າງໜ້າວຽກຂຶ້ນນັ້ນ.
ທ່ານ Jacob Lew ຫົວໜ້າກອງເລຂາປະຈໍາປະທານາທິບໍດີ ກ່າວໃນວັນອາທິດວານນີ້
ວ່າ ຮ່າງງົບປະມານນີ້ມີວັດຖຸປະສົງເພື່ອກະຕຸ້ນເສດຖະກິດ ໃນຂະນະດຽວກັນ ກໍພະຍາ
ຍາມຫາທາງແກ້ໄຂໃນໄລຍະຍາວ ເພື່ອຜ່ອນຄາຍການຂາດດູນງົບປະມານຂອງລັດຖະ
ບານກາງລົງ.
ທ່ານ Lew ກ່າວຕໍ່ພວກສໍາພາດທາງໂທລະພາບວ່າ ຮ່າງງົບປະມານນີ້ຈະລົດການຂາດ
ດູນງົບປະມານລົງ 4 ພັນຕື້ໂດລາໃນຊ່ວງນຶ່ງທົດສະວັດຕໍ່ໜ້າ ໂດຍສະເໜີຂຶ້ນພາສີແກ່
ພວກບໍລິສັດແລະພວກຄົນອາເມຣິກັນທີ່ຮັ່ງມີຕ່າງໆໃນຂະນະດຽວກັນຕັດຄ່າໃຊ້ຈ່າຍຂອງ
ລັດຖະບານລົງ.
ພວກສະມາຊິກຝ່າຍຄ້ານ ພັກ Republican ໄດ້ໂຈມຕີຮ່າງງົບປະມານຂອງທ່ານໂອບາ
ມາ ໂດຍກ່າວວ່າ ມັນເປັນພຽງຊ່ອງທາງເພື່ອສົ່ງເສີມການໂຄສະນາຫາສຽງເລື້ອງຕັ້ງ ໃຫ້
ທ່ານໂອບາມາໄດ້ຮັບເລືອກຕັ້ງຕື່ມອີກເທົ່ານັ້ນ.
ທ່ານ Paul Ryan ສະມາຊິກສະພາຕໍ່າສະຫະລັດ ທີ່ເປັນປະທານຂອງຄະນະກໍາມາທິ
ການງົບປະມານປະຈໍາສະພາຕໍ່າສະຫະລັດ ເອີ້ນຮ່າງງົບປະມານດັ່ງກ່າວວ່າ ເປັນແຜນຜັງ
ແຫ່ງການສືບຕໍ່ນະໂຍບາຍທີ່ລົ້ມແຫລວແລະເສຍຫາຍຂອງພັກເດໂມກຣັດ.
