ລິ້ງ ສຳຫລັບເຂົ້າຫາ

ທ່ານໂອບາມາປະກາດຂ່າວ ການສັງຫານຜູ້ນໍາອາລຄາອີດາ (ເບິ່ງຮູບສະລາຍດ໌ ແລະວີດິໂອ)

  • ດາຣາ ບັກຄໍາ

ປະທານາທິບໍດີ Barack Obama ປະກາດຂ່າວການຕາຍຂອງນາຍ Osama bin Laden ໃຫ້ຊາວອາເມຣິກັນແລະຊາວໂລກຮູ້ ໃນຕອນເດິກຂອງຄືນວັນອາທິດ ທີ 1 ພຶດສະພາ 2011.

ປະທານາທິບໍດີ Barack Obama ໄດ້ອອກມາປະກາດວ່າ ນາຍ Osama bin Laden ຜູ້ກໍ່ຕັ້ງເຄືອຂ່າຍກໍ່ການຮ້າຍ al-Qaida ເສຍຊີວິດແລ້ວ. ນັກຂ່າວວີໂອເອ Kent Klein ມີລາຍງານມາຈາກທໍານຽບຂາວ ຊຶ່ງດາຣາຈະນໍາມາສະເໜີທ່ານໃນອັນດັບຕໍ່ໄປ.

25 ນາທີ​ກ່ອນ​ເວລາ​ທ່ຽງ​ຄືນ​ວັນ​ອາທິດ​ວານ​ນີ້ ປະທານາ
ທິບໍດີ​ສະຫະລັດ ທ່ານ​ບາ​ຣັກ ​ໂອ​ບາ​ມາ ​ໄດ້ອອກ​ມາ​ປາກົດ​
ໂຕ​ທາງໂທລະພາບ ​ເພື່ອ​ປະກາດ​ຂ່າວ​ທີ່​ປະຊາຊົນ​ອາ​ເມຣິ
ກັນ​ໄດ້ລໍຖ້າ​ຟັງ​ກັນ​ ມາ​ເປັນ​ເວລາ​ເກືອ​ບ 10 ​ແລ້ວ​ນັ້ນ.

// ສຽງ //

ທ່ານ​ໂອ​ບາ​ມາ​ກ່າວ​ວ່າ “ຂ້າພະ​ເຈົ້າ​ສາມາດ​ລາຍ​ງານໃຫ້​ປະຊາຊົນ​ອາ​ເມຣິກັນ​ແລະ​ໂລກ​ຮູ້​ໄດ້ ​ໃນ​ຄືນ​ນີ້ ວ່າ ສະຫະລັດ​ໄດ້​ທໍາ​ການ​ປະຕິບັດ​ງານ​ບັ້ນ​ນຶ່ງ ທີ່​ໄດ້​ສັງ ຫານ​ນາຍ ໂອ​ຊາມາ ບິນ ລາ​ເດິ​ນ ຜູ້​ນໍາ​ຂອງ​ກຸ່​ມ al-Qaida ​ແລະ​ນັກ​ກໍ່​ການ​ຮ້າຍ​ທີ່​ເປັນ​ຜູ້​ຮັບຜິດຊອບ ຕໍ່​ການ​ສັງຫານ​ຜູ້ ຊາຍ ​ແມ່ຍິງ ​ແລະ​ເດັກ​ເລັກ​ເດັກ ນ້ອຍ ຫລາຍ​ພັນ​ຄົນ​ນັ້ນ.”

ນາຍ​ໂອຊາມາ ບິນ ລາ​ເດິ​ນ ​ໄດ້​ເປັນ​ບຸກຄົນ​ທີ່​ກົດໝາຍ​ຕ້ອງການ​ໂຕ ຫລາຍ​ທີ່​ສຸດ​ໃນ​ໂລກ ມາ​ຕັ້ງ​ແຕ່​ມື້​ທີ່​ປະຊາຊົນ​ຫລາຍ​ກ່ວາ 3 ພັນ​ຄົນ ​ໄດ້​ຖືກ​ຂ້າ​ຕາຍ ​ໃນ​ການ​ໂຈມ​ຕີ​ຂອງ​ພວກ al-Qaida ຕໍ່​ສະຫະລັດ​ໃນ​ວັນ​ທີ 11 ​ເດືອນ​ກັນຍາ 2001 ນັ້ນ.

ຮູບໂພສເຕິ້ທີ່ບອກວ່ານາຍ Osama bin Laden ຕາຍແລ້ວ ຢູ່ໃນເວັບໄຊ້ທ໌ ຂອງໜ່ວຍຕໍາຫລວດສັນຕິບານກາງ FBI ຂອງສະຫະລັດ.
ຮູບໂພສເຕິ້ທີ່ບອກວ່ານາຍ Osama bin Laden ຕາຍແລ້ວ ຢູ່ໃນເວັບໄຊ້ທ໌ ຂອງໜ່ວຍຕໍາຫລວດສັນຕິບານກາງ FBI ຂອງສະຫະລັດ.

ທ່ານ​ໂອ​ບາ​ມາ​ກ່າວ​ວ່າ ທ່ານ​ໄດ້​ຮັບ​ລາຍ​ງານ​ເມື່ອ​ເດືອນ​ສິງຫາປີ​ກາຍ​ນີ້ ກ່ຽວ​ກັບ​ຮ່ອງຮອຍ ທີ່​ອາດ​ສາມາດ​ນໍາ​ໄປ​ສູ່​ບ່ອນຢູ່​ຂອງ​ນາຍ​ບິນລາ​ເດິນ ນັ້ນ ຊຶ່ງ​ທ່ານ​ກ່າວ​ວ່າ ຜູ້ກ່ຽວ​ໄດ້​ລີ້​ຊ່ອນ​ໂຕ​ຢູ່ໃນ​ຄະ​ລື​ຫາດ​ຫລັງ​ນຶ່ງ​ໃນ​ເມືອງ Abbottabad ​ໃຫ້ໆ​ກັບ​ນະຄອນຫລວງ​ອິສລາມາ​ບັດ​ຂອງ​ປາ​ກິ​ສຖານ.

ທ່ານ​ໂອ​ບາ​ມາ​ກ່າວ​ຕໍ່​ໄປ​ວ່າ ​ໃນ​ອາທິດ​ແລ້ວ​ນີ້ ທ່ານ​ໄດ້​ອະນຸມັດ​ໃຫ້​ມີ​ການ​ດໍາ​ເນີນ​ງານ​ເພື່ອ​ຈັບ​ນາຍ​ບິນ​ລາ​ເດິ​ນ ​ແລະ​ນໍາ​ເອົາ​ຜູ້ກ່ຽວ​ມາ​ຮັບ​ຄວາມ​ຍຸດຕິ​ທໍາ ກໍ​ຄື​ໂທດ​ກໍາ​ທີ່​ເຂົາ​ສົມຄວນ​ໄດ້ ຮັບ​ນັ້ນ. ​ແລະ​ໃນ​ວັນ​ອາທິດ​ວານ​ນີ້ ທະຫານ​ ອາ​ເມຣິກັນຈຸ​ນ້ອຍ​ໆຈຸ​ນຶ່ງກໍ​ໄດ້​ທໍາ​ການ​ບຸກ​ເຂົ້າ ​ໂຈມ​ຕີ​ຄະ​ລື​ຫາດ​ລາຄາ​ແພງ​ຫລັງ​ນັ້ນ.

// ສຽງ //

ທ່ານ​ໂອ​ບາ​ມາ​ກ່າວ​ວ່າ: “ຫລັງ​ຈາກ​ການ​ຍິງ​ຕໍ່ສູ້​ກັນ ພວກ​ເຂົາ​ເຈົ້າ​ກໍ​ໄດ້​ສັງຫານ​ນາຍ​ໂອ​ຊາມາ ບິນ​ລາ​ເດິ​ນ ​ແລະ​ເອົາ​ສົບ​ຂອງ​ຜູ້ກ່ຽວ​ມາ.”

ທ່ານ​ປະທານາທິບໍດີ​ຍອມຮັບ​ວ່າ ພວກອາລຄາ​ອີ​ດາຈະ​ຍັງ​ຄົງ​ສືບ​ຕໍ່ຫາ ວິທີ​ທາງ​ໂຈມ​ຕີ​ຕໍ່​ສະຫະລັດ ​ແລະ​ທ່ານ​ໄດ້​ກ່າວເຕືອນ​ໃຫ້ປະຊາຊົນ​ອາ​ເມຣິກັນ​ສືບ​ຕໍ່​ມີ​ສະຕິ​ລະວັງ​ໂຕ.

// ສຽງ //

ທ່ານ​ໂອ​ຍາມາ​ເວົ້າ​ວ່າ: “ຂ້າພະ​ເຈົ້າ​ໄດ້​ກ່າວ​ໃຫ້​ເປັນ​ທີ່​ແຈ້ງ​ຂາວ​ແລ້ວ ດັ່ງ​ດຽວ​ກັນ​ກັບ​ທີ່​ທ່ານ​ປະທານາທິບໍດີ George W. Bush ​ໄດ້​ກ່າວ ບໍ່​ດົນ​ຫລັງ​ຈາກ​ເຫດການ 9-11 ຫລື​ການ​ໂຈມ​ຕີ​ເມື່ອ​ວັນ​ທີ 11 ກັນຍາ 2001 ນັ້ນ​ວ່າ ສົງຄາມ​ຂອງ​ພວກ​ເຮົາ​ບໍ່​ແມ່ນ​ຕໍ່​ຕ້ານ​ສາສະໜາ​ອິສລາມ ​ເພາະວ່າ​ນາຍ​ບິນ​ລາ​ເດິ​ນບໍ່​ແມ່ນ​ຜູ້​ນໍາ​ຂອງ​ຊາວ​ມຸສລິ​ມ ​ແຕ່​ເຂົາ​ເປັນ​ຄາດ​ຕະກອນ​ສັງຫານ​ໝູ່​ຊາວ​ມຸສລິ​ມ ​ແລະ​ຄວາມ​ຈິງ​ກໍ​ແມ່ນ​ວ່າພວກ ອາລຄາ​ອີ​ດາ​ໄດ້​ເຂ່ນຂ້າ​ຊາວ​ມຸສລິ​ມ ຫລາຍ​ສິບ​ຄົນ ຢູ່​ໃນ​ຫລາຍໆ​ປະ​ເທດ ​ໂຮມ​ທັງ​ປະ​ເທດ​ຂອງ​ພວກ​ເຮົາ​ນໍາ.”

ທ່ານ​ໂອ​ບາ​ມາ​ກ່າວ​ຕໍ່​ໄປ​ວ່າ ການ​ຮ່ວມ​ມື​ກັບ​ປາ​ກິ​ສຖານ​ໃນ​ດ້ານ​ຕໍ່ຕ້ານ​ການ​ກໍ່​ການ​ຮ້າຍ ​ໄດ້​ຊ່ວຍ​ນໍາພາ​ກໍາລັງ​ຂອງ​ສະຫະລັດ​ ໄປ​ຍັງ​ນາຍບິນ​ລາ​ເດິ​ນ ​ແລະ​ທ່ານ​ໄດ້​ໂທລະສັບ​ໄປ​ຫາ​ປະທານາທິບໍດີ​ປາ​ກິ​ສຖານ ທ່ານ Asif Ali Zardari ​ເພື່ອ​ແຈ້ງ​ໃຫ້​ທ່ານ Zardari ຊາບ​ກ່ຽວ​ກັບ​ການ​ຕາຍ​ຂອງ​ນາຍ​ບິນ​ລາ​ເດິ​ນ. ທ່ານ​ໂອ​ບາມາ​ກ່າວ​ວ່າ ບັນ​ດາ​ເຈົ້າ​ໜ້າ​ທີ່​ປາ​ກິ​ສ ຖານ​ໄດ້​ເຫັນ​ພ້ອມ​ນໍາ​ທ່ານ ທີ່​ວ່າມື້​ນີ້​ແມ່ນ​ມື້​ທີ່​ດີ​ແລະ​ມື້​ປະວັດ​ສາດ​ ສໍາລັບ​ທັງ​ສອງ​ປະ​ເທດ.

ນອກ​ນັ້ນ ທ່ານ​ໂອ​ບາ​ມາ​ຍັງ​ໄດ້​ໂທລະສັບ​ໄປ​ຫາ​ທ່ານ George W. Bush ທີ່​ເປັນ​ປະທາ ນາທິບໍດີ​ໃນ​ເວລາ​ທີ່​ພວກ​ອາລຄາ​ອີ​ດາ​ທໍາ​ການ​ໂຈມ​ຕີ​ຕໍ່​ສະຫະລັດ​ເມື່ອ​ວັນ​ທີ 11 ​ກັນຍາ 2001 ນັ້ນ ​ແລະ​ເປັນ​ຜູ້​ລິ​ເລີ້ມ​ສົງຄາມ​ຕໍ່ຕ້ານ​ພວກ​ກໍ່​ການ​ຮ້າຍຂອງ​ສະຫະລັດ. ​ໃນ​ຄໍາ​ຖະ​ແຫລ​ງສະບັບ​ນຶ່ງ ທ່ານ Bush ​ເອີ້ນ​ການ​ສັງຫານ​ນາຍບິນລາ​ເດິ​ນວ່າ ​ເປັນຄວາມ​ສໍາ​ເລັດ​ອັນ​ຍິ່ງ​ໃຫຍ່​ມະຫາສານ ​ແລະ​ເປັນ​ໄຊຊະນະ​ສໍາລັບ​ອາ​ເມຣິກາ. ທ່ານ Bush ​ເຄີຍ​ໄດ້​ກ່າວ​ໄວ້​ແລ້ວ​ວ່າ ບໍ່​ວ່າ​ມັນ​ຈະ​ໃຊ້​ເວລາ​ດົນ​ປານ​ໃດ​ກໍ​ຕາມ ພວກ​ເຮົາ​ກໍ​ຈະ​ເຮັດ​ໃຫ້​ຄວາມ​ຍຸດຕິ​ທໍ​າມີ​ຂຶ້ນ ​ໃຫ້​ໄດ້​ກ່ຽວ​ກັບ​ເລື້ອງ​ນີ້.

ນາຍ Bin Laden ຂະນະນໍາພາ ລູກນ້ອງ
ນາຍ Bin Laden ຂະນະນໍາພາ ລູກນ້ອງ

ນາຍ​ໂອຊາ​ມາ ບິນ ລາ​ເດິ​ນ ​ເກີດ​ເມື່ອ​ວັນ​ທີ 10 ​ເດືອນ​ມີນາ 1957 ໃນ​ຄອບຄົວ​ທີ່​ຮັ່ງມີ​ໃນ​ປະ​ເທດ Saudi Arabia.

ເວລາ​ສະຫະພາບ​ໂຊ​ຫວຽດ​ເຂົ້າ​ບຸກລຸກ​ອັຟກາ​ນິສຖານໃນ​ປີ 1979 ນັ້ນ ນາຍ​ບິນ ລາ​ເດິ​ນ ​ໄດ້​ເຂົ້າ​ຮ່ວມ​ຕໍ່ສູ້​ກັຍພວກ​ນັກ​ລົບ​ມູຈາ​ເຮ​ດີ​ນ ຂອງ​ຊາວ​ມຸສລິ​ມອັຟກາ​ນິສຖານ ຕ້ານກໍາລັງ​ຄອບ​ຄອງ​ຂອງ​ສະຫະພາບ​ໂຊ​ຫວຽດ. ຫລາຍ​ປີ​ຕໍ່​ມາ ຜູ້ກ່ຽວ​ໄດ້​ໃຊ້​ເງິນຄໍາ​ຂອງ​ຕົນ ກໍ່​ຕັ້ງ​ກໍາລັງ​ກອງ​ຫລອນ​ຂອງ​ຕົນ​ເອງ​ຂຶ້ນ​ມາ ຊຶ່ງໃນ​ເວລາ​ຕໍ່​ມາ ​ເອີ້ນ​ວ່າ ອາລຄາ​ອີ​ດາ ຊຶ່ງ​ເປັນ​ພາສາ​ອາຣັບ ​ແປ​ວ່າ ຖານ ຫລື ​ທີ່​ໝັ້ນ.

ໃນ​ປີ 1996 ນານ​ບິນ​ລາ​ເດິ​ນ​ໄດ້​ປະກາດ​ສົງຄາມ​ສັກສິດ​ຕໍ່ຕ້ານ​ສະຫະລັດ ທີ່​ເຂົາ​ກ່າວ​ຫາ​ວ່າ ປຸ້ນສະດົມ​ເອົາ​ຊັບພະຍາກອນ​ທໍາ​ມະ​ຊາດ​ຂອງ​ພວກ​ປະ​ເທດ​ສຸມ​ລິ​ມ ​ແລະ​ໃຫ້ການ​ຊ່ວຍ​ເຫລືອ​ແກ່​ພວກ​ສັດຕູ​ຂອງ​ສາສະໜາ​ອິສລາມ.

ກ່າວ​ກັນ​ວ່າ ​ໃນ​ລະຫວ່າງ​ທີ່​ລີ້​ຊ່ອນ​ໂຕ​ຢູ່​ໃນ​ປະ​ເທດ Sudan ​ນັ້ນ ນາຍ​ບິນ ລາ​ເດິ​ນ​ໄດ້​ວາງ​ແຜນ​ທໍາ​ການ​ໂຈມ​ຕີ​ຕໍ່​ທະຫານ​ສະຫະລັດ​ໃນ Somalia ​ແລະ Saudi Arabia. ນອກ​ນັ້ນ ຜູ້ກ່ຽວ​ຍັງ​ໄດ້​ວາງ​ແຜນ​ແລະ​ຈັດ​ແຈງ​ການ​ໂຈມ​ຕີ​ຕໍ່​ສະຖານທູດ​ຂອງ​ສະຫະລັດ​ໃນປີ 1998 ທີ່​ປະ​ເທດ Kenya ​ແລະ Tanzania ນັ້ນ​ນໍາ.

ພາຍ​ໃນ​ບໍ່​ເທົ່າ​ໃດ​ອາທິດ​ຫລັງ​ຈາກ​ວັນ​ທີ 11 ​ເດືອ​ນກັນ​ຍາ 2001 ນັ້ນ ສະຫະລັດ​ກໍ​ໄດ້​ນໍາ ພາ​ກອງ​ກໍາລັງ​ຂອງ​ກຸ່ມ​ປະສົມ​ນາໆ​ຊາດ ທໍາ​ການ​ໂຄ່ນ​ລົ້ມ​ລັດ​ຖະບານຕາ​ລີ​ບານ​ໃນ​ອັ​ຟກາ​ນິສຖານ ທີ່​ບໍ່​ຍອມ​ມອບ​ໂຕ​ນາຍ​ບິນ ລາ​ເດິ​ນ ​ໃຫ້​ສະຫະລັດ.

ເປັນ​ເວລາ​ເກືອບ 10 ປີ​ທີ່​ພວກ​ທະຫານ​ແລະ​ເຈົ້າ​ໜ້າ​ທີ່​ສືບ​ລັບ​ຂອງ​ສະຫະລັດ​ໄດ້​ຕາມ​ລ່າ​ແລະທໍາ​ການ​ຊອກ​ຄົ້ນ ຢູ່​ໃນ​ເຂດ​ພູຜາ​ປ່າດົງ​ເລາະ​ຕາມ​ຊາຍ​ແດນ​ປາ​ກິ​ສຖານ​ຕິດ​ກັບ​ອັຟກາ​ນິສຖານ​ນັ້ນ ​ເພື່ອພະຍາ ຍາມ​ຊອກ​ຫາ​ໂຕ​ນາຍ​ບິນ​ ລາ​ເດິ​ນນັ້ນ.

ຝຸງຊົນທີ່ໄປໂຮມຊຸມນຸມສະແດງຄວາມດີ ໃຈ ຢູ່ທາງນອກທໍານຽບຂາວໃນຕອນ ເດິກຂອງຄືນວັນທີ 1 ພຶດສະພາ ຈົນ ຮອດເຊົ້າ ມືດ ວັນທີ 2.
ຝຸງຊົນທີ່ໄປໂຮມຊຸມນຸມສະແດງຄວາມດີ ໃຈ ຢູ່ທາງນອກທໍານຽບຂາວໃນຕອນ ເດິກຂອງຄືນວັນທີ 1 ພຶດສະພາ ຈົນ ຮອດເຊົ້າ ມືດ ວັນທີ 2.

ກ່ອນ​ໜ້າ​ເວລາ​ທ່ານ​ໂອ​ບາ​ມາ​ອອກ​ມາ​ປະກາດ​ຂ່າວ​ການ​ຕາຍ​ຂອງ​ນາຍ ​ໂອຊາ​ມາ ບິນ​ລາ​ເດິ​ນນັ້ນ ຝຸງ​ຊົນ​ທີ່​ມີ​ຄວາມ​ດີ​ອົກ​ດີ​ໃຈ ​ໄດ້​ໄປ​ໂຊມ​ຊຸມນຸມກັນ​ຫລາຍ​ຂຶ້ນ​ເລື້ອຍໆ ຢູ່​ຕໍ່ໜ້າ​ທໍານຽບ ຂາວ ​ແລະ​ພາກັນ​ຮ້ອງ​ໂຮ ​ເຊຍ​ແລະ​ຮ້ອງ​ລໍາ​ທໍາ​ເພງ ສະ​ແດງ​ຄວາມ​ດີ​ໃຈ​ຢ່າງ​ໃຫຍ່​ຫລວງ​ຂອງ​ພວກ​ເຂົາ​ເຈົ້າ.

// ສຽງ​ຮ້ອງ​ໂຮ USA USA...//

ທາງ​ຝ່າຍ​ກະຊວງ​ການ​ຕ່າງປະ​ເທດ​ສະຫະ​ລັດ​ນັ້ນ ກໍ​ໄດ້​ມີ​ຄໍາ​ສັ່ງ​ໄປ​ຍັງ​ສະຖານທູດ​ຂອງຕົນ​ໃນ​ທົ່ວ​ໂລກ ​ໃຫ້​ເອົາ​ທ່າ​ທີລະວັງ​ໂຕ​ສູງ ​ແລະ​ເຕືອນ​ຊາວ​ອາ​ເມຣິກັນ ​ໃຫ້​ລະ​ມັດລະວັງຕໍ່​ການ​ແກ້​ແຄ້ນ​ຄືນ​ຂອງ​ພວກ​ອາລຄາ​ອີ​ດາ.

XS
SM
MD
LG