ປະທານາທິບໍດີ ສະຫະລັດ ທ່ານ ບາຣັກ ໂອບາມາ ໄດ້ຈັດກອງປະຊຸມສຸດຍອດບັນດາຜູ້ ນຳ ກ່ຽວກັບ ອົບພະຍົບ ຄັ້ງທຳອິດທີ່ບໍ່ເຄີຍມີມາໃນນະຄອນ ນິວຢອກ ໃນວັນອັງຄານ ວານນີ້, ໂດຍກ່າວວ່າ ໂລກ ຂອງພວກເຮົາແມ່ນກຳລັງປະເຊີນໜ້າກັບວິກິດການຂະໜາດ ໃຫຍ່.
ທ່ານ ໂອບາມາ ໄດ້ກ່າວວ່າ “ພວກທ່ານມາທີ່ນີ້ ຍ້ອນວ່າ ຕອນນີ້ໃນສູນອົບພະຍົບທີ່ແອ ອັດໃນຫຼາຍເມືອງທົ່ວໂລກ ມັນມີຄອບຄົວຈຳນວນຫຼາຍຈາກພາກພື້ນ ດາຟົວ ອາໄສຢູ່ ໃນປະເທດ Chad, ຊາວປາແລັສໄຕນ໌ ໃນ ເລບານອນ, ຊາວອັຟການິສຖານ ໃນ ປາ ກິສຖານ, ຊາວໂຄລົມເບຍ ໃນ ເອກົວດໍ ຜູ້ທີ່ໄດ້ໃຊ້ເວລາຫຼາຍປີ, ໃນບາງກໍລະນີ, ແມ່ນ ຫຼາຍທົດສະວັດ, ໃນຂະນະທີ່ພວກອົບພະຍົບ ລອດຊີວິດມາໄດ້ຍ້ອນອາຫານທີ່ມີການປັ່ນສ່ວນ ແລະການຊ່ວຍເຫຼືອ ແລະ ຜູ້ທີ່ມີຄວາມຝັນວ່າໃນມື້ໜຶ່ງ, ບໍ່ວ່າດ້ວຍວິທີໃດກໍ ຕາມ, ຢາກຈະມີບ້ານເຮືອນຂອງພວກເຂົາເຈົ້າເອງ.”
ອົບພະຍົບຊາວ ຊີເຣຍ ນາງ Yusra Mardini ສະມາຊິກຂອງທີມນັກກິລາໂອລິມປິກ ອົບພະຍົບ, ໄດ້ແນະນຳຕົວ ຕໍ່ທ່ານໂອບາມາ.
ລາວໄດ້ເລົ່າເລື່ອງ ກ່ຽວກັບ ຄອບຄົວຂອງລາວ, ໂດຍກ່າວວ່າພວກເຂົາເຈົ້າແມ່ນອົບພະ ຍົບຢູ່ເທິງເຮືອ, ເມື່ອຈັກຂອງມັນໄດ້ເພ ແລະ ລາວ ພ້ອມກັບຄົນອື່ນໆຕ້ອງໄດ້ອອກຈາກ ເຮືອ ແລະ ແກ່ເຮືອລຳນັ້ນດ້ວຍການລອຍນ້ຳ. ລາວໄດ້ກ່າວວ່າພຽງໜຶ່ງປີຕໍ່ມາ, ລາວໄດ້ມີ ໂອກາດເຂົ້າແຂ່ງຂັນໃນກິລາໂອລິມປິກທີ່ປະເທດ ບຣາຊິລ ໃນທີມຂອງຊາວອົບພະຍົບ. ນາງ Mardini ໄດ້ກ່າວວ່າ ລາວມີຂໍ້ຄວາມນີ້ຢາກໃຫ້ທຸກຄົນຮູ້ “ການໜີອອກຈາກບ້ານເຮືອນຂອງເຈົ້າ ມັນບໍ່ແມ່ນຄວາມສະໝັກໃຈ.. ອົບພະຍົບສາມາດປະສົບຜົນສຳເລັດ ໃນຫຼາຍຢ່າງຖ້າຫາກໄດ້ຮັບໂອກາດ.”
ທ່ານ ໂອບາມາ ໄດ້ກ່າວຕໍ່ນາງ Mardini ວ່າທ່ານບໍ່ສາມາດມີຄວາມພາກພູມໃຈກັບນາງ ໄປຫຼາຍກວ່ານີ້ອີກແລ້ວ.
ທ່ານ ໂອບາມາ ໄດ້ກ່າວ່າ “ສຳລັບຄວາມກ້າຫານຂອງເຈົ້າ ແລະ ຄວາມສາມາດຮັບມື ກັບບັນຫາຂອງເຈົ້າ ແລະ ເຈົ້າໄດ້ເປັນຕົວຢ່າງທີ່ ດີທີ່ສຸດ ຕໍ່ພວກເດັກນ້ອຍຢູ່ທົ່ວທຸກ ບ່ອນ, ລວມທັງນ້ອງສາວອາຍຸ 8 ປີຂອງເຈົ້າ, ຜູ້ທີ່ຂ້ອຍຮູ້ວ່າ ຕ້ອງຮຽນເອົາແບບຢ່າງ ຈາກເຈົ້າ.” ທ່ານໄດ້ກ່າວວ່າ ນາງແມ່ນໃບໜ້າຂອງເດັກຍິງ ແລະ ເດັກຊາຍຈຳນວນຫຼວງ ຫຼາຍທີ່ໄດ້ຫຼົບໜີອອກຈາກບ້ານເຮືອນຂອງພວກເຂົາເຈົ້າ.
ທ່ານປະທານາທິບໍດີໄດ້ກ່າວວ່າ ວິກິດການອົບພະຍົບທີ່ຮ້າຍແຮງທີ່ສຸດຂອງໂລກນັບຕັ້ງ ແຕ່ສົງຄາມໂລກຄັ້ງທີ 2 ເປັນຕົ້ນມາ ແມ່ນຄັ້ງທຳອິດ ແລະເປັນບົດທົດສອບຄວາມສາ ມາດທີ່ສຳຄັນອັນດັບໜຶ່ງຂອງປະຊາຄົມນານາຊາດ ເພື່ອຢຸດເຊົາບັນຫາຂັດແຍ້ງຕ່າງໆ. ທ່ານໄດ້ກ່າວວ່າ ອົບພະຍົບຂອງໂລກຈຳນວນຫຼວງຫຼາຍ ໄດ້ມາຈາກພຽງສາມປະເທດທີ່ ໄດ້ຮັບຄວາມເສຍຫາຍຈາກສົງຄາມ, ໄດ້ແກ່ ຊີເຣຍ, ອັຟການິສຖານ ແລະ ໂຊມາເລຍ. ທ່ານ ໂອບາມາ ໄດ້ກ່າວວ່າ ວິກິການອົບພະຍົບໂລກໄດ້ເປັນໄພຂົ່ມຂູ່ຕໍ່ຄວາມປອດໄພ ຍ້ອນຂະໜາດທີ່ໃຫຍ່ໂຕຂອງມັນ.
