ທໍານຽບຂາວກໍາລັງເນ້ນຢໍ້າການຢ້ຽມຢາມເອເຊຍໃນອາທິດໜ້ານີ້ ຂອງປະທານາທິບໍດີ
ບາຣັກ ໂອບາມາ ວ່າເປັນໂອກາດອັນນຶ່ງເພື່ອສ້າງວຽກເຮັດງານທໍາຂຶ້ນໃນສະຫະລັດ
ພ້ອມທັງເສີມຂະຫຍາຍການຄ້າ ແລະສ້າງຕະຫຼາດສໍາລັບສິນຄ້າອາເມຣິກັນ.
ໃນວັນພຸດວານນີ້ ບັນດາເຈົ້າໜ້າທີ່ທໍານຽບຂາວໄດ້ຖະແຫລງໃຫ້ຊາບລ່ວງໜ້າກ່ຽວກັບ
ການຢ້ຽມຢາມດັ່ງກ່າວ ຊຶ່ງຈະເລີ້ມໄປຕັ້ງແຕ່ວັນສຸກມື້ອື່ນນີ້ ເວລາທ່ານອອກເດີນທາງ
ໄປຍັງລັດຮາວາຍ ເພື່ອເປັນເຈົ້າພາບຈັດກອງປະຊຸມສຸດຍອດຂອງກຸ່ມ APEC ທີ່ມີ
ສະມາຊິກ 21 ປະເທດນັ້ນ.
ເຈົ້າໜ້າທີ່ທໍານຽບຂາວ ທ່ານ Daniel Russell ກ່າວວ່າ ຄວາມພະຍາຍາມຂອງທ່ານ
ໂອບາມາເພື່ອສ້າງໜ້າວຽກນັ້ນ ແມ່ນກ່ຽວພັນໂດຍກົງກັບການເຂົ້າໄປພົວພັນຂອງສະ
ຫະລັດໃນພາກພື້ນເອເຊຍປາຊີຟິກ. ທ່ານ Russell ກ່າວຕໍ່ໄປວ່າ ການດໍາເນີນການຄ້າ
ກັບພວກປະເທດໃນກຸ່ມອາເປັກ ແມ່ນເປັນການສະໜັບສະໜູນວຽກງານໃນສະຫະລັດ
ຫລາຍລ້ານວຽກ ແລະວ່າ ສະມັດຖະພາບເພື່ອສົ່ງອອກຜະລິດຕະພັນຂອງສະຫະລັດ
ແມ່ນສໍາຄັນທີ່ສຸດສໍາລັບການເຕີບໂຕທາງດ້ານເສດ ຖະກິດ. ທ່ານ Russell ຍັງກ່າວ
ຕື່ມວ່າ ທ່ານໂອບາມາມີຄວາມໝາຍໝັ້ນຕໍ່ອັນທ່ານເອີ້ນວ່າ ການສ້າງໃຫ້ມີຄວາມສົມດຸນ
ຄືນໃໝ່ໃນເອເຊຍ ອັນເປັນພາກພື້ນບ່ອນທີ່ປະຊາທິປະໄຕກໍາລັງໂຜ່ໂຕຂຶ້ນມາ ແລະອິດ
ທິພົນຂອງຈີນກໍາລັງເຕີບໂຕຂຶ້ນນັບມື້ນັ້ນ.
ທ່ານ Russell ກ່າວວ່າ ປະຊາຊົນອາເມຣິກັນຢາກຈະຮູ້ວ່າວ່າ ສະຫະລັດຈະເປັນຫລັກ
ແຫ່ງສະຖຽນລະພາບແລະນໍາສະເໜີຜົນປະໂຫຍດຂອງເຂົາເຈົ້າຢູ່ໃນຂົງເຂດປາຊີຟິກ
ຫລືບໍ?.
ທ່ານໂອບາມາຈະທໍາການພົບປະຫາລືກັນຕ່າງຫາກກັບທ່ານຫູຈິນເຖົາປະທານປະເທດ
ຈີນປະທານາທິບໍດີ Dimitry Medvedev ແຫ່ງຣັດເຊຍ ແລະທ່ານ Yoshihiko Noda
ນາຍົກລັດຖະມົນຕີຍີ່ປຸ່ນ ທີ່ກອງປະຊຸມສຸດຍອດຂອງກຸ່ມ APEC ນັ້ນ.
ນອກນັ້ນ ທ່ານໂອບາມາຍັງຈະໄປຢ້ຽມຢາມອອສເຕຣເລຍ ແລະທໍາການພົບປະຫາລືກັບ
ພວກຜູ້ນໍາເອເຊຍອື່ນໆ ຮວມທັງທ່ານມັນໂມຮັນ ສິງ ນາຍົກລັດຖະມົນຕີອິນເດຍ ທີ່ກອງ
ປະຊຸມປະຈໍາພາກພື້ນ ທີ່ອິນໂດເນເຊຍນັ້ນ.
