ລິ້ງ ສຳຫລັບເຂົ້າຫາ

ປ.ໂອບາມາ ເດີນທາງໄປຮອດ ລັດຮາວາຍ ເພື່ອເຂົ້າຮ່ວມ ກອງປະຊຸມເອເປັກ (ເບິ່ງວີດີໂອ)

  • ສິງ ບູຣົມມະວົງ

ປະທານາທິບໍດີ ບາຣັກ ໂອບາມາ ເຂົ້າຮ່ວມໃນພິທີວາງພວງມາລາ ທີ່ປ່າຊ້າ Arlington National Cemetery ໃນລັດ Virginia ນອກກຸງວໍຊິງຕັນ ເພື່ອໃຫ້ກຽດແກ່ບັນດາທະຫານທີ່ໄດ້ສະລະຊີບເພື່ອຊາດ ເນື່ອງໃນວັນ ນັກລົບເກົ່າ ຫລື Veterans' Day, ວັນສຸກວານນີ້ ທີ 11 ພະຈິກ 2011.

ທ່ານ​ບາຣັກ ​ໂອ​ບາ​ມາ​ ປະທານາທິບໍດີ​ສະຫະລັດ ​ເດີນທາງ​ໄປ​ຮອດລັດຮາ​ວາຍ ​ບ້ານ​ເກີດ
​ຂອງ​ທ່ານ​ແລ້ວ ​ເພື່ອ​ເປັນ​ເຈົ້າພາບ​ຈັດກອງ​ປະຊຸມ​ສຸດ​ຍອດດ້ານ​ເສດຖະກິດ​ ຂອງ​ບັນດາ​ຜູ້
​ນໍາ​ໃນ​ພາກ​ພື້ນ​ເອ​ເຊຍ​ປາຊີ​ຟິກ.

ການ​ຢຸດ​ແວ່​ຄັ້ງ​ນີ້​ເປັນ​ບ່ອນ​ທໍາອິດ​ຂອງ​ການ​ເດີນທາງ​ຢ້ຽມຢາມ​ເປັນ​ເວລາ 9 ມື້ໃນ​ພາກ​ພື້ນທີ່​ມີ​ວັດຖຸ​ປະສົງ​ເພື່ອ​ປັບປຸງ​ສາຍ​ພົວພັນ​ຂອງ​ສະຫະລັດ​ກັບ​ພວກປະ​ເທດ​ໃນ​ພາກ​ພື້ນ​ເອ​ເຊຍ​ປາຊີ​ຟິກ​ໃຫ້​ດີ​ຂຶ້ນ.

ໃນ​ລະຫວ່າງ​ກອງ​ປະຊຸມ​ສຸດ​ຍອດ​ຂອງ​ສະພາ​ຮ່ວມ​ມື​ເສດຖະກິດ​ແຫ່ງ​ຂົງ​ເຂດ​ເອ​ເຊຍ​ປາຊີ​ຟິກ
ຫລື APEC ທີ່ມີ​ຂຶ້ນ​ໃນ​ວັນ​ເສົາມື້​ນີ້​ແລະ​ວັນ​ອາທິດ​ມື້​ອື່ນ ປະທານ​າທິບໍດີ​ໂອ​ບາ​ມາ​ຄາດ​ວ່າ
​ຈະ​ທໍາ​ການ​ໂອ້​ລົມ​ສົນທະນາ​ກັນ​ເລື້ອງ​ຂໍ້​ສະ​ເໜີ​ສະບັບ​ນຶ່ງ​ກ່ຽວ​ກັບການຈັດ​ຕັ້ງ​ເຂດ​ການ​ຄ້າ​
ເສລີ​ຂຶ້ນ​ໃນ​ຂົງ​ເຂດ​ມະຫາສະມຸດ​ປາຊີ​ຟິກ ທີ່ຮວມທັງ​ສະຫະລັດ​ອາ​ເມຣິກາ, ອອສ​ເຕຣ​ເລຍ,
ບຣູ​ໄນ, ຊີ​ເລ, ມາ​ເລ​ເຊຍ, ນີວຊີ​ແລນ, ​ເປຣູ, ສິງກະ​ໂປ​ ແລະ​ຫວຽດນາມ.

ຍີ່ປຸ່ນ​ກ່າວ​ໃນ​ວັນ​ສຸກ​ວານ​ນີ້​ວ່າ ຕົນ​ຈະ​ເຂົ້າ​ປະກອບສ່ວນ​ໃນ​ການ​ພົບ​ປະ​ເຈ​ລະ​ຈາໃນ​ເລື້ອງ​
ການຈັດ​ຕັ້ງ​ເຂດ​ການ​ຄ້າ​ເສລີ​ຂຶ້ນ​ນີ້ ສົ່ງ​ເສີມ​ໂອກາດເພື່ອ​ຈະ​ດຶງ​ດູດ​ພວກ​ປະ​ເທດ​ມະຫາ​ອໍາ
ນາດ​ອື່ນໆ​ທາງ​ດ້ານ​ເສດຖະກິດມາ​ເຂົ້າ​ຮ່ວມ​ນໍາ ​ເຊ່ນ​ຈີນ​ເປັນ​ຕົ້ນ.

ຈາກລັດ​ຮາ​ວາຍ ຫລັງ​ຈາກ​ການ​ຢຸດ​ແວ່​ເປັນ​ເວລາ​ສັ້ນໆ​ທີ່​ອອສ​ເຕຣ​ເລຍ​ແລ້ວ ທ່ານ​ໂອ​ບາ​ມາ​ຈະ​ທໍາ​ການ​ເດີນ​ຢ້ຽມຢາມອິນ​ໂດ​ເນ​ເຊຍ​ຄັ້ງ​ທີ​ສອງ​ຂອງ​ທ່ານ​ໃນ​ຖານະ​ເປັນ​ປະທານາທິບໍດີ ບ່ອນ​ທ່ີ​ທ່ານ​ໄດ້​ໄປ​ໃຊ້​ຊີວິດ​ຢູ່​ນັ້ນ​ເວລາ​ຍັງ​ເປັນ​ເດັກ​ຢູນັ້ນ. ​ໃນ​ລະຫວ່າງ​ການ​ຢ້ຽມຢາມ​ຂອງ​ທ່ານ​ຄັ້ງນີ້ ທ່ານ​ໂອ​ບາ​ມາ​ຈະ​ເປັນ​ປະທານາທິບໍດີ​ຂອງ​ສະຫະລັດ​ຄົນ​ທໍາ​ອິດ​ທີ່ຈະ​ເຂົ້າ​ຮ່ວມ​ໃນ​ກອງ​ປະຊຸມ​ສຸດ​ຍອດ​ໃນ​ເອ​ເຊຍ​ຕາ​ເວັນ​ອອກ ຊຶ່ງ​ຈະ​ມີ​ຂຶ້ນ​ທີ​ເກາະ​ບາ​ຫລີ ບ່ອນ​ທ່ອງ​ທ່ຽວ​ຂອງ​ອິນ​ໂດ​ເນ​ເຊ​ຍນັ້ນ.

ບັນດາ​ນັກວິ​ເຄາະ​ກ່າວ​ວ່າ ທ່ານ​ໂອ​ບາ​ມາ​ຈະ​ໃຊ້​ການ​ຢ້ຽມຢາມ​ຂອງ​ທ່ານ​ນີ້ ​ເພື່ອ​ໃຫ້​ຄວາມ​ໝັ້ນ​ໃຈ​ຄືນ​ໃໝ່​ຕໍ່​ພວກ​ປະ​ເທດ​ພັນທະ​ມິດ​ວ່າ ສະຫະລັດ​ຈະ​ຫລິ້ນ​ບົດບາດ​ສໍາຄັນ​ໃນ​ພາກ​ພື້ນ​ແລະ​ການ​ເປັນ​ດຸນຍະ​ພາບ​ກັນ​ກັບ​ຖານະ​ພາບ​ຂອງ​ຈີນ​ທີ່​ກໍາລັງ​ເພີ່ມ​ທະວີ​ຂຶ້ນ​ໃນ​ຂົງ​ເຂດ​ນັ້ນ.

ເບິ່ງວີດີໂອ ລາຍງານ ສະຫະລັດກ່າວວ່າ ຈີນສາມາດຊ່ວຍແກ້ໄຂບັນຫາວິກິດການ
ການເງິນໃນຢູໂຣບ:

XS
SM
MD
LG