ສະຫະລັດແລະອີກແປດປະເທດ ທີ່ກອງປະຊຸມທີ່ນະຄອນຫລວງໂຮໂນລູລູ ລັດຮາວາຍ
ໄດ້ເຫັນພ້ອມນໍາກັນກ່ຽວກັບໂຄງຮ່າງໂດຍສັງເຂບທີ່ກ້ວາງຂວາງ ຂອງຂໍ້ຕົກລົງສ້າງຕັ້ງ
ເຂດການຄ້າເສລີລຽບຝັ່ງມະຫາສະມຸດປາຊິຟິກ.
ໃນຖະແຫລງການຮ່ວມສະບັບນຶ່ງອອກເມື່ອວັນເສົາວານນີ້ ພວກຜູ້ນໍາຂອງເກົ້າປະເທດ
ໄດ້ເອີ້ນຂໍ້ຕົກລົງ ພາຄີຂ້າມປາຊິຟິກ ວ່າເປັນຂີດໝາຍໄປສູ່ເປົ້າໝາຍຂອງເຂົາເຈົ້າໃນການ
ເຊື່ອມໂຍງເສດຖະກິດຂອງພວກເຂົາເຈົ້າເຂົ້າກັນ ແລະເຮັດໃຫ້ມີເສຮີພາບຫລາຍຂຶ້ນໃນ
ການຄ້າແລະການລົງທຶນນໍາກັນແລະກັນ. ນອກນີ້ພວກຜູ້ນໍາດັ່ງກ່າວຍັງໄດ້ສະແດງຄວາມ
ໝັ້ນໃຈວ່າ ຂໍ້ຕົກລົງນີ້ຈະຊ່ວຍສ້າງໜ້າວຽກ ປັບປຸງມາດຕະການຄອງຊີບແລະລົດຜ່ອນ
ຄວາມທຸກຈົນລົງ ຢູ່ໃນປະເທດຂອງພວກເຂົາເຈົ້າ.
ນອກເໜືອຈາກສະຫະລັດແລ້ວ ສະມາຊິກໃນພາຄີມີ ອອສເຕຣເລຍ ບຣູໄນ ຊີເລ ມາເລ
ເຊຍ ນີວຊີແລນ ເປຣູ ສິງຄະໂປ ແລະ ຫວຽດນາມ ສ່ວນຍີ່ປຸ່ນກໍໄດ້ສະແດງຄວາມສົນໃຈ
ຢາກຈະເຂົ້າຮ່ວມຢູ່ຄືກັນ.
ທ່ານ ບາຣັກ ໂອບາມາ ປະທານາທິບໍດີສະຫະລັດ ເປັນເຈົ້າພາບກອງ ປະຊຸມພວກຜູ້ນໍາ
ກຸ່ມເອເພັກ ເປັນເວລາສອງມື້ຄັ້ງນີ້ ທີ່ລັດບ້ານເກີດຂອງທ່ານ. ທ່ານໂອບາມາກ່າວວ່າ ຂໍ້
ຕົກລົງກັບປະເທດຕ່າງໆກຸ່ມນຶ່ງ ທີ່ໄດ້ທໍາການຄ້າປະຈໍາປີ ໃນມູນຄ່າປະມານ 200 ພັນ
ລ້ານໂດລາກັບ ສະຫະລັດ ຢູ່ແລ້ວນັ້ນ ຈະໃຫ້ຜົນປະໂຍດແກ່ປະເທດທັງໝົດທີ່ມີສ່ວນນໍາ
ກັນເພາະວ່າ ມັນຈະກະຕຸກຊຸກຍູ້ການສົ່ງອອກ ແລະສ້າງໜ້າວຽກ.
ທ່ານໂອບາມາກ່າວຕື່ມວ່າ ພວກປະເທດສະມາຊິກໄດ້ສັ່ງໃຫ້ທີມງານເຮັດລາຍລະອຽດ
ຕ່າງໆທີ່ຍັງຄ້າງຄານັ້ນໃຫ້ສໍາເລັດລຸລ່ວງ ເພື່ອຈະສະຫລູບຂໍ້ຕົກລົງກັນ ພາຍໃນປີຕໍ່ມານີ້.
ເບິ່ງວີດີໂອ ລາຍງານທີ່ກ່ຽວຂ້ອງກັນ:
