ປະທານາທິບໍດີບາຣັກ ໂອບາມາແຫ່ງສະຫະລັດກໍາລັງເດີນທາງກັບຄືນສູ່ສະຫະລັດ
ໃນວັນເສົາມື້ນີ້ ຫລັງຈາກເສດສິ້ນການຢ້ຽມຢາມຂົງເຂດເອເຊຍປາຊີຟິກເປັນເວລາ 9 ມື້
ທີ່ລັດຮາວາຍ ປະເທດອອສເຕຣເລຍແລະອິນໂດເນເຊຍ ເພື່ອເຂົ້າຮ່ວມໃນກອງປະຊຸມ
ສຸດຍອດຂອງບັນດາຜູ້ນໍາໃນພາກເອເຊຍຕາເວັນອອກ.
ໃນເວລາພຽງບໍ່ເທົ່າໃດຊົ່ວໂມງ ກ່ອນເຮືອບິນນໍ້າເບີນຶ່ງກອງທັບອາກາດຫລື Air Force
One ຊຶ່ງເປັນເຮືອບິນປະຈໍາປະທານາທິບໍດີສະຫະລັດ ບິນອອກຈາກເກາະບາຫລີ ອິນໂດ
ເນເຊຍ ທ່ານໂອບາມາແລະທ່ານເຫວິ້ນເຈຍບາວ ນາຍົກລັດຖະມົນຕີຈີນ ໄດ້ພົບປະກັນຢູ່
ຂ້າງນອກກອງປະຊຸມສຸດຍອດເອເຊຍຕາເວັນອອກ ເພື່ອທໍາການໂອ້ລົມສົນທະນາກັນ
ເລື້ອງການເສດຖະກິດລະຫວ່າງສອງປະເທດ.
ບັນດາເຈົ້າໜ້າທີ່ປະຈໍາທໍານຽບຂາວກ່າວວ່າ ທ່ານໂອບາມາໄດ້ເນ້ນເຖິງຄວາມສໍາຄັນທີ່
ຈີນຈະຕ້ອງປັບຄ່າເງິນຢວນຂອງຕົນ ຊຶ່ງທາງກຸງວໍຊິງຕັນກ່າວວ່າ ຄ່າເງິນຢວນແມ່ນຕໍ່າ
ເກີນໄປນັ້ນ.
ພວກຜູ້ນໍາທັງສອງໄດ້ໂອ້ລົມສົນທະນາ ເຊ່ນກັນໃນເລື້ອງເສລີພາບໃນການເດີນເຮືອແລະ
ການສົ່ງສິນຄ້າທີ່ເສລີໃນທະເລຈີນໃຕ້ ແລະການແກ້ໄຂບັນຫາຂັດແຍ່ງກັນໂດຍສັນຕິວິທີ
ຢູ່ໃນຂົງເຂດນັ້ນ. ກ່ອນໜ້ານັ້ນ ທ່ານເຫວິ້ນເຈຍບາວໄດ້ກ່າວເຕືອນອັນທີ່ທ່ານເອີ້ນວ່າ
ການແຊງແຊງຈາກພາຍນອກໃນບັນຫາຂັດແຍ່ງກັນດັ່ງກ່າວ ຊຶ່ງພົວພັນກັບຟີລິບປິນ
ຫວຽດນາມ ແລະບາງປະເທດເອເຊຍອື່ນໆ.
