ປະທານາທິບໍດີສະຫະລັດ ທ່ານ ບາຣັກ ໂອບາມາ ໄດ້ທໍາການເຈລະຈາກັບພວກຜູ້ນໍາ
ຂົງເຂດເອເຊຍ ທີ່ເຂົ້າຮ່ວມໃນກອງປະຊຸມສຸດຍອດເອເຊຍຕາເວັນອອກທີ່ເກາະບາຫລີ
ປະເທດອິນໂດເນເຊຍ.
ຫລັງຈາກການເດີນທາງໄປຮອດ ທ່ານໂອບາມາ ກໍໄດ້ເປັນພິຍານໃນການເຊັນສັນຍາ
ສັ່ງເຮືອບິນໄອພົ່ນໂບອິ້ງຫລາຍລໍາ ໂດຍບໍລິສັດການບິນພາຍໃນປະເທດ Lion Air
ຂອງອິນໂດເນເຊຍ.
ບໍລິສັດໂບອິ້ງກ່າວເມື່ອວັນພະຫັດວານນີ້ວ່າ ການສັ່ງຊື້ຍົນໄອພົ້ນໂບອິ້ງ ລຸ້ນ 737
ຈໍານວນ 230 ລໍາ ທີ່ຕົກເປັນເງິນເກືອບ 22 ພັນລ້ານໂດລານັ້ນ ນັບວ່າເປັນການສັ່ງ
ຊື້ທາງພານິດ ຈໍານວນຫລາຍທີ່ສຸດໃນປະວັດສາດ ຂອງບໍລິສັດ.
ກອງປະຊຸມສອງຝ່າຍເທື່ອທໍາອິດໃນລາຍການຂອງທ່ານໂອບາມາ ແມ່ນປະຊຸມກັບ
ນາຍົກລັດຖະມົນຕີອິນເດຍ ທ່ານ Manmohan Singh. ທ່ານໂອບາມາກ່າວວ່າ
ທັງສອງປະເທດຫລິງເຫັນກອງປະຊຸມສຸດຍອດເອເຊຍຕາເວັນອອກວ່າ ເປັນເວທີຊັ້ນ
ນໍາສໍາລັບປະຕິບັດງານຮ່ວມກັນໃນຫລາຍໆບັນຫາ ນັບຕັ້ງແຕ່ຄວາມໝັ້ນຄົງຂອງ
ການເດີນທະເລ ແລະການຫ້າມແຜ່ຜາຍນີວເຄລຍ ໄປຫາ ການເສີມຂະຫຍາຍຄວາມ
ຮ່ວມມືກັນໃນເລື່ອງການບັນເທົາໄພພິບັດ ແລະການຊ່ວຍເຫລືອດ້ານມະນຸດສະທໍາ.
ນອກນີ້ແລ້ວ ປະທານາທິບໍດີສະຫະລັດ ຍັງໄດ້ພົບປະກັບພວກຜູ້ນໍາຈາກ ຟິລິບປິນ
ມາເລເຊຍ ແລະເຈົ້າພາບກອງປະຊຸມສຸດຍອດກໍຄືອິນໂດເນເຊຍ ກ່ອນຈະເຂົ້າຮ່ວມ
ງານລ້ຽງອາຫານຄໍ່າ ຂອງກອງປະຊຸມສຸດຍອດເອເຊຍຕາເວັນອອກ.
ໃນລະຫວ່າງການຢ້ຽມຢາມເກາະຕາກອາກາດບາຫລີຂອງອິນໂດເນເຊຍຄັ້ງນີ້ ທ່ານ
ໂອບາມາຍັງຈະໄດ້ພົບປະກັບບັນດາຜູ້ນໍາຂອງພວກປະເທດເອເຊຍ ທີ່ສະແຫວງຫາ
ຄວາມສະໜັບສະໜຸນຈາກສະຫະລັດ ໃນກໍລະນີພິພາດເລຶ່ອງເຂດນໍ້າແດນດິນກັບຈີນ
ໃນເຂດທະເລຈີນໃຕ້ນັ້ນນໍາ.
