ສະຫະລັດແລະອິນເດຍກ່າວວ່າພວກຕົນຈະໂຮມກໍາລັງກັນ
ເພື່ອນຳເອົາວິໄສທັດທີ່ມີຮ່ວມກັນ ກ່ຽວກັບສັນຕິພາບແລະ
ຄວາມວັດທະນາຖາວອນນັ້ນ ມາສູ່ຂົງເຂດເອເຊຍແລະທົ່ວໂລກ.
ປະທານາທິບໍດີທ່ານ Barack Obama ແລະນາຍົກລັດຖະມົນຕີອິນເດຍ ທ່ານ Manmohan Singh ໄດ້ຖະແຫລງກ່ຽວກັບເລື້ອງນີ້ ຫຼັງຈາກທີ່ໄດ້ປະຊຸມກັນໃນວັນຈັນມື້ນີ້ ຢູ່ນະຄອນຫລວງ New Delhi ຊຶ່ງທັງສອງທ່ານໄດ້ກ່າວຢໍ້າເຖິງຄໍາ ຢືນຢັດຂອງທ່ານ Obama ທີ່ວ່າ ຄວາມສໍາພັນລະຫວ່າງສະຫະລັດກັບອິນເດຍຈະຊ່ວຍກໍານົດສັດຕະວັດທີ່ 21 ແລະທ່ານ Obama ໄດ້ກ່າວຕໍ່ພວກນັກຂ່າວວ່າ ອິນເດຍໄດ້ໂຜ່ໂຕຂຶ້ນມາເປັນ ອໍານາດນຶ່ງຂອງໂລກແລ້ວ.
ຜູ້ນຳຂອງສອງປະເທດປະຊາທິປະໄຕທີ່ໃຫຍ່ທີ່ສຸດຂອງໂລກ ໄດ້ກ່າວໂດຍສັງເຂບເຖິງຂໍ້ຕົກລົງຫຼາຍໆຂໍ້ທີ່ໄດ້ບັນລຸກັນ ຊຶ່ງມີເປົ້າໝາຍແນໃສ່ສົ່ງເສີມການຮ່ວມມືກັນໃນບັນຫາສໍາຄັນຫລາຍໆເລື້ອງ ນັບຈາກການຕໍ້ສູ້ກັບພວກກໍ່ການຮ້າຍ, ແລະການເສີມຂະຍາຍທາງດ້ານເສດຖະກິດ ໄປຈົນເຖິງການຕໍ່ສູ້ກັບການປ່ຽນແປງຂອງດິນຟ້າອາກາດ.
ທ່ານ Obama ຍັງກ່າວຢໍ້າເຖິງຂໍ້ສະເໜີທີ່ຈະຊ່ອຍເຫຼືອອິນເດຍ ໃນການຫລຸດຜ່ອນຄວາມເຄັ່ງຕຶງ ລະຫວ່າງອິນເດຍແລະປາກິສຖານ ແຕ່ທ່ານເວົ້າວ່າສະຫະລັດຈະບໍ່ບັງຄັບໃຫ້ຮັບເອົາວິທີການແກ້ໄຂໃດໆ ທີ່ມີການສະເໜີຂຶ້ນ.
