ທໍານຽບຂາວກ່າວວ່າ ໃນວັນພຸດມື້ອື່ນນີ້ ປະທານາທິບໍດີບາຣັກໂອບາມາຈະປະກາດແຜນ ການຂອງທ່ານໃຫ້ຮູ້ກ່ຽວກັບການຖອນທະຫານສະຫະລັດອອກຈາກອັຟການີສຖານນັ້ນ.
ເຈົ້າໜ້າທີ່ຂັ້ນອາວຸໂສທ່ານນຶ່ງໃນວົງການລັດຖະບານກ່າວວ່າ ທ່ານໂອບາມາຈະປະກາດໃຫ້ຮູ້ ທັງແຜນການເລີ້ມຖອນທະຫານສະຫະລັດກັບຄືນປະເທດ ຕັ້ງແຕ່ເດືອນໜ້ານີ້ເປັນຕົ້ນໄປແລະການຖອນທະຫານ ຄັ້ງຕໍ່ໆໄປໃນອະນາຄົດທີ່ມີວັດຖຸປະສົງເພື່ອໃຫ້ທະຫານອັຟການີສຖານ ເຂົ້າຄວບຄຸມການຮັກສາຄວາມປອດໄພດ້ວຍຕົນເອງພາຍໃນປີ 2014.
ຄໍາປະກາດທີ່ວ່ານີ້ມີຂຶ້ນໃນທ່າມກາງຄວາມບໍ່ພໍໃຈຂອງປະຊາຊົນອະເມລິກັນທີ່ມີເພີ່ມຂຶ້ນເລື້ອຍໆນໍາສົງຄາມໃນອັຟການີສຖານ ສືບເນື່ອງມາຈາກຄວາມເປັນຫ່ວງກ່ຽວກັບຈໍານວນຜູ້ບາດເຈັບແລະເສຍຊີວິດຂອງທະຫານສະຫະລັດແລະຜົນກະທົບຂອງຄ່າໃຊ້ຈ່າຍຍ້ອນສົງຄາມຕໍ່ເສດຖະກິດຂອງສະຫະລັດນັ້ນ.
ໃນເມືອງ Baltimore ລັດ Maryland ກອງປະຊຸມເຈົ້າຄອງກໍາແພງນະຄອນໃນສະຫະລັດໄດ້ຮັບຜ່ານຮ່າງຍັດຕິສະບັບນຶ່ງໃນວັນຈັນວານນີ້ຮຽກຮ້ອງໃຫ້ລັດຖະສະພາສະຫະລັດຍຸດຕິສົງຄາມໃນອັຟການີສຖານແລະໃນອີຣັກໂດຍໄວ ແລະໃຫ້ນໍາເງິນຈໍານວນຫລາຍພັນລ້ານໂດລາທີ່ໃຊ້ຈ່າຍໃນສົງຄາມທັງສອງໃນແຕ່ລະເດືອນນັ້ນມາໃຊ້ຈ່າຍສໍາລັບຄວາມຕ້ອງການຕ່າງໆພາຍໃນປະເທດ.
ທ່ານໂອບາມາ ໄດ້ປະກາດໃຫ້ຮູ້ມາກ່ອນກ່ຽວກັບການເລີ້ມຖອນທະຫານອອກຈາກອັຟການິສ
ຖານໃນເດືອນກໍລະກົດນີ້ ເມື່ອເດືອນທັນວາ ປີ 2009 ເວລາທ່ານນຳສະເໜີຍຸດທະສາດ
ທົ່ວໄປຂອງທ່ານສໍາລັບອັຟການີສຖານນັ້ນ.
