ປະທານາທິບໍດີສະຫະລັດ ທ່ານບາຣັກ ໂອບາມາ ຮຽກຮ້ອງໃຫ້ຊາວອາເມຣິກັນທັງມວນ
ສະແດງຄວາມຮູ້ບຸນຄຸນ ຕໍ່ພວກທະຫານໆ ທັງໃນອະດີດແລະປັດຈຸບັນ ເນື່ອງໃນໂອກາດ
ວັນ Memorial Day ຫຼືວັນໄວ້ອາໄລໃຫ້ແກ່ພວກທະຫານທີ່ໄດ້ເສຍຊີວິດໃນສົງຄາມປາງ
ຕ່າງໆຂອງສະຫະລັດ ແລະປະທານາທິບໍດີກໍໄດ້ສະແດງຄວາມຮູ້ບຸນຄຸນຕໍ່ພວກທະຫານໆ
ທັງຊາຍແລະຍິງ ທີ່ໄດ້ເສຍຊີວິດໃນລະຫວ່າງຮັບໃຊ້ປະເທດຊາດ.
ໃນລະຫວ່າງການກ່າວຄຳປາໄສປະຈຳສັບປະດາໃນວັນເສົາມື້ືນີ້ ທ່ານໂອບາມາເວົ້າວ່າ ວັນ
Memorial Day ແມ່ນໂອກາດທີ່ປະເທດຊາດ ຈະໃຫ້ການຢືນຢັນໃໝ່ອີກຄັ້ງນຶ່ງ ກ່ຽວກັບ
ການເບິ່ງແຍງດູແລພວກນັກລົບເກົ່າ ແລະຄອບຄົວຂອງພວກເຂົາເຈົ້າ.
ປະທານາທິບໍດີໂອບາມາເວົ້າວ່າ ການຄໍ້າປະກັນໃຫ້ພວກເຂົາເຈົ້າໄດ້ຮັບການຮັກສາສຸຂະພາບ
ໄດ້ເຂົ້າຮຽນຂັ້ນມະຫາວິທະຍາໄລ ແລະມີວຽກການທີ່ດີໆເຮັດແມ່ນເປັນພຽງບໍ່ເທົ່າໃດສິ່ງທໍ່ນັ້ນ
ທີ່ພວກນັກລົບເກົ່າ ສົມຄວນຈະໄດ້ຮັບ ໃນການສ່ຽງທຸກສິ່ງທຸກຢ່າງ ເພື່ອປົກປ້ອງອິດສະຫຼະ
ພາບ.
ໃນຄຳປາໄສຕອບປະຈຳສັບປະດາ ຂອງພັກຣີພັບບລີກັນນັ້ນ ສະມາຊິກສະພາຕໍ່າ Lynn Jen-
kins ຈາກລັດ Kansas ກ່າວວ່າ ຄວນຈະດຳເນີນການທຸກສິ່ງຢ່າງເພື່ອຊ່ອຍໃຫ້ພວກນັກລົບ
ເກົ່າຈະເລີນກ້າວໜ້າ ໃນເສດຖະກິດ ທີ່ເຂັ້ມແຂງ. ສະມາຊິກສະພາຕໍ່າ Jenkins ກ່າວຕໍ່ໄປວ່າ
ເປັນຍ້ອນນະໂຍບາຍຂອງປະທານາທິບໍດີໂອບາມາຈຶ່ງເຮັດໃຫ້ຕະຫຼາດວຽກງານອ່ອນແອແລະ
ເຮັດໃຫ້ລາຄານໍ້າມັນແລະອາຫານແພງຂຶ້ນ.
ທ່ານນາງຍັງຖິ້ມໂທດ ກ່ຽວກັບການຊັກຊ້າລົງຂອງເສດຖະກິດ ໃສ່ສະມາຊິກພັກເດໂມແຄຣັດ
ຂອງທ່ານໂອບາມາຢູ່ໃນສະພາສູງສະຫະລັດໂດຍເວົ້າວ່າ ພວກເຂົາເຈົ້າໄດ້ແກ່ຍາວບໍ່ຍອມເອົາ
ມາດຕະການດ້ານນິຕິບັນຢັດເພື່ອຊຸກຍູ້ໃຫ້ມີວຽກເຮັດງານທຳເພີ່ມຂຶ້ນນັ້ນ.