ປະທານາທິບໍດີສະຫະລັດທ່ານບາຣັກ ໂອບາມາ ກ່າວວ່າ ທ່ານໄດ້ເຊັນຮ່າງກົດໝາຍສະບັບ
ນຶ່ງທີ່ຈະເຮັດໃຫ້ພວກຄົນງານກໍ່ສ້າງມີວຽກການເຮັດຕໍ່ໄປໃນການບູລະນະສ້າງສາໂຄງລ່າງ
ພື້ນຖານຂອງປະເທດທີ່ພວມເພພັງໄປນັ້ນ. ທ່ານເວົ້າວ່າ ຮ່າງກົດໝາຍສະບັບນີ້ຍັງຈະຍຸຕິບໍ່
ໃຫ້ອັດຕາດອກເບ້ຍໃນການກູ້ຢືມເງິນຈາກລັດຖະບານກາງຂອງພວກນັກສຶກສາຫຼາຍກວ່າ
7 ລ້ານຄົນເພີ່ມຂຶ້ນເປັນສອງເທົ່າ.
ໃນລະຫວ່າງການກ່າວຄຳປາໄສປະຈຳສັບປະດາຂອງທ່ານ ໃນວັນເສົາມື້ນີ້ ທ່ານໂອບາມາ
ເວົ້າວ່າ ຮ່າງກົດໝາຍທີ່ທ່ານໄດ້ລົງນາມໄປໃນມື້ວັນສຸກ ຈະເຮັດໃຫ້ມີຄວາມແຕກຕ່າງຢ່າງ
ແທ້ຈິງ ຕໍ່ຊີວິດຂອງຊາວອາເມຣິກັນຫຼາຍລ້ານຄົນ. ປະທານາທິບໍດີໂອບາມາເວົ້າວ່າ ແນວ
ໃດກໍຕາມ ພວກເຮົາຍັງມີຫຼາຍສິ່ງຫຼາຍຢ່າງທີ່ຈະຕ້ອງໄດ້ກະທຳຕື່ມອີກ.
ທ່ານເວົ້າວ່າ ທ່ານໄດ້ຮຽກຮ້ອງຕໍ່ລັດຖະສະພາສະຫະລັດ ມາໄດ້ຫຼາຍເດືອນແລ້ວ ໃຫ້ນຳ
ເອົາເງິນເຄິ່ງນຶ່ງ ຂອງຈຳນວນທີ່ບໍ່ຕ້ອງການໃຊ້ອີກຕໍ່ໄປໃນການເຮັດສົງຄາມນັ້ນ ມາພັດ
ທະນາສ້າງສາປະເທດຢູ່ໃນສະຫະລັດ. ທ່ານກ່າວວ່າ ມີພວກຄົນງານກໍ່ສ້າງຫຼາຍຮ້ອຍພັນ
ຄົນ ພ້ອມແລ້ວທີ່ຈະໄປເຮັດວຽກ ເພື່ອສ້າງຖະໜົນຫົນທາງ ຂົວ ແລະຕາໜ່າງໄຮ້ສາຍ.
ປະທານາທິບໍດີໂອບາມາເວົ້າວ່າ ນອກນັ້ນທ່ານຍັງຮຽກຮ້ອງໃຫ້ສະພາຂະຫຍາຍການໃຫ້
ຄວາມຊ່ອຍເຫຼືອທາງດ້ານການເງິນ ແກ່ພວກນັກສຶກສາ ເພື່ອໃຫ້ໂອກາດແກ່ຊາວອາເມຣິ
ກັນ 2 ລ້ານຄົນໄດ້ຮຽນຮູ້ກ່ຽວກັບຄວາມສາມາດໃໝ່ໆ ທີ່ທຸລະກິດຕ່າງໆຕ້ອງການຈ້າງ
ໃນເວລານີ້.
ທ່ານເວົ້າວ່າ ການສຶກສາຂັ້ນສູງ ໃນສະຫະລັດ ບໍ່ຄວນຈະເປັນສິ່ງຟູມເຟືອຍ ທີ່ສະຫງວນ
ໄວ້ສຳຫຼັບພວກຊົນຊັ້ນພິເສດ ຈຳນວນນ້ອຍ. ທ່ານໂອບາມາກ່າວວ່າ ການສຶກສາຂັ້ນສູງ
ແມ່ນຄວາມຈຳເປັນທາງດ້ານເສດຖະກິດທີ່ທຸກໆຄອບຄົວອາເມຣິກັນຄວນຈະສາມາດຫາ
ມາໄດ້.
ໃນຄຳປາໄສຕອບຂອງພັກຣີພັບບລີກັນ ໃນວັນເສົາມື້ນີ້ ແມ່ນໄດ້ແນໃສ່ກົດໝາຍຮັກສາ
ສຸຂະພາບຂອງລັດຖະບານປະທານາທິບໍດີໂອບາມາ ທີ່ໄດ້ມີການຕັດສິນເຫັນພ້ອມໂດຍ
ສານສູງສຸດຂອງສະຫະລັດໃນສັບປະດາແລ້ວ. ສະມາຊິກສະພາຕໍ່າ Ann Marie Buer-
kle ຈາກນິວຢອກໂດຍອ້າງເຖິງແຜນການຮັກສາສຸຂະພາບຂອງປະທານາທິບໍດີກ່າວວ່າ
ນະໂຍບາຍຂອງປະທານາທິບໍດີໂອບາມາ ແມ່ນເຮັດໃຫ້ສະພາບການຢູ່ໃນສະຫະລັດຊຸດ
ໂຊມລົງຕື່ມ.
ທ່ານນາງເວົ້າວ່າ ການຕັດສິນຂອງສານສູງສຸດ ແມ່ນໄດ້ເພີ່ມຄວາມຮີບຮ້ອນໃນການທີ່
ຈະຍົກເລີກກົດໝາຍຮັກສາສຸຂະພາບ ທີ່ເອີ້ນກັນໂດຍທົ່ວໄປວ່າ Obamacare ນັ້ນ.