ປະທານາທິບໍດີສະຫະລັດທ່ານບາຣັກ ໂອບາມາ ຮຽກຮ້ອງໃຫ້ລັດຖະສະພາສະຫະລັດຕໍ່ອາ
ຍຸການຕັດພາສີອີກນຶ່ງປີໃຫ້ແກ່ຊາວອາເມຣິກັນ 98% ທີ່ມີລາຍໄດ້ບໍ່ຮອດ 250,000 ໂດລາ
ຕໍ່ປີນັ້ນ.
ປະທານາທິບໍດີໂອບາມາກ່າວໃນຄຳປາໄສປະຈຳສັບປະດາຂອງທ່ານໃນວັນເສົາມື້ນີ້ວ່າ ການ
ຂຶ້ນພາສີຊຶ່ງຈະມີຜົນບັງຄັບໃຊ້ໃນວັນທີ 1 ມັງກອນນີ້ ຈະເປັນການສູນເສຍລາຍໄດ້ຢ່າງໃຫຍ່ ສຳຫຼັບຄອບຄົວຊົນຊັ້ນກາງ.
ປະທານາທິບໍດີໂອບາເວົ້າວ່າ ພາຍໃຕ້ແຜນການຂອງທ່ານນັ້ນຊາວອາເມຣິກັນທີ່ຍັງເຫຼືອອີກ
2% ຈະຕ້ອງໄດ້ຈ່າຍພາສີ ຕື່ມຂຶ້ນອີກໜ້ອຍນຶ່ງ ໃນລາຍໄດ້ທີ່ເຂົາເຈົ້າໄດ້ຮັບກາຍ 250,000
ໂດລາ. ທ່ານເວົ້າວ່າຊາວອາເມຣິກັນທີ່ຮັ່ງມີໃນຈຳນວນບໍ່ຫຼາຍຈະກັບຄືນໄປເສຍພາສີໃນອັດ
ຕາທີ່ພວກເຂົາເຈົ້າເຄີຍເສຍມາແລ້ວໃນສະໄໝລັດຖະບານປະທານາທິບໍດີ Bill Clilnton ຊຶ່ງ
ທ່ານໂອບາມາເວົ້າວ່າ ມັນເປັນຊ່ວງເວລາ ທີ່ເສດຖະກິດສະຫະລັດ ໄດ້ສ້າງວຽກເຮັດງານທຳ
ໃໝ່ເກືອບ 23 ລ້ານໜ້າວຽກແລະງົບປະມານມີເງິນເຫຼືອຈ່າຍຫຼາຍທີ່ສຸດໃນປະຫວັດສາດ.
ໃນຄຳປາໄສຕອບຂອງພັກຣີພັບບລີກັນນັ້ນ ສະມາຊິກສະພາສູງ Rob Portman ຈາກລັດ
Ohio ກ່າວວ່າແຜນການເກັບພາສີເພີ່ມຂຶ້ນຂອງປະທານາທິບໍດີຕໍ່ພວກທີ່ສ້າງວຽກເຮັດງານ
ທຳໃນລະຫວ່າງທີ່ຍັງມີການຂາດແຄນວຽກການນັ້ນ ແມ່ນມີຄວາມໝາຍ ຄ້າຍຄືກັນກັບຕັດ
ການສົ່ງນໍ້າໄປໃຫ້ໃນລະຫວ່າງທີ່ເກີດຄວາມແຫ້ງແລ້ງ. ທ່ານ Portman ເວົ້າວ່າ ອັດຕາຄົນ
ຫວ່າງງານແມ່ນຢູ່ໃນ ລະດັບກາຍ 8% ເປັນເວລາດົນນານທີ່ສຸດ ນັບຕັ້ງແຕ່ໄດ້ເກີດສະພາບ
ເສດຖະກິດຕົກຕໍ່າຄັ້ງໃຫຍ່.
ສະມາຊິກສະພາສູງ Portman ກ່າວວ່າ ທ່ານໂອບາມາບໍ່ໄດ້ເພັ່ງເລັງໃສ່ການສ້າງວຽກເຮັດ
ງານທຳ ແລະກະຕຸກຊຸກຍູ້ໃຫ້ເສດຖະກິດຟື້ນໂຕຄືນ ແຕ່ກັບແນໃສ່ເພື່ອເຮັດໃຫ້ລັດຖະບານ
ເຕີບໃຫຍ່ຂະຫຍາຍໂຕແລະເຮັດໃຫ້ສະຫະລັດກ້າວໄປສູ່ການມີພາບພົດຂອງບັນດາປະເທດ
ທີ່ມີໜີ້ສິນໜັກໃນຢູໂຣບ.