ປະທານາທິບໍດີສະຫະລັດ ທ່ານບາຣັກ ໂອບາມາກ່າວວ່າ ບໍ່ມີການແກ້ໄຂທີ່ງ່າຍໆໃດເລີຍ
ສຳຫຼັບລາຄານໍ້າມັນທີ່ພວມແພງຂຶ້ນ ເຖິງແມ່ນໄດ້ມີການໃຫ້ຄຳໝັ້ນສັນຍາ ກ່ຽວກັບລາຄາ
ນໍ້າມັນ 2 ໂດລາຕໍ່ກາລອນ ໂດຍພວກນັກການເມືອງບາງຄົນກໍຕາມ.
ໃນລະຫວ່າງການກ່າວຄຳປາໄສ ປະຈຳສັບປະດາຂອງທ່ານໃນວັນເສົາມື້ນີ້ ທ່ານໂອບາມາ
ກ່າວວ່າ ການພັດທະນາແຫຼ່ງພະລັງງານໃໝ່ຕ່າງໆເຊັ່ນລົມ ແສງອາທິດ ແລະເຊື້ອໄຟຊີວະ
ພາບນັ້ນ ແມ່ນກະແຈສຳຄັນຕໍ່ການແກ້ໄຂແບບຍືນຍົງໃນໄລຍະຍາວ.
ປະທານາທິບໍດີໂອບາມາກ່າວວ່າ ການຂຸດເຈາະເພີ່ມຕື່ມອີກນັ້ນບໍ່ແມ່ນແຜນການ ມັນເປັນ
ພຽງຄຳຂວັນເພື່ອໃຫ້ພວກນັກການເມືອງໄດ້ຖືກຮັບເລືອກໃນການເລືອກຕັ້ງ. ປະທານາທິ
ບໍດີໂອບາມາເວົ້າວ່າ ການຜະລິດນໍ້າມັນຂອງສະຫະລັດ ແມ່ນຢູ່ໃນລະດັບສູງທີ່ສຸດໃນຮອບ
8 ປີ.
ທ່ານໂອບາມາໄດ້ກ່າວໂຈມຕີລັດຖະສະພາ ທີ່ຍັງສືບຕໍ່ໃຫ້ບຳເໜັດລາງວັນແກ່ບັນດາບໍລິສັດ
ນໍ້າມັນທີ່ໄດ້ກຳໄລດ້ວຍການໃຊ້ເງິນພາສີຂອງປະຊາຊົນ 4 ພັນລ້ານໂດລາໃຫ້ການເກື້ອກູນ
ອຸດໜຸນແກ່ບໍລິສັດເຫຼົ່ານີ້. ປະທານາທິບໍດີໄດ້ສະເໜີແນະໃຫ້ລັດຖະສະພາ ໃຫ້ການຜ່ອນຜັນ
ທາງດ້ານພາສີຄືນໃໝ່ ແກ່ການຜະລິດພະລັງງານທີ່ສະອາດ ຊຶ່ງທ່ານເວົ້າວ່າ ຈະຊ່ອຍສ້າງ
ວຽກເຮັດງານທຳແລະຫຼຸດຜ່ອນຄວາມຕ້ອງການນໍ້າມັນຂອງຕ່າງປະເທດ.
ໃນການຖະແຫຼງຕອບປະຈຳສັບປະດາ ຂອງພັກຣີພັບບລີກັນນັ້ນ ສະມາຊິກສະພາສູງ Kay
Bailey Hutchinson ຈາກລັດເທັກຊັສກ່າວວ່າ ນະໂຍບາຍຂອງປະທານາທິບໍດີ ເຮັດໃຫ້
ການສຳຫຼວດຫາແຫຼ່ງເຊື້ອໄຟຕະຫຼອດທັງການຂຸດເຈາະນໍ້າມັນແລະແກັສທຳມະຊາດມີການ
ຊັກຊ້າ. ສະມາຊິກສະພາສູງ Hutchinson ເວົ້າວ່າ ການຈຳກັດໂຄງການຂຸດເຈາະເຮັດໃຫ້
ມີການສູນເສຍວຽກງານຢູ່ໃນອຸສາຫະກຳນໍ້າມັນ.
ທ່ານນາງໄດ້ຮຽກຮ້ອງໃຫ້ປະທານາທິບໍດີໂອບາມາຊັກຊວນໃຫ້ພັກເດໂມແຄຣັທຊຶ່ງເປັນພັກ
ທີ່ກຳສຽງສ່ວນຫຼາຍໃນສະພາສູງສະຫະລັດໃຫ້ການສະໜັບສະໜຸນຕໍ່ນະໂຍບາຍພະລັງງານ
ຂອງທັງສອງພັກການເມືອງ ທີ່ທ່ານນາງເວົ້າວ່າ ຈະຊ່ອຍບັນດາຄອບຄົວຂອງຊາວອາເມຣິ
ກັນນັ້ນ.