ປະທານາທິບໍດີບາຣັກໂອບາມາ ສະເຫລີມສະຫລອງທ້າຍສັບປະດາວັນພໍ່ຢູ່ໃນສະຫະລັດ ຄື
ວັນອາທິດມື້ນີ້ ດ້ວຍການກ່າວເຕືອນພວກທີ່ເປັນພໍ່ທັງຫລາຍວ່າ ພວກລູກເຕົ້າຂອງເຂົາເຈົ້າ
ຕ້ອງການເວລາຈາກພວກເຂົາເຈົ້າແລະຄວາມຮັກທີ່ບໍ່ເງື່ອນໄຂຫລາຍກວ່າສິ່ງອື່ນໃດ.
ໃນການກ່າວປາໄສປະຈໍາສັບປະດາຂອງທ່ານໄປຍັງປະຊາຊົນທົ່ວປະເທດໃນວັນເສົາວ່ານນີ້
ທ່ານໂອບາມາກ່າວວ່າ ການເຕີບໃຫຍ່ຂຶ້ນມາໂດຍບໍ່ມີພໍ່ນັ້ນ ໄດ້ຊຸກຍູ້ໃຫ້ທ່ານເຮັດວຽກໜັກ
ແລະດີທີ່ສຸດໃນການລ້ຽງພວກລູກສາວ 2 ຄົນຂອງທ່ານ ຄືນາງ Malia ແລະນາງ Sasha
ນັ້ນ.
ພໍ່ແມ່ຂອງທ່ານໂອບາມາໄດ້ແຍກກັນ ເວລາທ່ານມີອາຍຸພຽງ 2 ຂວບ ແລະກ່ອນພໍ່ຂອງທ່ານ
ຈະເສຍຊີວິດໄປນັ້ນ ທ່ານໄດ້ພົບກັບເພິ່ນອີກພຽງເທື່ອດຽວ ເວລາທ່ານຍັງເປັນເດັກນ້ອຍໆ
ຢູ່. ສ່ວນໃຫຍ່ແມ່ນພໍ່ຕູ້ແມ່ຕູ້ເປັນຜູ້ລ້ຽງດູທ່ານມາໃນລັດຮາວາຍ ຊຶ່ງປະທານາທິບໍດີກ່າວວ່າ
ທ່ານເຄີຍຄິດຢູ່ສະເໜີວ່າ ຊີວິດຂອງທ່ານຈະເປັນໄປແນວໃດ ຖ້າຫາກທ່ານມີພໍ່ຢູ່ເຮືອນກັບ
ທ່ານນັ້ນ.
ທ່ານໂອບາມາ ກ່າວວ່າ ທ່ານໄດ້ຮຽນຮູ້ວ່າ ພວກລູກເຕົ້າຕ້ອງການຄວາມໝັ້ນຄົງສະເໜີຕົ້ນ
ສະເໝີປາຍແລະລະບຽບວິໄນຈາກພໍ່ແມ່ເພື່ອຊ່ອຍເຂົາເຈົ້າໃຫ້ສ້າງຕັ້ງຄວາມຮູ້ສຶກຮັບຜິດຊອບ
ຂອງຕົນເອງ.
