ປະທານາທິບໍດີບາຣັກໂອບາມາແຫ່ງສະຫະລັດ ກ່າວວ່າ
ທ່ານເຊື່ອວ່າພະລັງນີວເຄລຍເປັນແຫລ່ງພະລັງງານທີ່ສໍາ
ຄັນອັນນຶ່ງໃນສະຫະລັດ. ທ່ານໂອບາມາກ່າວເຊ່ນນີ້ໃນ
ການໃຫ້ສໍາພາດທາງໂທລະພາບໃນວັນອັງຄານວານນີ້
ວ່າ ພວກໂຮງໄຟຟ້ານີວເຄລຍຕ່າງໆແມ່ນໄດ້ອອກແບບ
ໃຫ້ທົນຕໍ່ໄພພິບັດທໍາມະຊາດລະດັບໃດລະນຶ່ງໄດ້ ຮວມ
ທັງໄພແຜ່ນດິນໄຫວແລະໄພນໍ້າຖ້ວມນັ້ນ. ແຕ່ທ່ານໂອບາ
ມາຍອມຮັບວ່າ ບໍ່ມີສະຖານທີ່ຜະລິດພະລັງງານໃດໆມີ
ຄວາມໝັ້ນຄົງແຂງແຮງທີ່ສາມາດຕ້ານທານກັບໄພອັນ
ຕະລາຍຕ່າງໆໄດ້ຢ່າງສິ້ນເຊີງ ຊຶ່ງທ່ານກ່າວຕໍ່ໄປວ່າ
ມັນເປັນສິ່ງສໍາຄັນທີ່ຈະດໍາເນີນງານເພື່ອປັບປຸງຄວາມ
ປອດໄພຂອງເຕັກໂນໂລຈີນີວເຄລຍໃຫ້ດີຂຶ້ນ.
ໂຄສົກປະຈໍາຄະນະກໍາມະການຄວບຄຸມນີວເຄລຍຂອງ
ສະຫະລັດ ທ່ານ Scott Burnell ກ່າວຕໍ່ວີໂອເອໃນວັນ
ອັງຄານວານນີ້ວ່າຄໍາຂໍຮ້ອງໃດໆທີ່ຈະສ້າງໂຮງໄຟຟ້ານີວເຄລຍຂຶ້ນໃນສະຫະລັດ ຈະຕ້ອງໄດ້
ພິຈາລະນາເຖິງຄວາມເປັນໄປໄດ້ຂອງເຫດການຮ້າຍແຮງຕ່າງໆທີ່ອາດຈະເກີດຂຶ້ນໃນສະຖານ
ທີ່ແຫ່ງນັ້ນ ເຊ່ນຫິມະຕົກໜັກ ເກີດໄພນໍ້າຖ້ວມ ແຜ່ນດິນໄຫວ ແລະຄື້ນຟອງຍັກສຸນາມິດັ່ງນີ້
ເປັນຕົ້ນ.
ທ່ານ Burnell ກ່າວວ່າ ສະຫະລັດຈະພິຈາລະນາເບິ່ງຂໍ້ມູນທຸກຢ່າງທີ່ຕົນໄດ້ຮັບມາຈາກວິກິດການນີວເຄລຍໃນປະເທດຍີ່ປຸ່ນ ເພື່ອຈະເຫັນວ່າອັນໃດທີ່ພວກເຮົາສາມາດຖອດຖອນບົດຮຽນຈາກນີ້ໄດ້.
ບັນຫາຕ່າງໆໃນໂຮງໄຟຟ້ານີວເຄລຍ ທີ່ປະສົບກັບໄພແຜ່ນດິນໄຫວຮ້າຍແຮງໃນຍີ່ປຸ່ນ ແມ່ນສ້າງຄວາມເສຍຫາຍໃຫ້ແກ່ວົງການອຸດສາຫະກໍານີວເຄລຍໃນໂລກ ຊຶ່ງເຮັດໃຫ້ລາຄາຮຸ້ນຂອງພວກບໍລິສັດຕ່າງໆ ທີ່ ສ້າງ ຫລືບໍລິຫານງານບັນດາໂຮງໄຟຟ້ານີວເຄລຍນັ້ນ ຕົກລົງ.
ນອກນັ້ນລາຄາເຊື້ອໄຟຢູເຣນຽມກໍຕົກເຊ່ນກັນ.
