ພວກຜູ້ນໍາຈາກທົ່ວໂລກ ຈາກສະຫະລັດ ໄປຈົນເຖິງປາກີສຖານ ພາກັນສະແດງຄວາມ ຮູ້ສຶກໂກດແຄ້ນ ແລະສະເໜີໃຫ້ການສະໜັບສະໜຸນແກ່ ປະເທດນໍເວ ລຸນຫລັງເຫດການ ໂຈມຕີເຖິງຂັ້ນເສຍຊີວິດສອງບັ້ນ ທີ່ໄດ້ສ້າງຄວາມຕື່ນຕົກໃຈໄປທົ່ວປະເທດນັ້ນ.
ປະທານາທິບໍດີ ບາຣັກ ໂອບາມາ ໄດ້ໂທລະສັບຫາທ່ານ Jens Stoltenberg ນາຍົກ ລັດຖະມົນຕີນໍເວ ເມື່ອວັນເສົາ ສະແດງຄວາມເສົ້າໂສກເສຍໃຈນໍາການເສຍຊີວິດ ແລະບາດ ເຈັບຂອງຊາວນໍເວຫລາຍຄົນທີ່ບໍ່ມີຄວາມ ຜິດຫຍັງ ໃນອັນທີ່ທ່ານເອີ້ນວາການໂຈມຕີທີ່ຂາດ ສະຕິຢັ້ງຄິດເມື່ອວັນສຸກຜ່ານມານັ້ນ ແລະພ້ອມກັບໃຫ້ຄໍາໝັ້ນສັນຍາ ວ່າສະຫະລັດຈະໃຫ້ ການຊ່ວຍເຫລືອນໍເວໃນທຸກໆຢ່າງທີ່ສາມາດເຮັດໄດ້. ກ່ອນໜ້ານີ້ ທ່ານນາງ ຮິລແລຣີ ຄລິນຕັນ ກ່າວວ່າ ສະຫະລັດພ້ອມແລ້ວ ທີ່ຈະສະໜັບສະໜຸນ ນໍເວ ໃນຂະນະ ທີ່ນໍເວຊອກຫາ ຕົວຜູ້ກໍ່ເຫດເຫລົ່ານັ້ນ ມາດໍາເນີນຄະດີ.
ທ່ານ David Cameron ນາຍົກລັດຖະມົນຕີອັງກິດໄດ້ເອີ້ນການໂຈມຕີຄັ້ງນີ້ວ່າ ໜ້າຢ້ານ ກົວຫລາຍທີ່ສຸດ ແລະກ່າວຕື່ມວ່າ ປະຊາຊົນອັງກິດ ພ້ອມທີ່ຈະຢືນຢັດຢູ່ຄຽງຂ້າງນໍເວ ໃນຊ່ວງເວລາແຫ່ງຄວາມຍາກລໍາບາກ ໃນຫລາຍໆມື້ຕໍ່ໜ້ານັ້ນ.
ສ່ວນທີ່ປະເທດເຢຍຣະມັນ ນາຍົກລັດຖະມົນຕີ Angela Merkel ໄດ້ຮຽກຮ້ອງໃຫ້ພວກ ໃດທີ່ເຊື່ອຖືໃນເສລີພາບນັ້ນ ຈົ່ງປຸ້ມລຸມເປັນອັນນຶ່ງອັນ ດຽວກັນ ເພື່ອຕໍ່ຕ້ານຄວາມກຽດ ຊັງອາຄາດແຄ້ນກັນນັ້ນ ທ່ານ Guido Westerwelle ລັດຖະມົນຕີຕ່າງປະເທດ ເຢຍຣະມັນ ໄດ້ກ່າວເຖິງການ ໂຈມຕີນັ້ນວ່າ ປ່າເຖື່ອນທີ່ສຸດ ແລະວ່າ ບໍ່ມີສິ່ງໃດເລີຍທີ່ຈະສາມາດຍົກຂຶ້ນມາອ້າງເປັນເຫດຜົນ ສໍາລັບກໍ່ຄວາມຮຸນແຮງແບບນີ້ໄດ້.
ເຊັ່ນດຽວກັນ ສໍານັກວາຕິກັນກໍໄດ້ສະແດງຄວາມເຫັນໃຈຕໍ່ຊາວນໍເວ. ທູດພິເສດຂອງວາຕິກັນປະຈໍານໍເວ ໄດ້ເອີ້ນການໂຈມຕີນັ້ນວ່າ ເປັນການກະທໍາທີ່ບ່ວງບ້າແທ້ໆ. ສ່ວນພະສັນຕະ ປາປາ Benedict ກ່າວໃນ ຖະແຫລງການສະບັນນຶ່ງໄປຍັງກະສັດ Herald ຂອງນໍເວ ວ່າ ພະອົງມີຄວາມເສຍໃຈຢ່າງສຸດຊຶ້ງຕໍ່ການສູນເສຍຊີວິດ ແລະຂໍສວດມົນໄຫວ້ວອນ ເພື່ອພວກ ເຄາະຮ້າຍເຫລົ່ານັ້ນ ແລະຄອບຄົວຂອງພວກເຂົາເຈົ້າ.
ແລະສ່ວນທີ່ປາກີສຖານ ທີ່ບໍ່ແມ່ນຄົນແປກໜ້າຕໍ່ການກໍ່ການຮ້າຍນັ້ນ ກ່າວເມື່ອວັນເສົາວານ ນີ້ວ່າ ຕົນເຫັນອົກເຫັນໃຈແລະຈະເອົາໃຈຊ່ວຍລັດຖະບານແລະປະຊາຊົນ ນໍເວ ຢ່າງເຕັມ ສ່ວນ.
ນອກນີ້ແລ້ວ ທ່ານ ພັນ ຄີມູນ ເລຂາທິການໃຫຍ່ອົງການສະຫະປະຊາຊາດ ກໍໄດ້ສະແດງ ຄວາມເສົ້າໂສກເສຍໃຈຂອງທ່ານເອງ ຕໍ່ນາຍົກລັດຖະມົນຕີ Stoltenberg ຂອງນໍເວ ແລະ ຕໍ່ບັນດາຄອບຄົວຂອງພວກເຄາະຮ້າຍນັ້ນ ໂດຍກ່າວວ່າ ອົງການສະຫະປະຊາຊາດຢືນຢັດ ຢູ່ກັບປະຊາຊົນນໍເວ ໃນ ຖະແຫລງການສະບັບນຶ່ງນັ້ນ ສະພາຄວາມໝັ້ນຄົງອົງການສະຫະ ປະຊາຊາດ ໄດ້ປະນາມດ້ວຍຂໍ້ຄວາມທີ່ແຮງທີ່ສຸດຕໍ່ອັນທີ່ຕົນ ເອີ້ນວ່າ ເປັນການກະທໍາທີ່ ຊົ່ວຮ້າຍເລວຊາມທີ່ສຸດນັ້ນ ແລະກ່າວຕໍ່ໄປວ່າ ບັນດາສະມາຊິກຂອງຕົນ ໄດ້ຢືນຢັນຄືນ ໃໝ່ວ່າ ການກໍ່ການຮ້າຍຖືວ່າເປັນນຶ່ງໃນການຂົ່ມຂູ່ທີ່ຮ້າຍແຮງທີ່ສຸດ ຕໍ່ສັນຕິພາບ ແລະ ຄວາມໝັ້ນຄົງ ຂອງນານາຊາດ.
