ລັດຖະມົນຕີກະຊວງຍຸຕິທຳຂອງນໍເວໄດ້ກ່າວຊົມເຊີຍຕຳຫຼວດໃນການຮັບບມືກັບການໂຈມຕີ
ດ້ວຍອາວຸດປືນແລະລະເບີດທີ່ເຮັດໃຫ້ມີຜູ້ເສຍຊີວິດ 76 ຄົນໃນມື້ວັນສຸກແລ້ວ ໂດຍເວົ້າວ່າ
ພວກຕຳຫຼວດໄດ້ປະຕິບັດໜ້າທີ່ ແບບໜ້າມະຫັດສະຈັນ.
ລັດຖະມົນຕີຍຸຕິທຳ Knut Storberget ກ່າວໃນວັນອັງຄານມື້ນີ້ວ່າມັນເປັນເລື່ອງສຳຄັນທີ່
ຈະໃຊ້ວິທີແບບເປີດເຜີຍແລະວິຈານເພື່ອຊັ່ງຊາ ຕີລາຄາເບິ່ງການຮັບມື ແຕ່ນັ້ນມັນເປັນເວລາ
ສຳລັບທຸກໆຢ່າງ.
ການໃຫ້ຄວາມເຫັນຂອງທ່ານມີຂຶ້ນຫຼັງຈາກໄດ້ມີການຕຳໜິຕິຕຽນຂອງມວນຊົນກ່ຽວກັບການ
ໃຊ້ເວລາດົນປານໃດຕຳຫຼວດຈຶ່ງໄປເຖິງເກາະ Utoeya ບ່ອນທີ່ນາຍ Anders Behring
Breivik ທີ່ເປັນມືປືນໄດ້ຖືກກ່າວຫາຖານທໍາການສັງຫານປະຊາຊົນຢ່າງໜ້ອຍ 68 ຄົນ
ນັ້ນ.
ຕຳຫຼວດເວົ້າວ່າ ໃຊ້ເວລາຢ່າງນ້ອຍນຶ່ງຊົ່ວໂມງ ຕຳຫຼວດຈຶ່ງໄປຮອດເກາະດັ່ງກ່າວ ບ່ອນທີ່
ພວກຊາວໜຸ່ມຫລາຍຮ້ອຍຄົນພາກັນໄປໂຮມຊຸມນຸມກັນໃນຄ້າຍພັກລະດູຮ້ອນຂອງພັກ
ແຮງງານ.
ນາຍ Breivik ໄດ້ໄປທີ່ນັ້ນຫລັງຈາກຖືກກ່າວຫາວ່າໄດ້ວາງລະເບີດໂຈມຕີໃສ່ຕຶກອາຄານ
ໂຮງການລັດຖະບານໃນກຸງໂອສໂລ ເຮັດໃຫ້ປະຊາຊົນເສຍຊີວິດໄປ 8 ຄົນນັ້ນ.
ມີປະຊາຊົນນໍເວຈໍານວນຫລາຍເຖິງ 1 ແສນ 5 ໝື່ນຄົນພາກັນຍ່າງໄປຕາມຖະໜົນຫົນທາງ
ສາຍຕ່າງໆໃນກຸງໂອສໂລ ໃນວັນຈັນມື້ວານນີ້ເພື່ອໄວ້ອາໄລນໍາພວກເຄາະຮ້າຍ. ຫຼາຍຄົນທີ່
ປະກອບສ່ວນເຂົ້າໃນການຍ່າງຊຸມນຸມຄັ້ງນີ້ ໄດ້ພາກັນຖືດອກກຸຫລາບສີຂາວແລະສີແດງ
ເພື່ອເປັນຂີດໝາຍສະແດງໃຫ້ເຫັນເຖິງຄວາມຮຸນແຮງຮ້າຍກາດທີ່ສຸດໃນນໍເວນັບແຕ່ການ
ຄອບຄອງຂອງພວກນາຊີໃນປາງສົງຄາມໂລກຄັ້ງ ທີສອງເປັນຕົ້ນມາ.
