ໃນວັນອາທິດມື້ນີ້ ປະເທດນໍເວ ທໍາພິທີເປັນຂີດໝາຍວັນຄົບຮອບນຶ່ງປີຂອງການໂຈມຕີສອງບັ້ນພ້ອມກັນ ທີ່ຍັງຜົນໃຫ້ມີຜູ້ເສຍຊີວິດ 77 ຄົນ.
ມີກໍານົດຈັດ ພິທີຕ່າງໆເພື່ອລະນຶກເຖິງວັນດັ່ງກ່າວນີ້ ຂຶ້ນຢູ່ທົ່ວນໍເວ ໃນຂະນະທີ່ປະເທດໃນເຂດ Scandinavia ແຫ່ງນີ້ ລະນຶກເຖິງເຫດການ ໂຈມຕີຄັ້ງນັ້ນ ທີ່ນາຍົກລັດຖະມົນຕີນໍເວ ທ່ານ Jens Stoltenberg ກ່າວວ່າ ເປັນເຫດການທີ່ຮ້າຍແຮງທີ່ສຸດໃນນໍເວ ນັບຕັ້ງແຕ່ສົງຄາມໂລກຄັ້ງທີ່ສອງເປັນຕົ້ນມາ.
ເຫດເກີດຂື້ນເມື່ອ ວັນທີ 22 ເດືອນກໍລະກົດ ປີ 2011 ເວລານາຍ Anders Behring Breivik ໄດ້ຈູດຂະນວນລະເບີດລູກນຶ່ງແຕກຂຶ້ນຢູ່ໃກ້ ຕຶກໂຮງການແຫ່ງນຶ່ງຂອງລັດຖະບານ ທີ່ສັງຫານ 8 ຄົນ. ຫຼັງຈາກນັ້ນ ນາຍ Breivik ກໍໄດ້ເປີດສາກຍິງຢ່າງເມົາມັນ ໃສ່ຜູ້ຄົນທີ່ແຄ້ມເຍົາວະຊົນແຫ່ງນຶ່ງ ຢູ່ເກາະ Utoeya ໂດຍໄດ້ສັງຫານ 69 ຄົນ ສ່ວນຫຼາຍແມ່ນພວກໄວລຸ້ນ.
ນາຍ Breivik ຊຶ່ງມີອາຍຸໄດ້ 32 ປີ ໃນເວລາກໍ່ເຫດນັ້ນ ໄດ້ຍອມຮັບເອົາຄວາມຮັບຜິດຊອບໃນການສັງໝູ່ດັ່ງກ່າວຢ່າງງ່າຍໆ ໂດຍເວົ້າວ່າ ຕົນມີເຫດຜົນອັນຖືກຕ້ອງຊອບທໍາ ຍ້ອນວ່າພວກເຄາະຮ້າຍເຫຼົ່ານັ້ນ ໄດ້ຊ່ວຍ ເຮັດໃຫ້ປະເທດນໍເວ ກາຍເປັນປະເທດອິສລາມ.
ການດໍາເນີນຄະດີນາຍ Breivik ໄດ້ສິ້ນສຸດລົງເມື່ອເດືອນຜ່ານມາ ແລະ ຄາດວ່າ ສານຈະຕັດສິນຄະດີໃນເດືອນໜ້ານີ້.