ພວກທີ່ເຫັນເຫດການໃນພາກເໜືອຂອງມາລີ ກ່າວວ່າ ຢ່າງໜ້ອຍມີປະຊາ ຊົນ 20 ຄົນເສຍຊີວິດ ໃນວັນພຸດວານນີ້ ໃນການປະທະກັນຫຼາຍບັ້ນ ລະ ຫວ່າງພວກນັກຕໍ່ສູ້ຫົວຮຸນແຮງອິສລາມ ແລະພວກກະບົດທີ່ກໍາລັງທໍາການ ຕໍ່ສູ້ເພື່ອສ້າງຕັ້ງປະເທດເອກກະລາດ Tuareg ຂຶ້ນໃນຂົງເຂດນັ້ນ.
ນັກຂ່າວວີໂອເອ ກ່າວວ່າ ກຸ່ມ MUJAO ທີ່ເປັນເຄືອຂ່າຍຂອງພວກກໍ່ການ ຮ້າຍ al-Qaida ໄດ້ເຂົ້າຄວບຄຸມເມືອງ Gao ທີ່ສໍາຄັນຈາກກຸ່ມຫົວແບ່ງແຍກດິນແດນ MNLA ຫຼັງຈາກໄດ້ຍິງໂຈມຕີກັນດ້ວຍປືນໃຫຍ່ຕະຫຼອດວັນ ນັກຂ່າວວີໂອເອເວົ້າວ່າ ຈໍານວນຜູ້ບາດເຈັບຫຼືເສຍຊີວິດທີ່ແນ່ນອນໃນເວລານີ້ຍັງບໍ່ທັນເປັນທີ່ຈະແຈ້ງເທື່ອ ໃນຂະນະທີ່ມີຜູ້ບາດເຈັບຫຼາຍຄົນ ຊຶ່ງເປັນພວກພົນລະເຮືອນນັ້ນ. ນັກຂ່າວຄົນນີ້ກ່າວຕໍ່ໄປວ່າ ຫຼັງຈາກພວກກະບົດຫົວແບ່ງແຍກດິນແດນຖືກຂັບໄລ່ອອກຈາກເມືອງ Gao ແລ້ວການດໍາເນີນຊີວິດໄດ້ກັບຄືນເຂົ້າສູ່ສູ່ສະພາບປົກກະຕິ ຄືພວກຮ້ານຄ້າໄດ້ໄຂຄືນ ແລະພວກພໍ່ຄ້າແມ່ຄ້າກໍກັບຄືນມາປະຈໍາຮ້ານຂອງເຂົາເຈົ້າໃນຕະຫຼາດ.
ນັກຂ່າວວີໂອເອ Idriss Fall ໄດ້ໄປຢາມເມືອງ Gao ຫລັງຈາກພວກກະບົດໄດ້ເຂົ້າຍຶດເອົາ
ແລະມີຮູບມາໃຫ້ເບິ່ງ:
ກຸ່ມຫົວແບ່ງແຍກດິນແດນ MNLA ແລະກຸ່ມຫົວຮຸນແຮງອິສລາມ Ansar Dine ໄດ້ເຂົ້າຄວບຄຸມພາກເໜືອຂອງມາລີ ໃນຕົ້ນປີນີ້. ທັງສອງກຸ່ມແມ່ນປະກອບດ້ວຍຊົນເຜົ່າ Tuareg ຈາກວົງຕະກູນຕ່າງໆ. ແຕ່ໃນຂະນະ
ທີ່ກຸ່ມ MNLA ຢາກຕັ້ງປະເທດເອກກະລາດຂອງພວກ Tuareg ຂຶ້ນ ທີ່ໃສ່ຊື່ວ່າ Azawad ໃນພາກເໜືອຂອງມາລີ ແຕ່ພວກນັກຕໍ່ສູ້ຫົວຮຸນແຮງອິສລາມ ກ່າວວ່າ ພວກເຂົາເຈົ້າຢາກຮວມປະເທດມາລີເຂົ້າກັນ ແລະປົກ ຄອງດ້ວຍກົດໝາຍ sharia ຂອງສາສະໜາອິສລາມ. ທັງສອງຝ່າຍໄດ້ປະທະກັນມາຫຼາຍບັ້ນໃນຫວ່າງບໍ່ເທົ່າໃດສັບປະດາຜ່ານມານີ້.
ໃນນະຄອນຫຼວງ Bamako ໃນວັນພຸດວານນີ້ ພວກອົບພະຍົບຈາກພາກ ເໜືອຂອງມາລີ ໄດ້ທໍາການປະທ້ວງເປັນມື້ທີສອງລຽນຕິດ ຢູ່ນອກສໍານັກ ງານນາຍົກລັດຖະມົນຕີ ພາກັນຮຽກຮ້ອງໃຫ້ລັດຖະບານເຂົ້າແຊກແຊງໃນ ພາກເໜືອຂອງປະເທດນັ້ນ.
