ລິ້ງ ສຳຫລັບເຂົ້າຫາ

logo-print

ເກົາຫຼີ​ເໜືອ ແລະ ເກົາຫຼີ​ໃຕ້ ສົ່ງ​ຈົດ​ໝາຍ ຫາ​ກັນ​ແລະ​ກັນ ກ່ຽວ​ກັບ ໄວ​ຣັ​ສ​ໂຄ​ໂຣ​ນາ


​ພວກ​ຊາວ​ເກົາຫຼີ​ໃຕ້ ໃສ່​ໜ້າ​ກາກ ຢືນ​ລຽນ​ແຖວ ເພື່ອ​ຊື້​ໜ້າ​ກາກ ຢູ່​ຫ້ອງ​ການ​ໄປ​ສະ​ນີ ​ທ່າມ​ກາງ​ການ​ເພີ້ມ​ສູງ​ຂຶ້ນ ຂອງ​ກໍ​ລະ​ນີ​ຕິດ​ເຊື້ອ​ໄວ​ຣັ​ສ (COVID-19) ທີ່​ໄດ້​ຮັບ​ການ​ຢືນ​ຢັນ ຢູ່​ໃນ ເມືອງ​ເດ​ກູ ຂອງ​ປະ​ເທດ, ວັນ​ທີ 5 ມີ​ນາ 2020 (REUTERS/Kim Kyung-Hoon)

ຜູ້​ນຳ​ຂອງເກົາຫຼີ​ເໜືອ ແລະ​ເກົາຫຼີ​ໃຕ້ ​ກັບ​ມາ​ລົມ​ກັນ​ອີກ​ເທື່ອ​ນຶ່ງ ຫຼັງ​ຈາກຫຼາຍ​ເດືອນ​ຜ່ານ​ມາ ທີ່​ການ​ສື່​ສານ​ລະ​ຫວ່າງ​ກັນ​ໄດ້​ແຕກ​ຫັກ​ລົງ. ຫາກ​ແຕ່ ໃນ​ຄັ້ງ​ນີ້ ທັງ​ສອງ​ປະ​ເທດ ແມ່ນ​ຈະ​ສຸມ​ໃສ່​ກາ​ນປຶກ​ສາ​ຫາ​ລື​ຮ່ວມ​ກັນ ກ່ຽວ​ກັບ ການ​ລະ​ບາດ​ຂອງໄວ​ຣັ​ສ​ໂຄ​ໂຣ​ນາ ຫຼື COVID-19 ນັ້ນ.

ຜູ້​ນຳ​ເກົາຫຼີ​ເໜືອ ທ່ານ​ກິມ ຈົງ ອຶນ ໃນ​ວັນ​ພຸດ​ວານນີ້ ໄດ້​ສົ່ງຈົດ​ໝາຍ​ແບບ​ສ່ວນ​ຕົວ​ໄປ​ໃຫ້ ປະ​ທາ​ນາ​ທິ​ບໍ​ດີ ເກົາຫຼີ​ໃຕ້ ທ່ານ​ມູນ ແຈ-ອິນ ເພື່ອໃຫ້​ຄຳ​ອວຍ​ພອນ​ທີ່​ປະ​ເສີດ​ແກ່​ທ່ານ ແລະ​ສະ​ແດງ​ຄວາມ​ເສຍ​ໃຈ ສຳ​ລັບ​ການ​ລະ​ບາດ​ຂອງໄວ​ຣັ​ສໂຄ​ໂຣ​ນາ ​ຄັ້ງຫຼ້າ​ສຸດ ​ອີງ​ຕາມ​ການ​ກ່າວ​ຂອງ​ໂຄ​ສົກ​ຜູ້​ອະ​ວຸ​ໂສ​ຂອງ​ທ່ານ​ມູນ ທ່ານ ຢູນ ໂດ-ຮານ ​ທີ່ໄດ້​ກ່າວ​ໄປໃນ​ກອ​ງ​ປະ​ຊຸມ​ຖະ​ແຫລງ​ຂ່າວ.

ໃນ​ຂະ​ນະ​ທີ່ ບໍ່​ຮູ້​ຈັກ​ວ່າ ເນື້ອ​ໃນ​ທີ່​ແທ້​ຈິງ​ຂອງ​ຈົດ​ໝາຍ​ດັ່ງ​ກ່າວ ແມ່ນ​ເລື້ອງ​ຫຍັງ​ແທ້ ຊຶ່ງ​ມັນ​ກໍ​ບໍ່​ໄດ້​ຖືກ​ເປີ​ດ​ເຜີຍ. ທ່ານ​ຢູນ​ ໄດ້​ກ່າວ​ວ່າ ຜູ້​ນຳ​ເກົາຫຼີ​ເໜືອ ໄດ້​ກ່າວ​ວ່າ ທ່ານ​ມີ​ຄວາມ​ເປັນ​ຫ່ວງ​ສຳ​ລັບ​ສຸ​ຂະ​ພາບ​ຂອງ​ທ່ານ​ມູນ ແລະ​ມີ​ຄວາມ​ຮູ້​ສຶກ​ງຸດ​ງິດ ທີ່​ເກົາຫຼີ​ເໜືອ ບໍ່​ສາ​ມາດ​ຊ່ອຍ​ຫຍັງ​ໄດ້​ຫລາຍ. ຈົດ​ໝາຍ​ສະ​ບັບ​ນີ້ ຍັງ​ໄດ້​ສະ​ແດງ​ເຖິງ​ຄວາມ​ຄິດ​ແບບ​ກົງ​ໄປ​ກົ​ງ​ມາ ກ່ຽວ​ກັບ​ເລື້ອງ​ຕ່າງໆ​ທົ່ວ​ໄປ ຢູ່​ໃນ​ແຫລມ​ເກົາຫຼີ ອີງ​ຕາມ​ກອງ​ປະ​ຊຸມ​ແຈ້ງ​ໃຫ້​ຊາບ.

ເກົາຫຼີ​ໃຕ້ ກຳ​ລັງ​ຢູ່​ໃນ​ພາ​ວະ​ສູ້​ຊົນ​ໜັກ ຄັ້ງ​ທີ່​ສອງຂອງ​ໄວ​ຣັ​ສ​ໂຄ​ໂຣ​ນາ COVID-19 ຂອງ​ການ​ລະ​ບາດທີ່​ໃຫຍ່​ທີ່​ສຸດ​ຂອງ​ໂລກ ລຸນຫຼັງ​ຈາກ​ຈີນ ບ່ອນ​ທີ່ເຊື້ອໄວ​ຣັ​ສ​ໄດ້​ຖືກກວດ​ພົບ​ເທື່ອ​ທຳ​ອິດ . ມາ​ເຖິງ​ຕອນ​ກາງ​ເວັນ ວັນ​ພະ​ຫັນ​ມື້ນີ້ ມີ​ຜູ້​ເສຍ​ຊີ​ວິດ ຢ່າງ​ໜ້ອຍ 35 ຄົນ ແລະ​ມີ​ກໍ​ລະ​ນີ​ຕິດ​ເຊື້ອ​ໄວ​ຣັ​ສ COVID-19ແລ້ວ 5,766 ລາຍ ຢູ່​ໃນ​ເກົາຫຼີ​ໃຕ້ ໂດຍ​ຄິດ​ສະ​ເລ່ຍ​ແລ້ວ ປະ​ມານ 75 ເປີ​ເຊັນ​ຂອງ​ກໍ​ລະ​ນີ​ການ​ຕິດ​ເຊື້ອ​ໄວ​ຣັ​ສ ​ແມ່ນ​ສຸມ​ຢູ່​ໃນ​ເມືອງ​ເດ​ກູ ທາງ​ພາກ​ຕາ​ເວັນ​ອອກ​ສຽງ​ໃຕ້​ຂອງ​ປະ​ເທດ.

ອ່ານ​ຂ່າວນີ້​ຕື່ມ ເປັນ​ພາ​ສາ​ອັງ​ກິດ

XS
SM
MD
LG